Author: ЭНХТӨРИЙН МӨНХТҮВШИН

Орон нутгийн ээлжит сонгууль ирэх аравдугаар сарын 11-нд явагдана. Аймаг, нийслэл, сум, дүүргийн ИТХ-ын төлөөлөгчдийг сонгох энэ удаагийн сонгуулийн бэлтгэл ажил хэрхэн явагдаж байгаа талаар Нийслэлийн сонгуулийн хорооны гишүүн Ү.Ганболдтой ярилцлаа.

---

-2024 оны орон нутгийн ээлжит сонгуулийн онцлог юу вэ. Нийслэлийн хувьд хэдэн мандат дээр хичнээн тойрогт сонгууль зохион байгуулагдах вэ?

-Монгол Улсын Их Хурлын 2024 оны гуравдугаар сарын 15-ны өдрийн 19 дүгээр тогтоолоор аймаг, нийслэл, сум, дүүргийн ИТХ-ын 2024 оны ээлжит сонгуулийг товлон зарласан. Санал авах өдрийг 2024 оны аравдугаар сарын 11-ний өдөр байхаар тогтоосон. Сонгууль зохион байгуулах эрх зүйн акт нь Аймаг нийслэл, сум, дүүргийн Иргэдийн төлөөлөгчдийн хурлын тухай хууль байгаа. Энэ хуулиар 2020 оны орон нутгийн ээлжит сонгуулийг улсын хэмжээнд зохион байгуулсан. Сонгуулийн хуульд заасны дагуу сонгуулийн товыг зарласнаас хойш бэлтгэл ажлууд хийгдээд явж байна. Юуны өмнө 2024 оны тавдугаар сарын 1-нээс өмнө аймаг, нийслэл, сум, дүүргийн ИТХ-ын сонгуулийн мандат, тойргийг тухайн шатны хурлаас тогтоосон.

Нийслэлийн ИТХ-ын 2024 оны сонгуулийн тойрог, мандатыг нийслэлийн ИТХ-ын дөрөвдүгээр сарын 29-ний өдрийн 65 дугаар тогтоолоор баталсан байгаа. Нийслэл нийтдээ 45 мандаттай. Баянгол дүүрэг зургаан мандаттай нэг тойрог. Баянзүрх дүүрэг гурван мандаттай хоёр тойрог, дөрвөн мандаттай нэг тойрог. Сонгинохайрхан дүүрэг таван мандаттай хоёр тойрог. Сүхаатар дүүрэг дөрвөн мандаттай нэг тойрог. Хан-Уул дүүрэг зургаан мандаттай нэг тойрог. Чингэлтэй тойрог дөрвөн мандаттай нэг тойрог. Багануур дүүрэг хоёр мандаттай нэг тойрог. Багахангай дүүрэг нэг мандаттай нэг тойрог. Налайх дүүрэг хоёр мандаттай нэг тойрог. Нийтдээ 45 мандат, 12 тойрогтой байхаар шийдвэр гарсан. Хуульд заасны дагуу нийслэлийн хэмжээнд сонгууль зохион байгуулах Нийслэлийн сонгуулийн хороог санал авах өдрөөс 70-аас доошгүй хоногийн өмнө НИТХ-аас байгуулсан байгаа. 2024 оны долдугаар сарын 24-ний өдрийн тогтоолоор Нийслэлийн сонгуулийн хороог есөн гишүүний бүрэлдэхүүнтэй байгуулсан. Нийслэлийн сонгуулийн хороо нь хуульд заасан бүрэн эрхийн хэмжээнд есөн дүүргийн сонгуулийн хороодыг сонгуулийн санал авах өдрөөс 60-аас доошгүй хоногийн өмнө байгуулсан. Өөрөөр хэлбэл, наймдугаар сарын 12-ноос өмнө дүүргийн сонгуулийн хороодыг байгуулсан гэсэн үг. Дүүргийн сонгуулийн хороод маань дарга, нарийн бичгийн дарга, таван гишүүн гээд нийтдээ долоон хүний бүрэлдэхүүнтэй байгуулагдсан. Ингээд дүүргийн сонгуулийн хороод наймдугаар сарын 12-ноос өмнө байгуулагдсан байгаа.

-Аймаг, нийслэл, сум, дүүргийн ИТХ-ын сонгуульд хэчнээн нам, эвсэл оролцох хүсэлтээ ирүүлсэн бэ?

-Орон нутгийн сонгуулийн цаг хугацааны хуваарийг СЕХ-ноос баталж хүргүүлсэн. Энэ хуваарийн дагуу нам, эвслүүд орон нутгийн сонгуульд оролцох хүсэлтээ санал авах өдрөөс 60-аас доошгүй хоногийн өмнө тухайн шатны сонгуулийн хороонд хүргүүлэх ёстой. Наймдугаар сарын 11-ний 24:00 цагаар тасалбар болж, нийслэлийн хэмжээнд сонгуульд оролцох нам эвслүүдийн бүртгэлийг хүлээж авсан. Нийслэлийн хэмжээнд нийтдээ Сонгуулийн хуульд заасны дагуу орон нутгийн сонгуульд оролцох нам, эвслүүд хүсэлтээ ирүүлсэн байна. Хуульд заасны дагуу ээлжит сонгууль болох жилийн зургадугаар сарын 25-наас өмнө сонгуульд оролцох нам, эвслүүд мөрийн хөтөлбөрөө төрийн аудитын байгууллагад хүргүүлж, дүгнэлт гаргуулах ёстой. Төрийн аудитын байгууллагаас улс төрийн нам, эвслийн мөрийн хөтөлбөрт дүгнэлт гаргаж, тухайн шатны сонгуулийн хороонд ирүүлнэ. Энэ хүрээнд Нийслэлийн аудитын газраас Нийслэлийн сонгуулийн хороонд сонгуульд оролцох нам, эвслүүдийн мөрийн хөтөлбөрт дүгнэлт хийж ирүүлсэн байгаа. Нийтдээ 18 нам, нэг эвсэл сонгуульд оролцох дүгнэлтийг Нийслэлийн аудитын газраас гаргасан байна. Наймдугаар сарын 11-ндээ багтаагаад НИТХ-ын сонгуульд оролцохоор 15 нам, нэг эвсэл буюу нийтдээ 16 улс төрийн субьект сонгуульд оролцох саналаа хүргүүлээд байна. Мөн сонгуульд оролцох сонгогч иргэдийн шилжих хөдөлгөөнийг сонгуулийн санал авах өдрийн 60-аас доошгүй хоногийн өмнө зогсоодог. Энэ хуулийн зохицуулалтын дагуу нийслэл дэх Улсын бүртгэлийн газраас сонгогчдын шилжих хөдөлгөөнийг наймдугаар сарын 12-ноос эхлэн зогсоогоод байна.

-Нийслэлийн сонгуулийн хорооны хувьд одоо орон нутгийн сонгуультай холбоотой зохион байгуулалтын ямар ажлууд хийгдэж байна вэ?

-Нийслэлийн хэмжээнд сонгуульд оролцохоор саналаа хүргүүлсэн улс төрийн 16 субьектийн бүрдүүлсэн баримт бичгийг хуулийн дагуу нягтлан шалгаж, бид тав хоногтоо багтааж хариу өгөх ёстой. Тухайн нам, эвсэл сонгуульд оролцох эсэх шийдвэрийг Нийслэлийн сонгуулийн хорооноос шийдвэрлэнэ. Мөн есөн дүүргийн сонгуулийн хороодод энэ ажил давхар хийгдээд явж байгаа.

-Нам, эвсэл болон бие даан нэр дэвшигчдийг нэр дэвшүүлэх шийдвэр хэзээ гарах вэ. Сонгуулийн сурталчилгаа хэзээнээс эхлэх билээ?

-Сонгуулийн сурталчилгааны хувьд хуулийн тодорхой зохицуулалттай. Нам, эвслүүд сонгуульд оролцох хүсэлтээ илэрхийлсэн хүсэлтийг хүлээж авснаас хойш тав хоногийн дотор бид хуралдаад тухайн шатны сонгуулийн хороод бүртгэх эсэх шийдвэрийн хариуг өгөх ёстой. Тэгэхээр наймдугаар сарын 16-ны дотор хариугаа өгнө. Ингээд нам, эвслүүд дотооддоо нэр дэвшүүлэх ажиллагаагаа явуулна. Энэ нь наймдугаар сарын 27-ноос эхлээд есдүгээр сарын 2-ны өдрийг дуустал улс төрийн нам эвслүүд нэр дэвшүүлэх үйл ажиллагаагаа эхэлнэ. Мөн бие даан нэр дэвшүүлэх ажиллагааг санал авах өдрөөс 45-аас доошгүй хоногийн өмнө эхлүүлж, долоо хоногийн хугацаанд дуусгах ёстой. Ингээд нэр дэвшигчдийн баримт бичгийг есдүгээр сарын 2-5-ны хооронд тухайн шатны сонгуулийн хороод хүлээж авна. Долоо хоногийн дотор тухайн шатны сонгуулийн хороо тухайн нэр дэвшигчийн баримт бичгийг хүлээн авч нягтлан шалгаад бүртгэх эсэх тогтоол гаргана. Нэр дэвшин үнэмлэх олгох асуудлыг есдүгээр сарын 26-ны өдөр буюу санал авах өдрөөс 15 хоногийн өмнө нэг өдөр олгоно. Тэр нь есдүгээр сарын 26-ны өдөр байгаа. Энэ өдрөөс сонгуулийн сурталчилгаа эхэлнэ.

