ЭМД-ын шимтгэл төлөлтийн статистик мэдээллийг танилцуулж байна. Өнгөрсөн долоо хоногт буюу 2024 оны аравдугаар сарын 5-10-ны өдрийн 14:00 цагийн байдлаар:
И-баримт гар утасны аппликейшнээр 5009 иргэн, 5328 удаагийн гүйлгээгээр нийт 320.5 сая төгрөгийн шимтгэл төлжээ.`
И-Монголиагаар 992 иргэн, 1090 удаагийн гүйлгээгээр нийт 62.9 сая төгрөгийн шимтгэл төлсөн байна.
Өнөөдөр Олон улсын охидын өдөр бөгөөд 2012 онд энэхүү өдрийг тэмдэглэж байхаар НҮБ-аас тунхагласан юм.
НҮБ-ын Хүүхдийн сангаас гаргасан статистик мэдээллээр дэлхийн 20-24 насны бүсгүйчүүдийн гуравны нэг нь хүчээр айлын эхнэр болж тэднийг 15 нас хүрээгүй байхад нь эрд гаргасан байдаг аж. Мөн 20-49 насны эмэгтэйчүүдийн 41 хувь буюу 400 сая нь 18 нас хүрээгүй байхдаа айлын эхнэр болсон байдаг гэнэ. Ийм тохиолдол ихэвчлэн Өмнөд Азид /46 хувь/, Африкийн Сахарын цөлөөс урагш орших орнууд /37 хувь/, Латин Америк болон Карибын тэнгисийн сав газрын орнуудад /29 хувь/ бүртгэгдсэн байна.
Харин Европын Холбоо болон Тусгаар улсуудын хамтын нөхөрлөлийн орнуудад ийм тохиолдол 11 хувьтай байдаг аж. Насанд хүрээгүй эмэгтэйтэй гэрлэхийг НҮБ-ын гишүүн 193 орны 103 нь хоригложээ. Гэсэн ч жил бүр 10 сая охид, бүсгүйчүүд насанд хүрээгүй байхдаа хүчээр гэр бүлийн амьдралаа эхлэхэд хүрдэг байна. Зарим оронд охидоо найман нас хүрэнгүүт хүний эхнэр болгох явдал өнөөдөр ч байсаар байгаа аж.
Татвар төлөхөөс зайлсхийх зорилгоор үйл ажиллагаагаа явуулсан гэмт бүлэглэлийг илрүүлэн шалгаж байна. Татварын ерөнхий газрын ажилтан нь урьд татварын байгууллагад ажиллаж байгаад халагдсан иргэдтэй бүлэглэн Монгол Улсын төсөв бүрдүүлэлт, засгийн аюулгүй байдалд нөлөөлөхүйц их хэмжээний татвар төлөхөөс зайлсхийх зорилгоор хуурамч аж ахуй нэгж үүсгэн байгуулж, 300 орчим аж ахуйн нэгжид 470 орчим тэрбум төгрөгийн хий бичилт бүхий санхүүгийн баримтыг хуурамчаар үйлдсэн зохион байгуулалттай гэмт бүлгийг цагдаагийн байгууллагаас илрүүлэн шалгаж байна.
Тус бүлэглэл нь 2018 оноос хойш үйл ажиллагаагаа эрчимтэй явуулж, их хэмжээний хууль бус орлого олж улсад ногдох татварын хэмжээг бууруулан, татвар төлөхөөс зайлсхийж, мөнгө угаах гэмт хэргийг тогтмол үйлдэж байсан нь мөрдөн шалгах ажиллагааны явцад илэрснийг үргэлжлүүлэн шалгаж байна.
Монгол улсын Эрүүгийн хуулийн тусгай ангийн 18.3 дугаар зүйл /Татвар төлөхөөс зайлсхийх/-д татвар төлөгч хувь хүн, хуулийн этгээдийн удирдах, гүйцэтгэх албан тушаалтан татвар төлөхөөс зайлсхийх зорилгоор их хэмжээний татвар ногдох орлого, эд хөрөнгө, бараа үйлчилгээг зориуд худал тодорхойлсон, нуусан бол дөрвөн зуун тавин нэгжээс таван мянга дөрвөн зуун нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас нэг жил хүртэл хугацаагаар зорчих эрхийг хязгаарлах ял шийтгэнэ” гэж заасан байдаг.
Энэ жилийн Нобелийн Утга зохиолын шагналын эзнээр Өмнөд Солонгосын зохиолч Хан Кан тодорсныг энэхүү нэр хүндтэй шагналыг олгодог Шведийн академи өчигдөр зарлалаа. Ийнхүү Хан Кан Нобелийн Утга зохиолын шагналыг гардан авсан анхны ази эмэгтэй болж түүхэнд бичигдэж байна. Мөн энэхүү шагналыг хүртсэн 18 дахь эмэгтэй юм.
