Энэ сарын 5-ны өглөө Оросын Z блогчид гэнэт л Украины арми Курск мужид шинэ довтолгоо эхлүүлсэн тухай мэдээлж эхлэв. Z блогчин Роман Алехин “Курскийн атомын цахилгаан станцаас 35 км зайд байрлах Большой Солдатское тосгон руу Украины зэвсэгт хүчин довтолж байна. Дайсан дайралт хийхдээ мина цэвэрлэх трал, танк болон бусад хуягт машинуудыг ашиглаж байна. Дайсан довтолгооны бүсэд долгионы эсрэг цахим зэвсэг нягт ашиглаж байгаа учир манай цэргүүд дронууд ашиглах боломжгүй байна. Магадгүй дайсан өөр чиглэлд нэвтрэхийг оролдох байх”, “WarGonzo” телеграм суваг “Большой Солдатское болон түүнтэй ойролцоо орчих Бердин тосгоныг Украины арми хяналтдаа авч, цааш довтолж байна” гэж мэдээлэв. Энэ мэдээллийг “Комсомольская правда” сонины цэргийн сурвалжлагч Александр Коц ч баталж “Украины арми Большой Солдатское болон Суджанский дүүргийн чиглэлд идэвхтэй давшилт хийж, тэд баруун жигүүрийн Новоивановка, зүүн жигүүрийн Бердин сууринг хоёуланг нь эзлээд байна. Би энэ бол анхаарал татах цохилт бөгөөд Украины арми Сумы мужийн Шосткинскийн дүүргээс манай Рыльский, Хомутовскийн дүүрэг рүү цохилт хийнэ гэж бооцоо тавихад бэлэн байна. Эсвэл тэндээс Брянск муж руу ч довтолж магадгүй” гэж мэдээлэв. “Z-blogger” Юрий Подоляка “Украины Зэвсэгт хүчний Курск мужид хийж буй шинэ довтолгоо нь манай цэргийн анхаарлыг өөр тийш нь чиглүүлэх ажиллагаа байж магадгүй юм. Одоогоор Украины Зэвсэгт хүчний үндсэн хүчин тулаанд ороогүй байна” гэж тэр мэдэгдэв. Оросын Батлан хамгаалах яаманд ойр байдаг “Рыбар” телеграм суваг “Украины армийн командлал хэдэн сарын турш Оросын Зэвсэгт хүчний Запорожье муж дахь хамгаалалтыг давах төлөвлөгөө боловсруулж, сул талуудыг судалж байсан” гэжээ.
Оросын дайныг дэмжигч блогчин Алекс Паркер “Украины зэвсэгт хүчний энэ довтолгооны зорилго нь Суджагаас Курчатов руу нэвтэрч, Курскийн атомын цахилгаан станцыг булаан авах явдал юм. Украины арми зөвхөн Большой Солдатское чиглэлд төдийгүй Суджагийн зүүн хойд Пушкарное тосгоны чиглэлд довтолж байна” гэж бичжээ.
Оросын Батлан хамгаалах яам Украины Зэвсэгт хүчний энэхүү довтолгоог баталж “Энэ сарын 5-ны ням гаригт Москвагийн цагаар 09:00 цагийн орчимд Курскийн чиглэлд Оросын цэргүүдийн давшилтыг зогсоохын тулд Бердин тосгоны чиглэлд Украины цэргүүд сөрөг довтолгоон хийсэн” гэж мэдээлэв. Харин Украины Жанжин штаб довтолгооны ажиллагааныхаа нарийн зүйлийг одоогоор задлахгүй байна. Харин тэд ”Энэ сарын 5-нд Курск мужид цэргийн мөргөлдөөний тоо эрс нэмэгдсэн гэж өдөр тутмын тайланд дурджээ. Хэрэв энэ сарын 4-ний өдрийн турш 33 цэргийн мөргөлдөөн болсон бол ням гаригийн 16:00 цаг гэхэд 42 бүртгэгдэж, 12 тулаан үргэлжилж байна гэж мэдээлэв. Харин Украины Үндэсний аюулгүй байдал, батлан хамгаалах зөвлөлийн дэргэдэх Худал мэдээлэлтэй тэмцэх төвийн тэргүүн Андрей Коваленко “Украинчууд Курск мужид оросуудын хувьд санаанд оромгүй дайралт эхлэв. Курск муж дахь оросууд хэд хэдэн чиглэлд Украины халдлагад өртөн сандралдаж эхэлсэн бөгөөд энэ нь тэдний хувьд гэнэтийн зүйл болсон. Манай цэргүүдийн довтолгоон амжилттай өрнөж байна” гэж бичжээ. Мөн Украины ерөнхийлөгчийн Тамгын газрын дарга Андрей Ермак Курск мужид болсон үйл явдлын талаар телеграм сувагтаа “Курскийн бүс нутгаас сайн мэдээ ирж, Орос улс хүртэх ёстой зүйлээ авч байна. Довтолгооны үеэр Украины Зэвсэгт хүчин Оросын 700 орчим цэргийг олзолжээ. Украины арми мэдэлдээ байсан Курск мужийн 1.1 мянга орчим метр квадрат газрыг өргөтгөн Оросын хамгаалалтыг бүсийг давж, Суджа хот болон ойролцоох суурин газруудыг хяналтдаа авсан байна” гэж бичжээ.
Өнгөрсөн есдүгээр сарын дунд үеэс Орос улс Курск мужид сөрөг довтолгоонд шилжин арванхоёрдугаар сарын эхээр Кремль эдгээр ажиллагаанд БНАСАУ-ын 11-12 мянга орчим цэрэг оролцуулсан бөгөөд энэ он гарахад эзлэгдсэн газар нутгийн тал орчим хэсгийг эргүүлэн авч чадсан юм. Гэтэл тэд ийнхүү Украины гэнэтийн сөрөг довтолгоонд өртөв. Харин цэргийн шинжээчид ийм сөрөг довтолгоон эхэлнэ гэдгийг урьдчилан сануулж байсан билээ. Тэд бүгд “Оросын арми нэг хоногт 2000 цэргээ алдаж Сталинградын тулаанд Оросуудын тогтоосон дайны рекордыг эвдэв. Оросууд дунджаар өдөрт мянга гаруй цэргээ алдаж, жижиг суурингуудыг эзэлж буй нь тактикийн амжилт бус харин ч эцэстээ тэдэнд гарцаагүй стратегийн ялагдал авчрах болно. Оросын армийн удирдлага яагаад баруунд бэлтгэгдэж байгаа Украины бригадууд болон цэргийн шинжлэх ухааныг тоохгүй байгааг огт ойлгохгүй байна” гэж бичиж байсан билээ. Харин Украины энэ сөрөг довтолгооны дараа тэд “Оросын арми “ацан шалаа”-нд орлоо.
Хэрэв тэд Украины фронтоос цэргээ татвал тэр хэсэгт нь Украины арми сөрөг довтолгоон эхэлнэ. Цэргээ татахгүй бол Курск мужийн газар нутгаа алдана. Ямар ч байсан Дональд Трампыг АНУ-ын ерөнхийлөгчийн албан тушаалдаа орох хүртэл давшиж байх гэсэн Путины мөрөөдөл талаар болов” гэж бичиж байна.