Сэлэнгэ, Дархан-Уул, Төв аймагт Ардчилсан намаас нэр дэвшиж сонгогдсон УИХ-ын гишүүн С.Эрдэнэболдтой цаг үеийн асуудлаар ярилцлаа.

---

-Анхны 126 гишүүнтэй парламентад сонгогдлоо. Энэ парламент, Засгийн газар бүрэн эрхийнхээ хүрээнд ямар байдлаар ажиллах ёстой, юуг шийдэх шаардлагатай, эрх чөлөө, шударга ёсыг ямар бодлогоор бодитой болгох хэрэгтэй гэж та харж байна вэ?

-Энэ парламент, түүний бүрдүүлсэн хамтарсан Засгийн газраас ард түмэн ихийг хүсэн хүлээж байна. Тэд нийгэмд шударга ёсыг тогтоогоосой, дарга нарт бус иргэдэд үйлчилдэг төрийн албыг бүрдүүлээсэй, авлигатай дүр эсгэсэн маягаар бус жинхэнэ ёсоор тэмцээсэй, ажлын байр ихээр бий болгож, ядуурлыг бууруулаасай гэж хүсч байна. УИХ-ын гишүүний хувьд би сонгогч түмний өмнөөс эдгээр хүсэлтийг нь биелүүлэхийн төлөө бүхнээ зориулж хүчин зүтгэнэ. Нийгэм эдийн засгийн өнөөгийн байдал амаргүй байгаа. Өмнө нь эрх баригчид найман жилийн турш дангаар ноёрхохдоо үндсэндээ хараа хяналтгүй ажилласан гэж хэлж болно. Тэд алдаа их гаргасан, түүний уршгаар байгаа нөөц боломжийг ч алдсан. Алдагдсан боломжийг, алдааг богино хугацаанд засаж, эрчимтэй ажиллахад нь би гишүүний хувьд ард түмний дуу хоолой нь болж ажиллахыг зорино. Ер нь парламентын засаглалтай оронд бид дан гүйцэтгэх засаглалд найдалгүй, УИХ-ын гишүүн бүр нийгмийн хөгжилд өөрийн манлайллаа үзүүлж байж, дээр дурдсан тулгамдсан асуудлыг шийдвэрлэхэд болон улсын хөгжилд өөрийн хувь нэмрээ оруулах ёстой гэж үздэг.

-Та яг энэ зарчмаар ажиллах уу?

-Би энэ зарчмыг баримтална. Өөрөөр хэлбэл, “жирийн л нэг гишүүн” байхыг хүсэхгүй байна. Харин манлайлагч гишүүн байх болно. Үүний тулд бидний хамтын гэр Монгол эх орныхоо үндэсний аюулгүй байдалд аюул занал учруулж буй гадаад, дотоод хүчин зүйлсэд бодитой дүн шинжилгээ хийж, үндэсний аюулгүй байдлын үзэл баримтлал, түүний хууль эрх зүйн орчныг шинэчлэх асуудалд онцгойлон анхаарч ажиллана. Яг нарийндаа Үндэсний аюулгүй байдлын үзэл баримтлал бол Үндсэн хуулийн дараа орох төрийн бодлогын хамгийн чухал бичиг баримт юм. Гэтэл одоогийн мөрдөж буй үзэл баримтлал маань 2010 онд батлагдсанаас хойш даруй 14 жил өнгөрчээ. Гэтэл уг баримт бичигт дэвшүүлсэн нэлээд олон зорилт хэрэгжээгүй, эсвэл хангалтгүй хэрэгжиж байгаад би санаа зовж явдаг. Үүний шалтгаан нь энэ чухал баримт бичгийн хэрэгжилтэд нэг их ач холбогдол өгөлгүй орхисонтой холбоотой болов уу. Үндэсний аюулгүй байдлын үүднээс дотоодод ч шийдэх асуудал байна. Иймд УИХ-ын бусад гишүүдтэй хамтарч энэ асуудлаар санаачилга гаргаж нэлээд ажил төлөвлөж байна.

-Хамтарсан Засгийн газарт зарим иргэд шүүмжлэлтэй хандаж байгаа бол зарим нь нэгдээд ажлаа хийхийг шаардаж байна. Таны хувьд ямар байдлаар хүлээн авч, ямар зарчим баримтлан ажиллах ёстой гэж үзэж байна вэ?

-Миний хувьд Монголын ард түмний язгуур эрх ашгийн үүднээс хамтарсан Засгийн газар байгуулж ажиллахыг дэмжиж хүлээн авсан байгаа. Гэхдээ таны асуусанчлан энд хамтарсан Засгийн газрын үйл ажиллагаанд баримтлах зарчим их чухал гэдгийг онцлон хэлье. Гурван намаас Засгийн газрыг бүрдүүлж байгаа гишүүд маань “нэг хөнжил дотор ороод давхар дээлтэй” амар жимэр хэвтээд байж болохгүй. Хамгийн гол нь хамтарч том төслүүдийг богино хугацаанд үр дүнтэй хэрэгжүүлэх чин эрмэлзлэлтэй байх, авлигаас ангид байх, төрийн дарангуйллыг халж, төрийн албыг шинэчлэх, бизнесийн орчныг эрүүлжүүлэх, баялаг бүтээгчид, хөрөнгө оруулагчдыг дэмжих гээд зарчмуудыг баримталж ажиллах хэрэгтэй байна. Хэрхэхийг цаг хугацаа харуулна. Хэрэв “буруу замаар будаа тээвэл” түүнтэй эвлэрэхгүй.

-Саяны сонгуулиар маш их мөнгө зарцуулагдлаа. Монгол Улсын эдийн засаг өсөлттэй гэж байгаа ч маш эмзэг гэдэг. Байгаагийнх нь хэрээр үрээд байж болохгүй байх л даа. Яаж эдийн засгаа одоо байгаагаас хэд дахин илүү өсгөх вэ?

-Саяхан Монгол Улсын нийгэм, эдийн засгийн байдлыг харуулах хагас жилийн хугацааны статистик гарсныг уншиж танилцсан. Гадаад худалдаа сайн байгаатай холбоотой төсвийн гүйцэтгэл боломжийн, эдийн засаг өсөлттэй, инфляци зорилтот түвшиндээ орсон байна. Гэхдээ үүнийг түр зуурын биш, цаашид тогтвортой өсөлт болгож авч үлдэх нь чухал. Манай улсын эдийн засаг гадаад худалдаа ялангуяа нүүрс, зэсний үнээс шууд хамаардаг. Монгол Улс 2024 оны хагас жилийн байдлаар экспорт 7.9 тэрбум ам.долларт хүрч. Миний санаж байгаагаар дөрвөн жилийн өмнө буюу 2020 оны зургадугаар сард нийт экспортын хэмжээ 2.8 тэрбум ам.доллар байсан. Тэгэхээр манай улс тэр үетэй харьцуулахад гурав дахин их валют олжээ. Энэ оны хагас жилийн импорт 5.4 тэрбум ам.долларт хүрч, тэнцэл 2.5 тэрбум ам.долларын ашигтай гарчээ. Энэ бол чамлах үзүүлэлт биш.

-Чамлахгүй ч бид баярлах болоогүй байлгүй…?

-Манай улсын эдийн засаг эмзэг гэдэгтэй санал нийлнэ. Учир нь Монгол Улсын эдийн засаг нүүрснээс хэт хараат болсон нь санаа зовоож байна. Хэрэв нүүрсний үнэ дэлхийн зах зээл дээр унах, өмнөд хөрш нүүрсний худалдан авалтаа багасгавал манай эдийн засаг хүндэрнэ. Хятадын зах зээл дээрх коксжсон нүүрсний ханш 200 орчимд хэлбэлзэж байна. Манай Монголын нүүрс бусад улстай харьцуулахад хямд, зах зээлдээ ойр, бас Дэлхийн гангийн холбоо 2024 онд дэлхийн гангийн эрэлт өнгөрсөн оныхоос буурахгүй гэсэн мэдээлэл өгсөн болохоор ойрын хугацаанд хүндрэл гарахгүй гэж найдаж байна.

-Эдийн засгаа яаж өсгөх вэ. Энэ тал дээр та ямар бодолтой явдаг вэ?

-Уул уурхайн экспортод гардаг элдэв хүнд суртал, гадаадын хөрөнгө оруулалтад саад болдог байдалд онцгой анхаарах ёстой. Бид зөвхөн Хятад биш, сүүлийн үед эдийн засаг нь эрчимтэй өсөж байгаа Энэтхэгийн зах зээлд нүүрсээ борлуулах, Япон, Солонгос зэрэг орнуудын зах зээлд гарах гарцыг нэн яаралтай нээж чадвал эдийн засаг хэд дахин нэмэгдэх боломж байна. Мэдээж том дүнгээр нь харвал хувийн хэвшлээ дэмжиж, зээлийн хүүг буулгах, ажлын байр олноор бий болгох, төсөв, мөнгөний зөв бодлого хэрэгжүүлэх гээд шийдвэл зохих асуудлууд бол байгаа.

-Хамтарсан Засгийн газрын мөрийн хөтөлбөр удахгүй тодорхой болж, ээлжит бус чуулганаар танилцуулагдах сураг байна. Таны хувьд энэ засаг яг ямар том төсөл, хөтөлбөрүүдээр нэгдэх ёстой гэж бодож байна вэ?

