Month: October 2024

Монгол Улсын Ерөнхий сайд Л.Оюун-Эрдэнэ Аймаг, нийслэл, сум, дүүргийн Иргэдийн Төлөөлөгчдийн хурлын 2024 оны ээлжит сонгуульд Баянзүрх дүүрэгт саналаа өглөө.

Тэрбээр “УИХ-ын сонгуулиар Монгол Улс анх удаа 126 төлөөлөлтэй, эмэгтэйчүүдийн төлөөлөл 25-аас дээш хувьтай, олон намын төлөөлөл бүхий Ази тивдээ онцлог, дэвшилттэй парламент байгуулсан. Парламентын сонгууль бол бодлогын сонголт. Орон нутгийн сонгууль таны амьдралд илүү ойрхон шийдвэрүүд гардаг сонголт гэж ойлгож болно. Өөрийнхөө амьдралд ойр бодитой, прагматик сонголт хийгээсэй гэж бодож байна” гэв. Ерөнхий сайд иргэд, сонгогчид, залуучуудыг сонгуульд идэвхтэй оролцохыг уриаллаа.

Монгол Улсын Ерөнхийлөгч Ухнаагийн Хүрэлсүх Туркменистан Улсад хийж буй төрийн айлчлалын хүрээнд тус улсын ард түмний үндэсний удирдагч, Туркменистаны Халк Маслахат-ын дарга Гурбангулы Бердымухамедов-той уулзлаа.

Ерөнхийлөгч Ухнаагийн Хүрэлсүх Монгол Улс Төв Азийн улс орнууд, түүний дотор Туркменистан Улстай харилцан ашигтай худалдаа, эдийн засгийн хамтын ажиллагааг өргөжүүлэн хөгжүүлэхийн төлөө буйгаа илэрхийлэв.

Мөн Монгол Улсын Ерөнхийлөгчийн хувиар Туркменистан Улсад анх удаа төрийн айлчлал хийж, Туркменистан Улсын хөгжил цэцэглэлт, ард түмний ахуй амьдралтай ойр дотно танилцаж буйдаа сэтгэл хангалуун байгаагаа тэмдэглэв.

Талууд энэхүү төрийн айлчлал нь Монгол, Туркменистаны харилцааны эрх зүйн үндсийг бэхжүүлж, харилцаа, хамтын ажиллагааг шинэ агуулгаар баяжуулах болон хоёр улсын ард түмний найрамдал, нөхөрлөлийг бэхжүүлэхэд жинтэй хувь нэмэр оруулна гэдэгт итгэлтэй буйгаа илэрхийлэв.

Туркменистаны Халк Маслахат буюу Ардын зөвлөл нь үндсэн хуулийн дээд эрх мэдлийг хэрэгжүүлэгч бие даасан байгууллага юм.

Халк Маслахат нь Үндсэн хууль, бусад хуулиудад нэмэлт, өөрчлөлт оруулах, төрийн дотоод, гадаад бодлогын үндсэн чиглэлийг хэлэлцэх бүрэн эрхтэй байгууллага юм.

Монгол Улсын Их Хурлын дарга Д.Амарбаясгалан өнөөдөр (2024.10.11) аймаг, нийслэл, сум, дүүргийн Иргэдийн төлөөлөгчдийн хурлын 2024 оны ээлжит сонгуульд саналаа өглөө.

Энэ удаагийн ээлжит сонгуулиар улсын хэмжээнд 10 нам, нэг эвсэл, бие даагч нарын 17 278 нэр дэвшигч 8031 мандатын төлөө өрсөлдөж байна.

УИХ-ын дарга Д.Амарбаясгалан “2024 оны УИХ-ын ээлжит сонгууль анх удаа бүсчилсэн тойргоор явагдаж, бүсчилсэн хөгжлийг хэрэгжүүлэхээр УИХ,  Засгийн газар ажиллаж байна. Энэ ажлынхаа үр дүнг бий болгоход орон нутгийн сонгууль чухал. Улс орны хөгжлийн бодлого УИХ, Засгийн газрын түвшинд яригддаг бол аймаг, орон нутаг, хот, дүүргийн хөгжлийн бодлого ИТХ-аар дамжин хэрэгждэг. Тиймээс иргэд өөрсдийг нь төлөөлөн ажиллах төлөөлөгчөө сонгохдоо идэвхтэй оролцоно гэдэгт итгэж байна” гэлээ.

Улсын бүртгэлийн ерөнхий газар, Сонгуулийн ерөнхий хороо хамтран гаргасан дүн мэдээгээр улсын хэмжээнд нийтдээ 2 246 164 иргэн саналаа өгнө. Сонгуулийн санал хураалт 20:00 цагт дуусах юм хэмээн Улсын Их Хурлын Хэвлэл мэдээллийн газраас мэдээллээ.

Аймаг, нийслэл, сум, дүүргийн Иргэдийн Төлөөлөгчдийн Хурлын сонгуулийн санал хураалт үргэлжилж байна.

Өчигдөр 21 аймаг, есөн дүүргийн 2,230 хэсэг дээр 19,468 иргэн зөөврийн битүүмжилсэн хайрцгаар саналаа өгөх хүсэлт ирүүлснээс 18,617 иргэн саналаа өгөөд байна.  Одоогоор Багануур 9.3 хувь, Налайх 8.1 хувьтай хамгийн өндөр ирцтэй явж байна.

Нийслэлийн хэмжээнд 12:00 цагийн байдлаар сонгогчдын ирц 15,7 хувь буюу 157 мянган хүн саналаа өгөөд байна.

Одоогоор,

• Багахангай 25 хувь
• Багануур 20,3 хувь
• Налайх 17,9 хувь
• Сүхбаатар 16,7 хувь
• Сонгинохайрхан 15,4 хувь
• Баянзүрх 15,3 хувь
• Чингэлтэй 15,2 хувь
• Хан-Уул 14,9 хувь

Аймаг, нийслэл, сум, дүүргийн ИТХ-ын сонгууль улс орон даяар үргэлжилж байна.

Энэ удаагийн ИТХ-ын сонгуульд саналаа өгсөн иргэдийн хуруун дээр бэхэн тэмдэглэгээ хийхгүй, мажоритар системээр явагдана.

Орон нутгийн сонгуулиар 2393 тойрогт ард түмнийг төлөөлөх 8155 мандатын төлөө өрсөлдөхөөр байгаа юм.