1970 онд төрсөн Хан Кан 1993 оноос уран зохиолыг сонирхож эрчимтэй уран бүтээл туурвиж эхэлсэн. 2007 онд “Цагаан хоолтон” номыг нь бичсэн нь дэлхийн уран зохиолын өв санд томоохон шинэчлэл хийсэн онцлох бүтээл болсныг утга зохиол судлаач, шүүмжлэгчид дүгнэдэг.Энэхүү зохиол нь түүний хувьд англи хэлнээ орчуулагдсан анхны бүтээл боловч асар их амжилт дагуулж 2016 онд International Booker Prize олон улсын шагналыг анх удаа эх орондоо авчирч байжээ. Хан Канг “Цагаан хоолтон”-оос гадна “The White book”, “Human acts” зэрэг бүтээлийг туурвисан нь хүний бие мах бодь, сэтгэл зүй, оюун санааны хоорондын холбоо хамаарлыг өвөрмөцөөр илэрхийлсэн онцгой ач холбогдолтой хэмээн үнэлэгддэг.
Шведийн Академийн Нобелийн хороон дарга Андерс Олссон “Хан Канг бие ба сүнс, амьд ба үхэгсдийн хоорондын уялдаа холбоог өвөрмөц ухамсарлаж, яруу найргийн болон туршилтын хэв маягаараа орчин үеийн зохиолд шинийг санаачлагч болсон” хэмээн онцлон тэмдэглэжээ.
Зохиолч Хан Нобелийн шагналтан болсноо мэдэх үедээ оройн хоолоо идэж байсан бөгөөд ихэд гайхаж бас талархалтай хүлээн авсан тухайгаа “”Ройтерс” агентлагт ярьжээ. Сонирхуулахад, түүний аав Хан Сьён Вон мөн алдартай зохиолч аж.
Эх сурвалж: zms.mn
Улаанбаатар-Мандалговь чиглэлийн хатуу хучилттай авто замын 138-131 км-т зорчих хэсгийн нүхэн эвдэрлийг халуун асфальтбетоноор нөхөх ажил хийгдсэн байна.
“Аймаг, нийслэл, сум, дүүргийн иргэдийн Төлөөлөгчдийн Хурлын ээлжит сонгууль орон даяар үргэлжилж байна.
Улсын хэмжээнд нийт сонгогчдын 35.4 хувь нь саналаа өгөөд байна.
АНУ-ын Флорида мужийг дайран өнгөрсөн хар салхины улмаас 20 гаруй хүн амь насаа алдсан ба 100 тэрбум ам.долларын хохирол учруулжээ.
Өнгөрсөн лхагва гарагт Милтон нэртэй хар салхи АНУ-ын Флорида мужийг дайран өнгөрч 20 гаруй хүн амь насаа алдаж, 3 сая оршин суугч тог цахилгаангүй болсон нь мянган жилд нэг тохиолдох үзэгдэл ба хамгийн хүчтэй хар салхины 4 түвшний шуурга шуурчээ.
Ундны усны 30 гаруй шугам хоолой эвдэрсэн ба нийт хохиролын хэмжээг урьдчилсан байдлаар 100 тэрбум ам.долларын хохирол учруулсан байгаа талаар мэдээлжээ.
Эрэн хайх, аврах ажиллагаанд 6500 алба хаагчид үүрэг гүйцэтгэж байна
Өнгөрсөн 2023 оны үер болон энэ зуны хүчтэй борооны улмаас Улаанбаатар хотын үерийн хамгаалалтын зарим даланд эвдрэл үүссэн. Тиймээс нийслэлийн Засаг даргын өгсөн үүрэг чиглэлийн дагуу нийт есөн байршилд үерийн хамгаалалтын даланг үе шаттай засварлаж байна. Энэ талаар ГУББГ-ын дарга Б.Бямбасайханаас тодрууллаа.
Тэрбээр “Баянзүрх дүүргийн 13 дугаар хороо “Сүнжин Гранд”-ын хойно байрлах үерийн хамгаалалтын босоо түшиц хана өнгөрсөн зуны үерийн улмаас нурсан. Уг хэсэгт 40 метр өндөр, 30 метр өргөн, 20 см зузаан босоо түшиц ханыг барьж, ажил 90 хувьтай үргэлжилж байна. Улаанбаатар хотын хэмжээнд энэ жил нийт есөн байршилд үерийн хамгаалалтын даланг засварлаж, зарим байршилд шинээр барьж байгаа. Бид далангийн ажлуудыг хүйтрэхээс өмнө буюу арваннэгдүгээр сарын 10-наас өмнө дуусгахаар шуурхай ажиллаж байна” гэв.