-Гурван нам хамтарч шинэ Засгийн газар бүрдүүллээ. Мэдээж өөр өөрийнхөө мөрийн хөтөлбөрийг хэрэгжүүлнэ гээд гурван тийш чангаах шаардлагагүй байх. Томоохон төслийн хувьд дэд бүтцийн улс орны цаашдын хөгжилд нэмэр болохуйц төсөл хөтөлбөр эхлүүлэх ёстой. Тухайлбал, Эрдэнэбүрэнгийн УЦС энд дурдмаар байна. Бид эрчим хүчээ гаднаас экспортоор авалгүй өөрсдөө бие даан шийдвэрлэх ёстой. Улс орны хөгжлийг эрчим хүчгүйгээр төсөөлөх аргагүй. Гадаад өрийн асуудалдаа анхаарах цаг ирлээ гэж бодож байна. Манай нийт иргэдийн арилжааны банкнаас авсан зээл ганц жилийн дотор 14 их наядаас 19.7 их наяд буюу даруй 5.7 их наяд төгрөгөөр нэмэгдсэн гэх статистик хагас жилийн тайланд харагдсан. Ломбард, ББСБ, хоршоо энэ тэрийг оруулбал бүр их тоо гарах байх. Тэгэхээр улс орноо төдийгүй иргэдийн, өрхийн зээл санаа зовоох асуудал болжээ. Үүнээс гадна, Статистикийн бизнес регистрийн санд 2024 оны эхний хагас жилийн байдлаар бүртгэлтэй 245 мянган хуулийн этгээдийн 40 хувь нь үйл ажиллагаа явуулж, 60 хувь нь үйл ажиллагаа явуулаагүй байна. Энэ бүхэн төсөв, мөнгөний бодлого оновчгүй байгааг харуулж байна. Төр нь бүтээн байгуулалт хийхээс илүүтэй хувийн хэвшилдээ орон зай үлдээх ёстой. Дээр дурдсан асуудлууд Шинэ Засгийн газрын хамгийн түрүүнд хийх ёстой ажил гэж би хэлнэ.

-Удахгүй намрын чуулганаар төсөв хэлэлцэнэ. Жил бүрийн төсөв алдагдалтай батлагддаг. Ер нь Төсвийн шинэчлэл, хуваарилалт, орлого бүрдүүлэлтийг яаж хийх хэрэгтэй вэ?

-Бидний гадаадаас олдог 10 ам.долларын бараг найм нь зэсийн баяжмал, нүүрс хоёрт оногддог. Саяхныг хүртэл зэсийн баяжмал дангаараа экспортын орлогод гол байр суурьтай байсан бол 2005 оны үеэс урд хөршийн эдийн засаг эрчимжихийн зэрэгцээ нүүрс үнэд орж манай экспортын гол бүтээгдэхүүний нэг болсон байдаг. Энэ хоёр бүтээгдэхүүний үнэ ханш дэлхийн зах зээл дээр өндөр байвал эдийн засаг нь өсөж, унавал дагаад унадаг эмзэг эдийн засагтай орны тоонд багтаж байна. Ийм улс орнуудад төсвийн тогтвортой байдал маш чухал. Уул уурхайгаас хараат улс орнуудад төсвийн тогтвортой байдлын арга хэрэгслийг чадварлаг ашиглаж, сахилга баттай байж чадсанаас хөгжлийн өндөр түвшинд хүрсэн байдаг. Ийм улсуудын тоонд Австрали, Канад, Чили, Шинэ Зеланд зэрэг орнууд орно.

-Гэтэл манайд тэр бодлого нь хангагдаж чадахгүй байгаа байлгүй?

-Сүүлийн жилүүдэд Монгол Улсын төсөв хоёр их наядын алдагдалтай баталдаг болсон. Энэ хэмжээгээр гадаад өр нэмэгдэж байгаа. Тэгэхээр Төсвийн тогтвортой байдлын тухай хуульд заасан дөрвөн тусгай шаардлагыг чанд мөрдөх ёстой. Сүүлийн жилүүдэд энэ нь тас орхигдсон асуудал. Ялангуяа нэгдсэн төсвийн тэнцвэржүүлсэн тэнцэл нь тухайн төсвийн жилийн дотоодын нийт бүтээгдэхүүний хоёр хувиас илүүгүй алдагдалтай байх болон Засгийн газрын өрийн өнөөгийн үнэ цэнээр илэрхийлэгдсэн үлдэгдэл нь тухайн жилийн оны үнээр тооцсон дотоодын нийт бүтээгдэхүүний 60 хувиас хэтрэхгүй байх гэсэн хоёр чухал заалтыг чанд мөрдөх ёстой. Мөн төсөвт элдэв зардал нэмж хувийн хэвшлийнхээ орон зайг булаадаг асуудалд цэг тавимаар байна. Өөр нэг чухал асуудлыг хөндөхгүй байж боломгүй байна. Төсвийн хөрөнгө оруулалтын үр ашгийг анхаарах ёстой. Олон жил дамнан өртөг нь өсдөг. Хэт өндөр мөнгөн дүнтэй мөртлөө иргэдийн амьдралд наалдахгүй олон төсөл хөтөлбөр төсөвт орж ирдэг. Энэ бүхнийг засаж залруулахын төлөө ажиллана гэж бодож байна.

-Саяхан 21 настай иргэн амиа алдсан. Ар гэрийнхэн нь хүүгийнхээ амиа алдсан шалтгааныг Монголын цагдаагаас асууж, нэхэж байна. Ер нь цагдаа аливаа гэмт хэрэгт холбогдох тохиолдол эрс нэмэгдсэн. Энэ салбарт юу болохгүй байна вэ, таны хувьд шинэчлэл хийх шаардлага байна гэж харж байгаа юу?

-Энэ талаар би Дэд хороон дээр байр сууриа тодорхой илэрхийлсэн. Хүний эрх, эрх чөлөөг хангах ардчиллын суурь зарчмын үүднээс цагдаа, хууль хяналтын байгууллагуудыг эрс шинэчлэх хэрэгтэй байна. Цагдаа нар ч арга барилаа өөрчилмөөр юм.

-Аж ахуйн нэгж, хувийн бизнес эрхлэгчдээ дэмжих талаар саяны сонгуульд өрсөлдсөн нам, эвсэл бүхэн мөрийн хөтөлбөртөө оруулсан байсан. Таны хувьд өнөөгийн Монголын бизнесийн орчин ямар байна, цаашлаад яаж өөрчлөх шаардлага гэж харж байна вэ?

-Ний нуугүй хэлэхэд, бизнесийн үйл ажиллагааг төрөөс дэмжихээс илүү чөдөр тушаа болох нь их. Бизнес эрхлэгчдийг дэмжихгүй юм гэхэд ядаж үйл ажиллагаанд нь саад тотгор учруулахгүй байвал тэр нь дэмжлэг болох юм. Энэ талаар хийх ажил их бий. Би ч цаашид анхаарч ажиллах болно.

-Та түрүүн гадаад өрийн асуудлыг ярьсан. АН-ын хувьд сонгуулиас өмнө эрх баригчдад гадаад өртэй холбоотойгоор нэлээд хурц шүүмжлэлийг тавьж байсан. Одоо өөрсдөө Засгийн танхимд багтаж ажиллаж байна. Гадаад өрийн асуудлаа энэ бүрэн эрхийн хугацаанд нэгдээд багасгаж чадах уу?

-Аливаа улсын гадаад өрийн хэмжээ өсвөл инфляци нэмэгдэж, ажилгүйдэл өсөх, хадгаламж буурч, төсөв, мөнгөний бодлогод сөргөөр нөлөөлөх төдийгүй улс орны эдийн засаг болон тусгаар тогтнолд аюул учрах эрсдэл агуулдаг. Гадаадад төлөх өрийн төлбөр улсын хатуу валютын нөөцийг шавхаж, бүхэлдээ эдийн засагт чөдөр тушаа болдог. Зээлийн төлбөрийг дахин зээл авч санхүүжүүлэх нь ирээдүйн орлогоосоо хумсалж байгаа нэг хэлбэр. Өөрөөр хэлбэл, ирээдүй хойч үеэ эдийн засгийн өсөлтөөс хүртэх боломжийг хязгаарлаж байгаа явдал. Монгол Улсад ойрын ирээдүйд хэт их өрийн дарамтаас гарах хүнд зорилт хүлээж байгаа. Энэ бүхэн төсвийг алдагдалгүй төлөвлөх, уул уурхайн баялгаас авах татвар хураамжийн зөв тогтолцоонд анхаарах, гадаадын зээл тусламжийг зөв зүйтэй төсөлд зориулах, хөрөнгийн зардлыг бууруулах, бүх шатны төсвийн зарцуулалтын үр ашгийг дээшлүүлэх зэрэг цогц арга хэмжээ авах ёстой гэж бодож байна.

-Татварын дарамт их байгаа. Ажиллаж байгаа хүн болгон энэ дарамтад өртөж байна гэдэг. Яаж татварын орчинг эрүүл, шударга болгох вэ?

