Владимир Путин Узбекистанд айлчлах үеэрээ хэвлэлийн бага хурал дээр хэлэхдээ, “урьдчилсан үнэлгээгээр” Украинд “цорын ганц хууль ёсны эрх мэдэл нь парламент ба Радагийн даргад хадгалагдаж байна” гэж мэдэгдсэн билээ. Үүний зэрэгцээ, Путин Украины Үндсэн хуулийн 111 дүгээр заалтыг дурдсан бөгөөд түүний дагуу сонгууль явагдаагүй дайны үеийн улмаас ерөнхийлөгчийн бүрэн эрхийн хугацаа дууссаны дараа дээд эрх мэдлийн бүрэн эрхийг Радагийн даргад шилжүүлнэ” гэж заасан байгааг онцолж байсан билээ.
Тэгвэл Дээд Радагийн дарга Руслан Стефанчук ОХУ-ын ерөнхийлөгч Владимир Путинд хандан “Украины ерөнхийлөгч Владимир Зеленский үндсэн хууль болон бусад хууль тогтоомжийн дагуу тус улсад дайны байдал дуустал төрийн тэргүүн хэвээр байх болно” гэж мэдэгдэв. Тэрээр “Сониуч уншигчдад манай Үндсэн хуулийн эх бичвэрийг судалж, 108 дугаар зүйлийн 1 дэх хэсэгт анхаарлаа хандуулахыг зөвлөж байна: “Ардчилсан нийгэмд Украины шинээр сонгогдсон Ерөнхийлөгч бүрэн эрхээ хэрэгжүүлэх хүртэл Украины Ерөнхийлөгч бүрэн эрхээ хэрэгжүүлнэ.” “Эрх мэдлийн тасралтгүй байдал” гэж Стефанчук Facebook дээр бичжээ. Харин Зеленский өмнө нь сэтгүүлчдэд хэлэхдээ “ОХУ-ын хууль бус ерөнхийлөгчийн Украины ерөнхийлөгчийн хууль бус байдлын талаарх мэдэгдэл нь уйтгартай, сонирхолгүй зүйл бөгөөд бидэнд нэг их төвөг учруулдаггүй” гэж хэлсэн юм. Владимир Зеленский 2019 оны тавдугаар сарын 20-нд Украины ерөнхийлөгчийн албан тушаалд орсон бөгөөд Украины төрийн тэргүүний дараагийн сонгууль өнгөрсөн гуравдугаар сарын 31-нд болох байсан.
Гэсэн хэдий ч ОХУ-ын түрэмгийллийн дараа тус улсад дайны нөхцөл байдал үүссэн тул Дээд Рада сонгууль зарлаагүй билээ. Украины ерөнхийлөгч өөрөө 2023 оны арваннэгдүгээр сард “Одоо сонгууль болох цаг биш” гэж хэлсэн юм. Харин Оросын улстөрчид, суртал ухуулагчид Зеленскийн Украины төрийн тэргүүний хувьд хууль ёсны эсэхэд нэг бус удаа эргэлзсээр ирсэн. Түүнийг Украины хууль ёсны ерөнхийлөгч байхаа больсон гэж ОХУ-ын Гадаад хэргийн сайд Сергей Лавров, экс ерөнхийлөгч Дмитрий Медведев нар мэдэгдсэн. Харин Германы ГХЯ-ны тэргүүн Анналена Баербок энэ сарын 21-нд Киевт “Германы хувьд Зеленский чадварлаг төрийн тэргүүн хэвээр байна” гэж мэдэгдсэн билээ.