Хүнсний эрүүл ахуйн тулгамдсан асуудлуудыг бодит өгөгдөлд суурилан салбарын мэргэшсэн залуусаар шилдэг инновацын шинэлэг шийдлийг гаргах төсөл болгон хэрэгжүүлэх боломжийг олгох зорилготой хакатоны эцсийн шатны шалгаруулалт 3 дугаар сарын 29-ний өдөр амжилттай зохион байгуулж аваргуудаа тодруулсан юм.
Баянхошуу бизнес инкубатор, сургалт үйлдвэрлэлийн төвд болсон тус хакатоны эцсийн шатанд шалгарсан багуудад ментор, зөвлөхөөр оролцож буй компаниудын төлөөлөл зөвлөгөө өгч, илтгэл тавив.
Тухайлбал Магнофлок ХХК-ийн гүйцэтгэх захирал Б.Баярчимэг “Хоол, хүнс үйлдвэрлэлд чанар, аюулгүй байдал чухал уу? сэдвээр UpTech ХХК-ийн гүйцэтгэх захирал Ц.Ариунболд “Мэдээллийн технологийн эрин үе” сэдвээр багуудад сонирхолтой илтгэлүүдийг тавьж, салбарын мэдлэг олгох Kahoot тэмцээнийг зохион байгуулж өндөрлөсөн юм.
Тэмцээний шүүгчдийн бүрэлдэхүүнээр ажилласан Нийслэлийн Бизнес инновацын газрын Төсөл, хамтын ажиллагааны хэлтсийн дарга Б.Ганцэцэг, Зохис аппликейшн ХХК-ийн Гүйцэтгэх захирал Ж.Тэмүжин, Хүнсний инженер О.Гал-Очир нар шилдэг шийдэл гаргасан 3️ багийг танилцууллаа.
Хакатоны ялагчид:
Сэдэв 1: Хүнсний нарийн ногооны хүлэмж, далайн гаралтай бүтээгдэхүүнийг дотооддоо бий болгох боломжийг бүрдүүлэх; сэдвээр инженерүүдээс бүрдсэн “Beelog Junior” баг – Нарийн ногооны хүлэмжийн инновац шингэсэн загварыг олон улсын жишигт нийцүүлэн боловсруулсан шинэлэг шийдлийг;
Сэдэв 2: Хүнсний хог хаягдлыг дахин боловсруулах, ашиглах сэдвээр ШУТИС-ХҮҮТ-ийн “Green Gen” баг – Хаягдал тос болон шинжлэх ухаан, инженерчлэлд суурилсан судалгаатай шийдлийг;
Сэдэв 3: СӨБ болон ЕБС-ийн хүнс хангамжийн менежментийг сайжруулах, Нийслэл хотын хүнсний бүтээгдэхүүн тээвэрлэлтийн шийдэл боловсруулах сэдвээр ШУТИС-ийн “Nutrilink” баг –
Сургуулиудад шим тэжээлтэй хоол хүргэх ханган нийлүүлэлтийн шийдлээр шалгарч ялагчаар тодорч тус бүр 3 сая төгрөгийн шагналын эзэд боллоо.
Шилдэг 3 багийн илтгэгч нар 2025 оны 04 дүгээр сарын 14-нд болох Хүнсний чанар, аюулгүй байдлыг сурталчлах нөлөөллийн “Эрүүл хүнс, Эрүүл хүн” аяны нээлтийн арга хэмжээнд ч уригджээ.
Улмаар эдгээр шийдэл бодитоор хэрэгжих эхлэл тавигдах юм.