-Татварын дарамт их байгаа учраас аж ахуйн нэгжүүд хаалгаа барьж байгаа талаарх тоог би түрүүн хэлсэн. Нөгөө талаас өрх бүр олон сая төгрөгний өртэй байгаа статистик нь татварын дарамт өндөр байгааг харуулах үзүүлэлт юм. Хүмүүс дур зоргоороо тэр татварыг тэглэнэ, энэ татварыг үгүй болгоно гэж ярьдаг. Нөгөө талаас Татварын Ерөнхий газар манай улс татварын хэмжээ бага улс орны тоонд ордог гэж тайлбарладаг. Миний зүгээс маш нарийн тооцоо судалгаа хийх ёстой гэж үздэг. Тухайлбал, өнөөдрийг хүртэл НӨАТ төлдөггүй аж ахуйн нэгжүүд, хувь хүн байсаар байна. Тиймээс яаж нийтээрээ татвараа төлдөг болох вэ. Шинээр байгуулагдсан аж ахуйн нэгжүүд эхний нэг, хоёр жилдээ татвараас чөлөөлөгдөх, ажлын байр олноор бий болгож буй аж ахуй нэгжүүдэд татварын хөнгөлөлт эдлүүлэх, тансаг хэрэглээний татвар нэмэгдүүлэх гэх зэргээр цогц арга хэмжээг тооцоо судалгаанд үндэслэн нэн даруй авах цаг ирсэн.

-Монгол Улс авлига, ардчиллын индексээрээ хойшоо ухарсаар байгаа. Энэ чиглэлд ямар бодлого үйл ажиллагаа явуулж байж бид урагшлах вэ?

-Саяхан би УИХ-ын гишүүн Ц.Тувааны хамтаар хэд хэдэн төрийн өмчит үйлдвэрийн газраар орлоо. Төрийн өмчит газрууд байнгын хардлагад байдаг. “Цавчаа”, “шахаа” татвар төлөгчдийн мөнгө, нийгмийн баялгийг дээрэмдсэн тухай олон түүхүүд бид сонссоор ирсэн. Ерөөсөө авлигыг бууруулах эхний алхам бол ил тод байдал. Бүх мөнгөний урсгал шилэн байхыг бид газар сайгүй хэвшүүлэх хэрэгтэй. Мөнгө бүхэн мөртэй. Сүүдрийн эдийн засгийг аль болох багасгах, шийдвэр гаргалтад дарга нарын, хувь хүний үзэмж, субьектив нөлөөллийг багасгаж байж авлига буурна. Эрх мэдэл, албан тушаалаа урвуулан ашиглах, мэдээлэлд ойр байгаадаа дулдуйдаж бусдаас давуу тал эзэмших бүх гарцыг үгүй хийх сонгодог арга бол ерөөсөө л ил тод байдал шүү дээ.

-Эрдэнэт үйлдвэрийн хувьд асуудал ямар байна вэ?

-Эрдэнэтийн үйлдвэр жишээ нь худалдан авалт, тендерийн үйл явцаа хиймэл оюун ухаанд суурилсан программаар хийдэг болж байна лээ. Энэ бол маш зөв. Дээр нь орж гарч буй мөнгөн урсгалаа бүхэлд нь шилэн болгох алхмууд хийсэн байна лээ. Ийм зөв жишгүүдийг бүх төрийн өмчит газар дээр хэрэгжүүлэх шаардлагатай. Энэ талаар би холбогдох шийдвэр гаргагч нарт хандахаар бэлтгэж байгаа. Ерөөсөө нийгмийн суурь, итгэлцэл, шударга ёсны үнэ цэнийг нурааж байдаг зүйл бол авлига, хээл хахууль. Нүдэн дээр улс орны өрсөлдөх чадвар ухарч, олон улсын судалгаагаар улам муу дүн аваад байхад бид юу ч болоогүй юм шиг, бас юу ч хийхгүй байж болохгүй шүү дээ.

-Таны хувьд газар тариалангийн бүс нутгаас сонгогдсон хүн. Удахгүй намрын ургац хураалт эхэлнэ. Энэ жилийн хувьд улаанбуудай тариалсан хүн асар бага байна. Ихэнх нь рапс ургуулж. Энэ байдал нь цаашдаа Монгол Улсын хүнсний аюулгүй байдалд нөлөөлөх үү. Импортын улаанбуудайг хориглох бус татвараас хөнгөлснөөр дотоодын тариаланчдад асар том цохилт ирсэн юм биш үү?

-Үнэнийг хэлэхэд, Засгийн газар энэ шийдвэрээ эргэж харах шаардлагатай. Улаан буудайнаас гадна цемент дээр ч бас алдсан гэж үзэж байгаа. Судалгаа, тооцоолол, ирээдүйд гарах үр дүнг нь дутуу тооцсон алхам. Монгол Улсын өрсөлдөх чадварыг авч явж байгаа дотоодын үйлдвэрлэл, хувийн хэвшлээ хамгаалахын оронд асар хүнд байдалд оруулж байгаа шийдвэр. Яаралтай алдаагаа засах хэрэгтэй гэж үзэж байгаа.

Улс төр судлаач Б.Ариунбаяртай АНУ-ын Төрийн нарийн бичгийн дарга Энтони Блинкений айлчлалын талаар ярилцлаа.

---

-Саяхан манай улсад АНУ-ын Төрийн нарийн бичгийн дарга Энтони Блинкен богино хугацаанд хүрэлцэн ирээд буцлаа. Тэрбээр бүс нутгийн улс орнуудаар айлчилж яваа. Энэхүү айлчлалуудынх нь гол зорилго нь юу бол?

-Америкийн нэгдсэн улс Ази тивд онцлон анхаарах болсныг олон улсын харилцааны хүчний шилжилттэй холбож харах нь зүйтэй байх. Сүүлийн 30 гаруй жил олон улсын харилцаанд нэг туйлт систем тогтсон. Тэр систем дэх манлайлагч, жанжлагч нь АНУ байсан. Дэлхий дахинд яригдсан асуудал бүрд голлох үүрэгтэй оролцож, үндсэндээ дэлхийн цагдаагийн үүрэг гүйцэтгэх болсон. Гэтэл сүүлийн жилүүдэд Ази тивээс дэлхийн нөлөө бүхий тоглогчид төрөн гарч байна. Ялангуяа манай урд хөрш болох БНХАУ олон туйлт систем тогтоох тухай идэвхтэй ярьж, улс төр, эдийн засаг, геополитикийн нөлөө нь ч нэмэгдэж байна. АНУ мэдээж манлайлал, жанжлалаа хадгалахын тулд БНХАУ-ын нөлөөг хязгаарлах сонирхолтой байгаа нь илт харагдах болсон. Энэ бодлого Жо Байдены үед эхэлсэн юм биш. Барак Обама анх 2009 онд Ази, Номхон далайд дахин тэнцвэржүүлэх бодлого зарласан.

Дональд Трамп Хятадтай худалдааны дайн өрнүүлж, БНХАУ нөлөөг хязгаарлах бүс нутгийн яриа хэлэлцээг дэмжиж, Энэтхэг-Номхон далайн стратегийг баталсан. Жо Байден ч мөн Хятадын нөлөөг хязгаарлах бодлогыг үргэлжлүүлж, бүс нутгийн түнш болон уламжлалт холбоотнуудтайгаа харилцаагаа хөгжүүлж байна. Зөвхөн БНХАУ-аас гадна Азид улс хоорондын газар нутгийн маргаан, Солонгосын хойгийн цөмийн аюул гээд цөөнгүй асуудал байна.

–АНУ-ын Төрийн нарийн бичгийн дарга гэдэг тухайн улс орондоо ямар эрх мэдэлтэй хүн байдаг вэ. Гадаад бодлогоо 100 хувь тодорхойлоод, хоёр улсын хамтын шийдвэр гаргахад улс орноо бүрэн төлөөлж чадахаар эрх мэдэлтэй хүн үү гэж олон хүн сонирхон асууж байна лээ. Энэ талаар та тодруулахгүй юу?

-Төрийн нарийн бичгийн дарга гэдэг бол АНУ-ын гадаад бодлогод ямар ч эргэлзээгүйгээр туйлын чухал хүн. Бусад орнуудтай дүйцүүлж тооцвол Гадаад хэргийн сайд. Гэхдээ эрх мэдэл, шийдвэр гаргалтад оролцох байдлаараа бусад салбарыг удирдаж буй хүмүүсээсээ илүү. Ер нь АНУ-ын гүйцэтгэх засаглалын гол хүмүүсийн нэг. Улсаа олон улсад төлөөлнө. АНУ-ын гадаад бодлого ч далайц нь том тул түүнийгээ дагаад Төрийн нарийн бичгийн даргын эрх мэдэл ч их. Тиймээс эрх мэдэл, гадаад бодлого зэрэгт нөлөөлөх хамгийн чухал хүн гэж ойлгох хэрэгтэй.

-АНУбол Монгол Улсын хамгийн том, хамгийн өргөн хүрээнд харилцах боломжтой гуравдагч хөрш. Гуравдагч хөршийн бодлогыг ч энэхүү айлчлалын үеэр онцлон ярилцсан. Ер нь энэ улстай манай улс ямар түвшинд харилцаатай байдаг вэ. Харилцааны түвшингээ ямар болгохыг зорьдог юм бол?

-Бидний гадаад бодлогод сүүлийн жилүүдэд гарсан томоохон ахиц нь гуравдагч хөршүүдийнхээ заримтай стратегийн түншлэлийн түвшинд харилцах болсон явдал. Тэр дунд АНУ мэдээж чухал байр суурь эзэлнэ. Анх гуравдагч хөршийн бодлого манай бодлогын баримт бичгүүдэд албажин тусаж, нэр томьёо нь төлөвшихөд ч АНУ-ын Төрийн нарийн бичгийн дарга Бэйкер, Олбрайт нарын айлчлал чухал нөлөөлсөн. Бидний хувьд аль нэг эвсэл холбоонд нэгдэхгүй байх бодлоготой. Тиймээс стратегийн түншлэлийн харилцаагаа улам бэхжүүлээд, гол нь бодит ашиг сонирхлыг нь татах, эдийн засгийн үр ашигтай хамтын ажиллагааг хөгжүүлэхэд анхаарах нь чухал байна.

