Category: амьдралын-өнгө

Монгол Улсын “Статистикийн тухай” хуулийн 7 дугаар зүйлийн 1 дэх заалт, Монгол Улсын Засгийн газрын тогтоолын дагуу “Мал, тэжээвэр амьтдын тооллого”-ыг 2020 оны 12 дугаар сарын 7-ноос 17-ны өдрүүдэд улсын хэмжээнд зохион байгуулсан.

Мал тооллогын урьдчилсан дүнгээр 2021 оны жилийн эцэст Төв аймгийн малын тоо 4 сая 744.1 мянган толгойд хүрчээ.

Төв аймгийн Баянжаргалан, Архуст, Аргалант сумын мал таван төрөл дээр өссөн ба 2021 оны мал тооллогын дүнгээр Төв аймаг 3662 тэмээ, 356871 адуу, 319567 үхэр, 2.534.444 хонь, 1.529.554 ямаа тоолуулж, малын тоогоор улсад дөрөвдүгээрт эрэмбэлэгджээ.

Эх сурвалж: Төв аймгийн ЗДТГ

Баян-Өлгий аймгийн Алтанцөгц сумаас баруун зүгт 12 километр зайнд өнөөдөр буюу нэгдүгээр сарын 6-ны өдрийн 15:09:49 цагт 3.6 магнитуд, 14:50:08 цагт 3.9 магнитудын хүчтэй газар хөдөлжээ.

Газар хөдлөлтийн улмаас ямар нэгэн хохирол учраагүй болохыг Онцгой байдлын ерөнхий газраас мэдээллээ.

Алтанцөгц сум нь аймгийн төв Өлгий хотоос зүүн зүгт 45 км зайд байрладаг.

Хөвсгөл аймгийн Онцгой байдлын газрын Хатгал тосгон дахь Гал түймэр унтраах, аврах 69 дүгээр ангийн алба хаагчид Хөвсгөл нуурт хэмжилт хийж, мөс цөмөрч болзошгүй газруудад хориглох тэмдэг байршууллаа.

Хэмжилт хийхэд Мэргэний үзүүрийн мөсний зузаан 15 см, Нефть баазын эрэг хэсгээр 59 см, Хар толгойн эрэг хэсгээр 55 см хөлдөж өмнөх жилүүдээс нимгэн байгааг тогтоосон байна.

Мөн Хөвсгөл нуур битүү мөсөн бүрхүүл тогтсон боловч мөсний даац хүн, мал, машин техник явахад хангалттай хэмжээнд хүрч бэхжээгүй байгаа тул иргэд амралт зугаалгаар нуурын мөсөн дээгүүр хөдөлгөөн үйлдэхгүй байхыг анхаарууллаа гэж Хөвсгөл аймгийн Онцгой байдлын газраас мэдээллээ.

Улсын хэмжээнд амбулаториор үйлчлүүлэгсдийн дунд томуу, томуу төст өвчин 10,000 хүн амд 16.6 бүртгэгдэж, 16 хүртэлх насны 1,255 хүүхэд эмнэлэгт хэвтэн эмчлүүлжээ.

Үүний 26.2 хувь нь амьсгалын замын цочмог хүнд халдварын шалтгаантай ба улирлын болон томуугийн цар тахлын эрсдэлийн үнэлгээгээр идэвхжлийн түвшинд байна.

Өвчлөлөөс сэргийлэх хамгийн сайн хамгаалалт нь биеийн эсэргүүцэл сайн байх явдал тул витаминлаг чанарлаг хоол идэх, биеийн тамирын дасгал хөдөлгөөнийг эрхэмлэн, ажил амралтаа зохицуулж, хангалттай амрах хэрэгтэйг эрүүл мэндийн байгууллагаас зөвлөлөө.