-Айлчлалын үеэр ямар асуудлууд хэлэлцэж, яг юу, юу шийдчихээд буцав. Айлчлалын гол үр дүн юу байв?

-Улс төрийн талаасаа бол хоёр талын харилцаа өндөр түвшинд байгааг нотолсон нь энэ айлчлал болон долдугаар сард манай Гадаад харилцааны сайдын АНУ-д хийсэн айлчлалын үр дүн. Түүнээс гадна Ерөнхий сайдын АНУ-д хийсэн айлчлалын үеэр тохиролцсон зарим асуудлыг урагшлуулахад энэ айлчлал чухал үүрэг гүйцэтгэлээ. Олон чухал гэрээ, хэлэлцээрийн дотроос АНУ Монгол Улсад Англи хэлний багш бэлтгэхэд дэмжлэг үзүүлэх асуудал байлаа. Бид өнгөрсөн онд англи хэлийг хоёрдогч хэл болгох асуудлыг нийтээрээ хэлэлцэж байсныг санаж байгаа байх. Үүний цаана боловсон хүчний асуудал бий. Үүнийг шийдэхэд АНУ-тай хамтран ажиллах нь чухал хөшүүрэг болно гэсэн үг.

–Америк бол Ардчиллын эцэг орон. Манай улсад ардчилал бий болоод гуч гаруй жил болж байгаа. Тэгэхээр ардчиллын эцэг орны төлөөлөл, төр засгийн удирдлагууд манай улсад айлчлах нь ардчиллын дархлааг бий болгох нөлөөтэй гэж харж болох уу?

-АНУ-Монгол Улсын харилцаа хурдацтай хөгжсөний хөшүүрэг нь манай ардчилсан өөрчлөлт, шинэчлэл байсаар ирсэн. Анх 1990 онд АНУ-ын Төрийн нарийн бичгийн дарга Бэйкер Монгол Улсад айлчилж байлаа. Тэд ч манай ардчиллыг хамгаална, дэмжинэ, бэхжүүлнэ гэдгээ ил тодоор мэдэгддэг. Даян дэлхийд ардчиллыг түгээхэд ч анхаардаг. Мэдээж таны хэлснээр АНУ бол ардчиллын үлгэр жишээ орон. АНУ төдийгүй Ази, Европын ардчилсан, өндөр хөгжилтэй харилцах нь манай ардчиллыг бэхжүүлэхэд мэдээж тустай.

-Ер нь Монгол Улсын хувьд АНУ-тай харилцаагаа илүү өргөжүүлэх нь мэдээж эдийн засгийн хувьд эерэг нөлөөлтэй байна. Харин геополитик талаасаа ямар нэгэн сөрөг нөлөөлөл үүсэх үү. Учир нь манай хоёр хөршийн хувьд АНУ-тай харилцаа тааламж энэ цаг үед сайнгүй байгаа шүү дээ…?

-Үгүй гэж харж байна. Бид 1994 онд анхны гадаад бодлогын үзэл баримтлалаа батлахдаа ч, 2011 онд шинэчлэн батлахдаа ч гадаад бодлогын чиглэлээ тодорхой заасан байдаг. Бидний хувьд хоёр их хөрштэйгөө тэнцвэртэй харилцах нь гадаад бодлогын тэргүүлэх чиглэл, гуравдагч хөршийн бодлого бол удаахь чиглэл. Бид энэ бодлогоо тууштай баримталж байгаа. Их гүрнүүдийн харилцаа хүйтрэх, дулаарах ямар ч үе үүссэн бид өөрсдийн тодорхойлсон чиг шугамаа л дагаж байгаа. Тэгэх ч ёстой. Мэдээж их гүрнүүдийн зүгээс бидэн рүү чиглэсэн шахалт ирнэ. Магадгүй манай гадаад бодлогыг хумих гэж оролдоно. Гэхдээ бид тэр бүхнийг давж олон тулгуурт гадаад бодлогоо үргэлжлүүлэх нь манай ашиг сонирхол.

-Нэг үеэ бодоход Монгол Улсад дэлхийн томоохон улс орнуудын удирдлагууд айлчлах нь эрс нэмэгдсэн байна. Үүгээрээ дэлхий биднийг сонирхож байна гэж ойлгож болох уу. Нэг хэсэг айлчлал гэхээр Монгол Улс тусламж, мөнгө төгрөг гуйх гэж байна гэдэг нүдээр хардаг байсан гэлцдэг. Одоо бол харилцан ашигтай хамтын ажиллагааг гадаад бодлогодоо голлож барьж байгаа байх, тийм үү?

-Манайх руу чиглэсэн өндөр, дээд түвшний айлчлалын давтамж эрс нэмэгдэж байгаа нь мэдээж нэн түрүүнд ярилцлагын эхэнд дурдсан олон улсын харилцааны системийн шилжилттэй шууд холбоотой. Их гүрнүүд жижиг улсуудыг өөртөө татахыг оролдож байна. Нөгөө талаас нь харвал манай улсын 30 гаруй жил баримталсан нээлттэй, олон тулгуурт, энхийг эрхэмлэсэн гадаад бодлогын үр дүн. Үнэхээр таны хэлсэнчлэн урьдын адил гуйдаг, тусламж авдаг байдлаасаа татгалзах гэсэн оролдлого манай шийдвэр гаргагчдаас гарч байж болох юм. Нэг үеэ бодвол манай эдийн засаг ч дээрдлээ. Үүнийгээ дагаад гадаад бодлогын агуулга ч өргөжиж байна.

АНУ-ын Төрийн нарийн бичгийн дарга Энтони Блинкен Гадаад харилцааны сайд Б.Батцэцэгийн урилгаар Монгол Улсад албан ёсны айлчлал хийхээр өчигдөр манай улсад хүрэлцэн ирээд буцлаа. Энэ нь АНУ-ын Төрийн нарийн бичгийн даргын түвшинд Монгол Улсад найман жилийн дараа хэрэгжиж буй айлчлал юм. Э.Блинкен айлчлалынхаа үеэр Монгол Улсын Ерөнхийлөгч У.Хүрэлсүх болон Ерөнхий сайд Л.Оюун-Эрдэнэ нарт бараалхаж, Гадаад харилцааны сайд Б.Батцэцэгтэй албан ёсны хэлэлцээр хийлээ. Уулзалт, яриа хэлэлцээний үеэр талууд Монгол Улс, Америкийн Нэгдсэн Улсын Стратегийн гуравдагч хөршийн түншлэлийн харилцааг өргөжүүлэн бэхжүүлэх талаар мөн бүс нутаг, олон улсын харилцан сонирхсон асуудлаар санал солилцов. Тодруулбал, Монгол Улс, АНУ-ын Стратегийн гуравдагч хөршийн түншлэлийн харилцааг өргөжүүлэн хөгжүүлэхийн төлөө буйгаа нотлоод өнгөрөгч сард АНУ-ын Вашингтон хотноо зохион байгуулагдсан Иж бүрэн стратегийн яриа хэлэлцээний үеэр яригдсан зүйлүүдийг ажил хэрэг болгох талаар дэлгэрэнгүй санал солилцож, дараахь тохиролцоонд хүрэв. Мөн Монголын англи хэлний багш нарыг мэргэшил дээшлүүлж, чадавхжуулах мэргэжлийн төвийг Улаанбаатар хотноо нээхээр тохиролцов. Түүнчлэн Монгол Улс, АНУ-ын Эрчим хүчний яриа хэлэлцээг энэ онд Улаанбаатар хотноо зохион байгуулж, сэргээгдэх эрчим хүчний салбарт хамтран хэрэгжүүлэх төсөл, хөтөлбөрийн талаар санал солилцохоор болов. Мөн 2020 онд байгуулсан Монгол Улс, АНУ хоорондын “Хүүхэд хамгааллын түншлэлийн компакт гэрээ”-г 2025 он хүртэл сунгахаар шийдвэрлэв.

Дараа нь Гадаад харилцааны сайд Б.Батцэцэг, АНУ-ын Төрийн нарийн бичгийн дарга Э.Блинкен нар албан ёсны хэлэлцээний дүнгээр хэвлэл мэдээллийн төлөөлөгчдөд хамтарсан мэдээлэл хийв.

Энэ үеэр Гадаад харилцааны сайд Б.Батцэцэг: -Манай улсын хувьд хоёр гүрний дунд, далайд гарцгүй, ардчилсан тогтолцоог сонгосон улс. Бидний хувьд энэ тогтолцоонд шилжээд 30 гаруйхан жилийн туршлагатай ард түмэн. Хоёр хөрштэйгөө бид мөнхийн эв найрамдалтай байхыг эрмэлзэж явдаг. Бидний харилцааны түвшин хамгийн оргил үедээ хүрсэн.

Монгол Улсын хувьд хоёр хөрштэйгөө иж бүрэн стратегийн түншлэлийг хэрэгжүүлж байгаа. Монгол Улс гуравдагч хөршийн бодлого гэдэг нэр томьёог гаргаж ирсэн цагаас хойш яг энэ цаг үед жинхэнэ утгаар нь өндөр хөгжүүлж байгаа гэж хэлж болно. Гуравдагч хөршүүдийн тухайд бид эдийн засгийн, худалдааны хамтын ажиллагаагаа шинэ шатанд гаргах, үргэлж харилцан ашигтай хамтын ажиллагааны төлөө явахаа ил тод ярина. Эдгээр зарчмаар гуравдагч хөршийн бодлогоо бид хэрэгжүүлж байгаа. Тэр дундаа АНУ-д ажиллаж, амьдарч, сурч байгаа Монгол Улсын иргэн маш олон байдаг. Ихэнх нь энэ улсад шинэ технологи, шинэ бизнес, шинэ хандлагад суралцаж байдаг. Энэ утгаараа АНУ-ын Төрийн нарийн бичгийн дарга ноён Э.Блинкен сайд бид хоёр худалдаа эдийн засгийн хамтын ажиллагаагаа өргөжүүлэх, жинхэнэ бодит хамтын ажиллагаа эхлүүлэх, АНУ-ын хөрөнгө оруулагчдыг Монголд оруулж ирэх, орчныг нь бүрдүүлэх чиглэлээр баримт бичигт гарын үсэг зурлаа. Өөрөөр хэлбэл, АНУ-ын хөрөнгө оруулалтын богино хугацаанд олон салбарт оруулах чиглэлээр хамтарч ажиллахаар боллоо. Монгол Улсын хувьд НҮБ-ын гишүүн бүх орнуудтай дипломат харилцаа тогтоосон. Бүх улс оронтой эв найрамдалтай зэрэгцэн орших ийм олон тулгуурт, нээлттэй, бие даасан гадаад бодлогыг явуулдаг. Цаашид Монгол, АНУ-ын хоорондын хөрөнгө оруулалт, худалдаа, эдийн засаг эрчимтэй нэмэгдэж, харилцан ашигтай хамтын ажиллагаа идэвхтэй явагдана гэдэгт бид итгэлтэй байна.

АНУ-ын Төрийн нарийн бичгийн дарга Э.Блинкен: -Энэ жилээс АНУ-аас Монгол Улсад орж ирэх хөрөнгө оруулалт эрс нэмэгдэнэ. Энэ нь Монгол Улсын хувьд өөрсдийнхөө гол гол салбаруудыг хөгжүүлэх, эдийн засгийн тэсвэртэй байдлыг бий болгох ач холбогдолтой. Түүнээс гадна шинэ боломж, шинэ ажлын байрыг бий болгоно гэдэгт итгэлтэй байна. Энэхүү айлчлалын хүрээнд хатагтай Б.Батцэцэг сайд бид юу ярьсан бэ гэхээр ерөөсөө худалдаа, эдийн засгийн хамтын ажиллагаагаа илүү яаж хөгжүүлэх вэ, бодитойгоор яаж нэмэгдүүлэх үү гэдэг чиглэлээр ярилцлаа. Монгол Улсын хувьд эрчим хүчний салбар, газрын ховор элемент, ашигт малтмал зэрэг салбарт хөрөнгө оруулалт чухал байгааг ярилцлаа. Үүнээс илүүтэйгээр бид бүхний хамгийн анхаарах ёстой чиглэл бол хөрөнгө оруулалтын орчинг сайжруулах. Энэ чиглэлээр бид бас хамтарч ярилцлаа. Хөрөнгө оруулалтын хувьд манайд дандаа хувийн сектороор дамжиж явагддаг. Тиймээс энэ чигийн хөрөнгө оруулагчдыг оруулж ирэхийн тулд орчин нөхцөлөө маш сайн бүрдүүлэх, тэр дундаа хувийн хэвшлийн чиглэлд илүүтэй нөхцөлийг нь сайжруулах нь чухал. Манай улсын хувьд бусад улс орнуудын хамгийн чухал, хамгийн шаардлагатай гэсэн салбар луу хөрөнгө оруулалт хийж чаддаг. Хөрөнгө оруулалт ямар ч хэлбэрээр орж болно. Бидний хувьд тухайн улсдаа өр бий болгохоос болгоомжилдог. Хамгийн чухал нь тухайн улс орны эдийн засгийг идэвхжүүлэх чиглэлд анхаардаг. Энэхүү бодлогоор бид улс оронтой хамтарч ажилласнаараа аль аль талдаа ашигтай гэж үздэг. Өнөөг хүртэл явж ирсэн хоёр улсын харилцаа хамтын ажиллагааг дараагийн шатанд бид яаж гаргах вэ гэдгээ энэхүү айлчлалын үеэр маш сайн ярилцлаа. Цаашдаа Монгол Улсын Засгийн газартай бид энэ чиглэлээр илүү идэвхтэй ажиллах болно. Миний хувьд Монгол Улсын Ерөнхийлөгч У.Хүрэлсүх болон Ерөнхий сайд Л.Оюун-Эрдэнэ нарт бараалхсан. Ингэхдээ энэ чиглэл, энэ зарчмаараа мөн үргэлжлүүлэн ярилцсан байгаа. Манай хоёр улсын хувьд нөөц бололцоо асар их байгааг бид аль аль талдаа мэдэж байгаа. Монгол Улсын иргэдийн хувьд боловсролын түвшин өндөр орон. Үүнийг улам илүү нэмэгдүүлэх, хувь хүний хөгжлийг дээшлүүлэх, чадавхыг нь нэмэгдүүлэх чиглэлд тодорхой салбаруудад хамтран ажиллахаар болсон. Тухайлбал, багш, оюутан нарын англи хэлний чадавхыг нэмэгдүүлэх чиглэлээр тусгай хөтөлбөр боловсруулж ажиллахаар боллоо. Гадаад харилцааны сайд Б.Батцэцэгийн хувьд ердөө долоо хоногийн өмнө Вашигтонд айлчлах үеэрээ нэг зүйлийг онцлон хэлсэн. Тэр бол Монгол Улс англи хэлийг илүү өргөн хүрээнд хүртээмжтэй сургах чиглэлээр хамтран ажиллах саналтай байгаагаа хэлж байсан. Харин өнөөдөр энэхүү асуудал шийдлээ олж байна. Ердөө долоохон хоногийн дотор тодорхой сэдэв, салбарын хүрээнд саналаа солилцоод шийдлээ олж байна гэдэг бол их чухал. Цаашид бусад салбар, бусад төсөл хөтөлбөр дээр энэ мэт бодитой шуурхай шийдвэр, гарц гаргалгаа, харилцан ашигтай хамтын ажиллагаа илүү өрнөөсэй гэж хүсч байна. Англи хэлийг улам төгс, төгөлдөр эзэмшсэнээрээ бизнес болон бусад зүйлд бүтээмжтэй байх болно. Тиймээс энэ чиглэлд Монгол Улстай гар нийлэн ажиллах болсондоо баяртай байна.

Дараа нь АНУ-ын Төрийн нарийн бичгийн дарга Э.Блинкен сэтгүүлчдийн сонирхсон асуултад товч хариуллаа.

-Энэ бүс нутгийн хувьд Хятад улс дангаараа хүчирхэг оршиж байгаа. Нөгөөтэйгүүр Хятад улс бол Монгол Улсын мөнхийн найрсаг хөрш. Тэгэхээр энэ бүс нутгийн аюулгүй байдлыг Хятад улсын гадаад бодлогод нөлөөлөхгүйгээр яаж хамгаалах бодлого барьж ажиллах вэ?

-Эдийн засаг талаас нь би эхлээд хариулъя. Энэ бүс нутгийн улс, орнуудын хоорондын эдийн засаг, худалдаа маш чухал. Үүнд бидний хувьд дэмжиж оролцоно. Тэгэхээр юу гэхээр энэ зууны хамгийн чухал худалдаа бол цахим эдийн засаг байгаа. Манай улсын хувьд цахим эдийн засаг асар чухал нөлөөтэй байдаг. Эдийн засаг, худалдаагаа цахимжуулах чиглэлд бид Номхон далайн орнуудын эдийн засгийн хамтын ажиллагааны шугамаар үүнийг авч хэрэгжүүлнэ. АСЕМ-ийн улс орнуудаар айлчлах явцдаа гадаадын хөрөнгө оруулалт ямар чухал болохыг ажигласан. Дэлхийд гадаадын хөрөнгө оруулалтаараа АНУ тэргүүнд явдаг. Түүнээс гадна манай улсын хувьд өөрсдөө хөрөнгө оруулалтыг хүлээж авдаг орон. Хөрөнгө оруулалтын хувьд итгэл дээр суурилж явагддаг. Итгэл байхгүй бол хөрөнгө оруулалт явагддаггүй. Тиймээс энэ бүс нутгийн хувьд итгэл бий болгосон орчноо бүрдүүлэх хэрэгтэй. Хятадын нөлөө энэ бүс нутагт явагдаж байгаа, түүнд нөлөөлөхгүйгээр яаж аюулгүй байдал чиглэлд ажиллах вэ гэж асуулаа. Энэ бүс нутаг нээлттэй, ил тод, хараат бус байх ёстой. Бидний хувьд улс орон болгоны нөөц бололцоо ямар байна түүнийг нь нэмэгдүүлэх, өөрсдийнх нь хөгжих боломжийг дэмжиж өгөх чиглэлд гол бодлого, зорилтоо дэвшүүлэн хамтарч ажиллахаа илэрхийлж ирсэн. Энэ зарчмаараа цаашдаа явах болно. Ирээдүй ямар байх вэ гэдэг дээр нийтлэг эрх ашгийн төлөө бид ажиллана. Улс орон болгон өөрийнхөөрөө шийдвэр гаргах, өөрийнхөөрөө сонголтоо хийх эрхтэй байх ёстой. Бид энэ эрхийг нь хүндэтгэнэ. Бас хамгаална. Хятад, АНУ хоорондын харилцаа маш хариуцлагатай, маш өндөр түвшинд байх ёстой гэдгээ би айлчлал болгондоо хэлдэг. Хоёр улсын хувьд тодорхой хэмжээний өрсөлдөөн бий. Бидний хувьд өрсөлдөөнийг эрүүл үзэгдэл гэж боддог. Хамгийн чухал нь энэхүү өрсөлдөөн шударга, ил тод, нээлттэй л байх хэрэгтэй. Энэ чиглэлд л бид анхаарах ёстой юм. Дэлхийн тэргүүлэх гүрнүүдийн хувьд бид хамтын ажиллагаатай байх ёстой. Манай улсын хувьд Үнийн өсөлтийн эсрэг хууль гаргасан байгаа. Энэхүү хуулийн хэрэгжилт дэлхий даяар мэдрэгдэж, нөлөөлж байна.