• Улирлын байдалд тохируулан хувцаслах, хүйтэнд малгай, ороолт, бээлий хэрэглэх
• Шаардлагагүй тохиолдолд олон нийтийн газар явахгүй байх
• Хамрын салстад сонгино, саримсны тосон ханд, оксолины тос түрхэх
• Гичтэй бүлээн усанд хөлөө 5-10 минут дүрж, хөлийн уланд тосон иллэг хийх
• Витамин С-ээр элбэг жимс болон шүүс, витамин С-г хэрэглэх
• Өдөрт 2-3 хумс саримсыг хоол ундандаа хэрэглэх
• Томуу, томуу төст өвчнөөс сэргийлэх цэгчилсэн иллэг хийх
• Царван, морин шарилжны ханд, содтой болон давстай ус, тамидин зэрэг уусмалаар хоолойгоо тогтмол зайлж хэвших

Эдгээр энгийн аргуудыг хэрэглэхээс гадна ТТТӨ-нөөс сэргийлэх үндсэн гол арга бол томуугийн эсрэг сайн дурын дархлаажуулалтад хамрагдах юм.

Баян-Өлгий аймгийн Онцгой байдлын газарт өнөөдөр өглөөний 06:42 цагт Өлгий сумын 4 дүгээр багийн нутаг дэвсгэрт гал гарч байгаа тухай дуудлага иржээ.

Дуудлагын дагуу Онцгой байдлын алба хаагчид гал гарсан газарт ирэхэд айлын хашаанд хураалттай байсан 1012 боодол өвс шатаж байжээ. Тус хашаа нь “НИК Петровис” компанийн шатахууны агуулахын хажууд байрласан аж.

Гал сөнөөгчид шуурхай арга хэмжээ авч, 5 цаг гаруй ажиллаж галын тархалтыг зогсоосон байна. Уг ажилд 17 алба хаагч 3 нэгж техникээр үүрэг гүйцэтгэж байгаа.

Гал гарсан шалтгааныг тогтоохоор Цагдаагийн байгууллагын алба хаагчид ажиллаж байна.

Орхон аймгийн Эрүүл мэндийн газраас улирлын томуугийн дэгдэлт болон короновирусийн халдвараас урьдчилан сэргийлэх, хүүхдүүдийн дархлааг дэмжих зорилгоор витаминжуулалтын аяныг эхлүүллээ.

Аяны хүрээнд Орхон аймагт үйл ажиллагаа явуулж буй цэцэрлэгүүдийн 4-5 настнуудыг амин дэмээр хангах юм. Эхний ээлжинд одоо хичээллэж буй 2100 гаруй хүүхдийг хамруулна. Ингэхдээ, эцэг эхийн зөвшөөрлөөр, цэцэрлэгийн эмчийн хяналтад хүүхдүүдийг витаминжуулах юм.

Олон найрлагат витаминыг хэрэглэх хугацаанд өөр витамин уухыг хориглох тул эцэг эхчүүдийг үүнд хяналт тавихыг анхаарууллаа. Энэхүү ажилд орон нутгийн төсвийн 27.8 сая төгрөг зарцуулжээ.

Хөвсгөл аймгийн Эрдэнэбулган сумын нутаг Эгийн голд халиа үүссэний улмаас 33 өрхийн байшин, гэр усанд автжээ. Дуудлагын дагуу тус аймгийн Онцгой байдлын газар, Цэргийн штаб, Мэргэжлийн хяналтын газар, Байгаль орчин аялал жуулчлалын газар, сумын Засаг даргын Тамгын газрын ажилтнууд, орон нутгийн иргэд ажиллаж усанд суусан зургаан автомашиныг татан гаргажээ.

Дорноговь аймгийн Замын-Үүд суманд амины сууцны цонхонд хүн хавчуулагдан нас барсан тухай дуудлага арванхоёрдугаар сарын 24-ны өдрийн 09:27 цагт Цагдаагийн байгууллагад иржээ.

Дуудлагын дагуу аймгийн Онцгой байдлын газрын Замын-Үүд сум дахь Онцгой байдлын хэлтсийн Гал түймэр унтраах, аврах 17 дугаар ангийн алба хаагчид очиход тус тоотын 6х4 метрийн хэмжээтэй байшингийн цонхонд иргэн М /51 настай, эрэгтэй/ хавчуулагдан нас барсан байж. Цогцсыг гарган сум дундын Цагдаагийн хэлтсийн ахлах мөрдөн байцаагчид хүлээлгэн өгсөн талаар ОБЕГ-аас мэдээллээ.