Улс төр судлаач Б.Эрдэнэбулгантай ээлжит бус чуулган болон Засгийн газрын мөрийн хөтөлбөрийн талаар ярилцлаа.

---

–Наймдугаар сар гарах гэж байхад шинээр байгуулагдсан төр, засаг ажлаа хийхгүй байна. Ард түмэнтэйгээ нийлээд найр, наадам хэсээд яваад байна гэсэн шүүмжлэл их байна. Үүнд та ямар бодолтой явдаг вэ?

-Ер нь жилийн жил Улсын наадмын дараагаас наймдугаар сарыг хүртэл төрийн ажил амарч, улс төрийн үйл явц амс хийх төлөв байдалтай байдаг. Энэ жил ч тэр л дүр зургаар явж байна. Өнгөрсөн зургаадугаар сарын сүүлийн хагаст УИХ-ын сонгууль, долдугаар сарын эхэнд Засгийн газар байгуулах гэсэн хоёр том “улс төрийн тулааны” дараа улс төрч бүхэн сэргэлт авахын тулд зуны амралтаа авцгаасан байх. Мөн энэ жил хөдөө орон нутагт олон сумдын түүхт 100 жилийн ойн арга хэмжээний болж байна, Үүгээр дамжуулж УИХ-д сонгогдсон гишүүд нь талархал илэрхийлэх, баяр тэмдэглэх үйл явц өрнөж байгаа бол, нөгөө талдаа анхан дунд шатны улс төрчид намрын орон нутгийн сонгуульдаа бэлдэх үйл явцад дэмнэх, дэмжих зорилготой оролцож байгаа байх. Нөгөөтэйгүүр хүн төрөлхтний цэнгэлийн манлай болсон олимпын наадам яг энэ цаг дор Франц улсын Парис хотод зохион байгуулагдаж байна. Улс орноо төлөөлж Ерөнхийлөгч оролцож байгаа, мөн түүнийг дагалдаад баяр цэнгэлд оролцохын зэрэгцээ улс төрийн дараагийн өрөгт хэрхэн оролцохоо тооцоолж яваа УИХ-ын гишүүн, улстөрчид байхыг ч үгүйсгэхгүй. Харин Засгийн газарт шинээр томилогдсон болон сэлгэн томилогдсон сайд нар ажилтайгаа танилцах, өөрийн бодлого шийдвэрээ хэрэгжүүлэхэд ач холбогдолтой ажил, албан тушаалд өөрийн намын болон итгэлтэй хүмүүсээ байршуулах “чухал” ажилтай байгаа гэж бодож байна.

-Жил болгон л намжуу байдаг гэж та хэллээ. Нэг тийм асуудалгүй улсад амьдарч байгаа мэт л амгалан байцгааж байх шиг санагдах юм…?

-Дээр хэлсэнчлэн сар хүрэхгүй хугацаанд буюу УИХ-ын сонгуулийн сурталчилгаа эхэлснээс Засгийн газар байгуулагдах хооронд ирэх дөрвөн жилд улс орны бодлогыг тодорхойлж, түүнийг хэрэгжүүлэх улс төрийн голлох тоглогчдыг сонгож, томилох улс төрийн дахин хуваарилалт явагдаж өнгөрлөө. УИХ дахь эрх мэдлийг хуваалцсан, Засгийн газарт идэвхтэй, нөлөөтэй байх сөрөг хүчнээ урвуулж ажилд авсан үйл явцаас дүгнэхэд УИХ- ын 2024 оны сонгуульд үзэгдэхүйц, үнэлэхүйц ялагч тодорсонгүй. Тиймдээ ч МАН нь АН, ХҮН-ыг хавсаргах хамтрахыг хослуулж, эвсэх элсүүлэхийг зэрэгцүүлсэн “стандарт бус буюу Үндсэн хуулийн бус” арга замаар Засгийн газраа байгууллаа. АН, ХҮН-ын удирдлага, дарга нар ч Засгийн газарт орж сөрөг хүчин хийнэ гэсэн логик гаргалгаа муутай, лоозогносон хангалтгүй хариултыг тус хоёр намд саналаа өгсөн 589.617 сонгогчид өглөө.

-Хамтарсан Засгийн газрын улс төрийн ирээдүйн боломж нь ямар байхаар ажиглагдаж байна вэ?

-Засгийн газрын бүрэлдэхүүнд орж ажиллаж байгаа АН, ХҮН удирдлагын үйл ажиллагаа нь намын гишүүд болон иргэд, сонгогчдод хэр итгэл үнэмшил төрүүлж, дэмжлэг авахаас МАН, АН, ХҮН-ын хавсайдсан Засгийн газрын цаашдын үйл ажиллагаа хамаарах болов уу гэж таамаглаж байна. Энэхүү стандарт бус, Үндсэн хуулийн бус хамтрал нь тус гурван улс төрийн намын цаашдын төлөвшил, институт болж хөгжих үйл явцад асар их уршигтай, ухралт авчирна. Тэр тусмаа АН, ХҮН-д.

Энэ гурван хүчин наадмын өмнө хамтарч, улмаар мөрийн хөтөлбөрөө нэгтгэх ажлаа эхлүүлсэн. Ерөнхий сайдын хувьд 30 хоногийн дотор мөрийн хөтөлбөрөө нэгтгээд УИХ-д танилцуулах талаараа хэлсэн. Тэгэхээр ээлжит бус чуулган зарлагдана гэсэн үг, тийм үү. Энэхүү ээлжит бус чуулганаар хамтарсан мөрийн хөтөлбөрөөс гадна өөр ямар асуудлыг хэлэлцэх бол?

-Л.Оюун-Эрдэнэ Монгол Улсын 33 дахь Ерөнхий сайдаар энэ сарын 5-ны өдөр томилогдсон. Харин Засгийн газраа 10-ны өдөр байгуулж, сайд нараа УИХ-д тангараг өргүүлсэн. Л.Оюун-Эрдэнийн Засгийн газрын 30 дахь хоног нь наймдугаар сарын 9-ний өдөр тохиох бол, 100 дахь хоног нь аравдугаар сарын 18-ны өдөр тохиох юм байна. Уг цаг хугацаанаас анзаарахад аль алинд нь төсөв хэлэлцээд л таарна. Наймдугаар сарын дундаас өмнө УИХ-ын ээлжит чуулган зарлаж төсвийн тодотгол, эвслийн гэрээ, Засгийн газрын үйл ажиллагааны хөтөлбөр батална гэсэн мэдээллийг УИХ-ын болон Засгийн газрын зүгээс албан бусаар өнгөрсөн хугацаанд өгч. Дээрх гурван бичиг баримтаас бодитоор хэлэлцэх боломжтой нь Монгол Улсын 2024 оны төсөвт нэмэлт, өөрчлөлт оруулах хуулийн төсөл буюу 2024 оны Төсвийн тодотгол л байна.

-Эвслийн гэрээний тухайд та юу хэлэх вэ?

-Эвслийн гэрээний хувьд, энэ сарын 24-ний өдөр хуралдсан Засгийн газрын хуралдаанаар “Алсын хараа 2050”, “Шинэ сэргэлтийн бодлого”, Улсын Их Хурлын 2024 оны сонгуульд МАН, АН, ХҮН намуудаас дэвшүүлсэн мөрийн хөтөлбөр болон Монгол Улсын хөгжлийн тулгамдсан асуудал, сорилтууд тулгуурласан
“Хурдтай хөгжлийн төлөөх зориг” гэсэн нэр бүхий хамтарсан Засгийн газрын гэрээний төслүүдийг ЗГХЭГ ын дарга Н.Учрал танилцуулсан. Тус гэрээг Засгийн газарт багтсан гурван намын хооронд ойрын хугацаанд байгуулах төлөвлөгөөтэй байгаа юм байна. Энэ гэрээ нь нам хооронд байгуулагдах учир АН, ХҮН-ын төлөөллийн болон шийдвэр гаргах тодорхой институтээр хэлэлцүүлэн дэмжүүлэх шаардлагатай байгаа. Харамсалтай нь АН-ын дарга Л.Гантөмөр, ХҮН-ын дарга Т.Доржханд нар УИХ-ын сонгуулийн дараа, УИХ-ын Анхдугаар чуулганы хооронд тус тусын намын албан ёсны институтээр хангалттай хэлэлцүүлэг өрнүүлж, бодит дэмжлэг авалгүйгээр Засгийн газарт орцгоосон. Одоо үүнийгээ зөвтгөж, дэмжүүлэхээр зүтгүүлэхийн тулд аль аль намдаа ихээхэн саадтай тулгарч, цаг хугацаа шаардана. Тэгэхээр Засгийн газрын бал сар буюу 30 хоногт амжихгүй. Хэрэв хүч түрж, хэлэлцүүлэг өрнүүлэлгүй гэрээнд гарын үсэг зурвал аль аль нь намдаа дэмжлэгээ алдаж намын даргын суудлаа ч алдах эрсдэлтэй.

-Улс төр судлаач хүнийхээ хувьд ажиглаж байхад энэхүү Хамтарсан Засгийн газрыг олон нийт, ард түмэн ямаршуу байдлаар хүлээн авч байх шиг байна. Ард түмний хувьд хамтрах эсэх нь хамаагүй, ажлаа хий гэдэг зүйлийг л хэлж байна уу?

-“Ажл аа хий” гэдэг үг яагаад ч юм Л.Оюун-Эрдэнэ гэдэг улстөрчийг дагаж явах юм. УИХ-ын 2024 оны ээлжит сонгуулиар иргэд, сонгогчид хэн нь ямар ажил хийх ёстой вэ гэдгийг саналаараа хангалттай хуваарилаад өгсөн. МАН-д УИХ-ын 126 суудлаас 68-ыг нь өгч олонх болгосон. Ерөнхий сайдаа томилж, Засгийн газраа байгуулах бүрэн эрхийг өгсөн. АН-ын хувьд 42 суудал буюу УИХ-ын 33 хувийг бүрдүүлсэн хүчтэй сөрөг хүчин байх эрх мэдлийг өгсөн. Өнгөрсөн хоёр УИХ-ын хугацаанд МАН-ын байгуулсан дөрвөн Засгийн газрын үйл ажиллагааг үнэлж дүгнээд, одоо байгуулах Засгийн газрыг нь хянах хариуцлагатай үүргийг хүлээлгэсэн. Харин ХҮН, ИЗНН, ҮЭ-ийг УИХ-д суудал бүхий олон ургалч үзлийг илэрхийлж, олон түмний нүд чих нь байх чиг үүргийг хуваарилсан. Харамсалтай нь МАН-ын дарга Л.Оюун-Эрдэнэ, АН-ын дарга Л.Гантөмөр, ХҮН-ын дарга Т.Доржханд нар иргэд сонгогчдын итгэл үнэмшил, сонголт шийдвэрийг мушгин гуйвуулаад өөр өөрийн явцуу эрх ашигт тулгуурлаад “стандарт бус, Үндсэн хуулийн бус” Засгийн газрыг байгууллаа. Дээрх Засгийн газраа байгуулахдаа ч тогтсон улс төрийн үнэт зүйл, үйл явц, логик дарааллыг дагасангүй.

–Улсын төсөвт тодотгол хийх нь ойлгомжтой байх. Яг ямар тодотгол яаж оруулж ирэхээр байх шиг байна. Төсвийн хуулийн өөрчлөлттэй холбоотойгоор олон хууль орж ирж батлагддаг…?

-Төсвийн тухай хуулийн 34 дүгээр заалтын дагуу Засгийн газар нь таван тохиолдолд тухайн жилийн төсвийн тодотголын төслийг боловсруулж, УИХ-д өргөн мэдүүлдэг. Энэ Засгийн газрын хувьд төсвийн ерөнхийлөн захирагч хооронд төсвийн зохицуулалт хийх буюу Засгийн газрын бүрэлдэхүүнд байгаа сайд нар болон, сайд нарын эрхлэх чиг үүрэг, асуудал, агентлаг зэрэг нь өөрчлөгдсөнтэй хол боотойгоор төсвийн тодотгол хийх шаардлага гарч байх шиг байна. Ер нь улсын төсөв зарцуулах эрх мэдэл, хэр хэмжээ нь өөрөө тухайн Засгийн газрын бодлогын хувьд анхаарал хандуулж буй салбар, асуудлыг илэрхийлэхээс гадна тухайн сайдын улс төрийн эрх мэдэл, нөлөө, улс төрийн хамаарлыг илтгэж байдаг. Энэ удаад Засгийн газарт АН-ын нэрээр томилогдсон найм, ХҮН-ын өмнөөс томилогдсон хоёр сайдын багцад хэрхэн, хэр хэмжээний төсөв, хөрөнгийг хуваарилахаас МАН болон түүний дарга Л.Оюун-Эрдэнийн бодлого чиглэл тод харагдах болов уу. Тэр тусмаа УИХ-ын сонгуульд МАН-ын дэвшүүлсэн мөрийн хөтөлбөрийн үндсэн цөм заалтууд болох Баялгийн сан, 20 минутын хот, Авлигыг бууруулах, Боловсролын реформ зэрэг зорилтуудыг хэрэгжүүлэх яамнуудаа бүгдийг нь АН, ХҮН-д хуваагаад өгчихсөн байна. Тэгэхээр эдгээр мөрийн хөтөлбөрийн зорилго, зорилт нь МАН-ын хувьд амин чухал байсан эсэх нь эдгээр яамнуудад бодлогыг хэрэгжүүлэх төсөв, хөрөнгө оруулалтыг хэрхэн хуваарилахаас шууд харагдана. Төсвийн хуулийг дагуулж төрийн бүтцийг ихээхэн өөрчлөх, төрд нэмэлтээр чиг үүрэг, ажил нэмэх зорилготой хуулийн төслүүдийг оруулж ирэх буруу жишгийг 2021- 2024 онд МАН хангалттай тогтоочихсон. Энэ жишгээ уламжлах нь уу гэдэг асуултад 2024 оны төсвийн тодотголоос илүүтэйгээр 2025 оны төсөв хариулт өгөх болов уу.

-Яг өнөөгийн Монгол Улсад гарц шийдэл, шийдвэр, эрх зүйн орчноо хүлээж байгаа хамгийн тулгамдсан ямар салбар, ямар асуудал байна вэ. Тэрхүү асуудлыг шийдэхийн төлөө энэ 126, Засгийн газар ажиллаж чадах болов уу?

-УИХ-д шинэхэн сонгогдсон гишүүд, Засгийн газрын сайд нар маань өөр өөрийнхөөрөө л улс орны өмнө нэн тулгамдаад буй асуудлуудыг томьёолж, тодорхойлж байна. Тэдгээрээс илүү давтамжтай, давамгай дурдагдаж буй нь эрчим хүчний салбар, түүний шинэчлэл, эрчим хүчний үнэ чөлөөлөх, эрчим хүчний эх үүсвэрийг нэмэгдүүлэх гэсэн эрчим хүч тойрсон асуудлууд байна. Миний хувьд ирэх дөрвөн жил УИХ-ын гишүүд, улс төрийн намууд, Засгийн газар анхаарал хандуулж ажиллах ёстой асуудлын нэг нь Монгол Улсын засаг захиргааны шинэчлэл, түүний удирдлага зохион байгуулалт, тэр дундаа нутгийн өөрөө удирдах ёс, нутгийн өөрөө удирдах ёсны байгууллага, цаашлаад орон нутаг нь зөв зохион байгуулалтад орж санхүүгийн, төсвийн хувьд бие даасан эдийн засгийн цогцолбор болж хөгжих эхлэлийг тавиасай гэж хүсч байна. Монгол Улсын 21 аймгийн төв, томоохон сумууд бүгд өөрийн гэсэн арга зам, хэлбэрээр эдийн засгийн хувьд“ томорч байж” улс орон хөгжинө. Тэр гарцаа олох, хөгжүүлэх боломжийг нь олгосон засаг захиргааны шинэчлэл нэн шаардлагатай байна.

-Намар аравдугаарсарын 1-нд намрын ээлжит чуулган эхэлнэ. Зэрэгцээд улс төр, нийгэм, эдийн засгийн амьдрал буцална. Энэ намрын улс төр ямар байх вэ? Гол яригдах асуудал бол ирэх жилийн улсын төсөв байх.

-Ер нь манай улсын хувьд улс орныхоо өмнө тулгараад буй асуудал бүрийг ил гаргаж ирж хэлэлцэж, бодлогоо уралдуулах талбар нь дөрвөн жил тутамдаа УИХ-ын сонгууль. Харин жил бүр улсын төсөв батлах үе буюу жил бүрийн аравдугаар сарын сүүлийн, арваннэгдүгээр сарын эхний хагас байдаг. Төсөв УИХ-аар хэлэлцэн батлах үед асуудлаа зөв зүйтэй, зохион байгуулалттай, зорилгоо зоригтой илэрхийлж чадсан салбар болон сонирхлын бүлэг ирэх жилийн төсвөөр дамжуулж асуудлаа шийдвэрлүүлж чаддаг. Энэ жил ч гэсэн мөн адил 2025 оны Улсын төсвийн хэлэлцүүлэг өргөн хүрээнд болох болов уу, тэр тусмаа анхлан сонгогдсон 80 гаруй гишүүд ямар байр суурьтай байж, бодлогын ямар асуудлыг олны анхаарлын төвд авч ирэх нь сонирхолтой бас хүлээлттэй байна. Мөн энэ намрын хувьд шат шатны ИТХ-ын ээлжит сонгууль болно. Тэр тусмаа Бүсчилсэн хөгжлийн концепт тодорч гарч ирсэн энэ үед аймгийн, сумын, нийслэл, дүүргийн сонгуулийн хөндөх сэдэв, хэлэлцэх асуудал нь өргөн хүрээтэй байх болов уу гэж харж байна. Тэр дундаа НИТХ-ын сонгуульд нийслэл улаанбаатарчууд илүүтэй анхаарал хандуулж, Улаанбаатар хотын асуудалд шийдэл эрэлхийлсэн хэлэлцүүлгийг орон нутгийн сонгуулиар дамжуулж хөндөөсэй гэж хүсч байна.