Мөн энэ жилдээ үерийн байгууламжийн ажлуудыг бүрэн дуусгахгүй бол ирэх хаврын шар усны үерийн үеэр нэмж эвдрэх эрсдэлтэй. Тэгвэл засвар үйлчилгээнд ч зардал их орох учраас аливаа эрсдэлээс сэргийлж энэ ондоо багтааж ажлуудыг дуусгахыг албаны хүн онцолж хэллээ. Үргэлжлүүлэн Соёмботой хөшөөний хойно, Энхтайвны гүүрний доод талд, 25 дугаар эмийн сангийн хойд талд, Ганц худаг, Бөмбөгөр худалдааны төвийн ойролцоох үерийн далангуудыг яаравчлан засаж, шинэчилж байгаа аж.
“Намрын Хит-2024” тоглолтын тов зарлагджээ.
Тоглолтод Төрийн соёрхолт Д.Сосорбарам, МУАЖ дуучин А.Долгор, МУАЖ дуучин С.Ганзориг, МУГЖ дуучин Ч.Бат-Эрдэнэ, МУГЖ дуучин Ж.Уранчимэг, МУГЖ дуучин Б.Батболд, МУГЖ дуучин У.Далантай, , МУГЖ Дуучин С.Эрдэнэцэцэг, МУГЖ дуучин Ч.Амаржаргал, СТА дуучин Н.Мөнгөншагай, СТА дуучин Л.Нарантуяа, хос дуучид А.Анхбаяр Б.Чанцалдулам, дуучин Д.Эрдэнэсувд, Бор Мэндээ, дуучин Б.Бат-Энэрэл нар оролцох юм.
“Намрын хит-2024” нийтийн дуучдын нэгдсэн тоглолт энэ сарын 20-ны өдөр 19:00 цагаас UB паласын концертын их танхимд болно.
10-р сарын 10-нд Хятадын ГХЯ-ны хэвлэлийн төлөөлөгч Мао Нин хэвлэлийн бага хурал хийжээ. Энэ үеэрээ: “Саяхан АНУ-ын Төрийн нарийн бичгийн даргын орлогч Кэмпбелл Карнегийн Энх тайвны сангийн онлайн семинарын үеэр хэлсэн “Америк уналтад орсон гэж Хятад улс үзэж байна , “хүч чадлаа харуулж, АНУ-ыг дэлхийн тавцангаас зайлуулах” хүслээ Хятад улс улам бүр харуулж байна. Өмнө нь АНУ болон бусад улс орнууд дэлхий даяар “үйлдлийн систем” байгуулахад хамгийн их ашиг хүртэж байсан улс нь Хятад байсан, харин одоо Хятад улс энэхүү “үйлдлийн систем”-ийн үндсэн цөмийг өөрчлөхийг хүсч байна. Америк, Хятадын харилцаа олон талаараа “өрсөлдөөнөөр удирдуулсан” шинэ шатанд орлоо гэсэн. Үүнд Хятад улс ямар тайлбар өгч байна вэ?” гэсэн сэтгүүлчийн асуултад
Мао Нин: “Америкийн албаны хүмүүсийн хэлсэн үг нь хүйтэн дайны үеийн үзэл санаа болон Америкийн ноёрхогч үзлээр дүүрэн байна. Хятадын эсрэг өөр нэг худал мэдээ зохиож байгаа нь маш ойлгомжтой, гол зорилго нь “Хятадын заналхийлэл” гэсэн цуурхал тарааж, томоохон гүрнүүдийн өрсөлдөөнийг өдөөх явдал юм.
Үнэн хэрэгтээ Хятадыг хязгаарлаж, дарамт шахалт үзүүлэхийн тулд шалтаг хайж буй л хэрэг. Хятадын хөгжлийн зорилт бол 1.4 тэрбум гаруй ард иргэдээ илүү сайн сайхан амьдруулах явдал юм.
Бидэнд хэн нэгэнтэй өрсөлдөх, хэн нэгнийг орлох, хэн нэгэнтэй сөргөлдөх зорилго байхгүй. Хятад Улс АНУ-ын хөгжил дэвшлийг хараад баяртай байна. АНУ-ын холбогдох хүмүүс “Хятад Улс АНУ-ыг уналтад орсон гэж үзэж байна” хэмээн нэг бус удаа хөөрөгдөж байгаа нь өөртөө итгэлгүй байгаагийн шинж юм. Америк ялагдана гэж Хятад улс бооцоо тавихгүй, Америк ч Хятад улс ялагдана гэж бооцоо тавихыг хүсэх хэрэггүй юм, Хятадын ард түмэн үндэсний их сэргэн мандалтаа биелүүлэх нь гарцаагүй. Хятад улс энх тайван, хөгжлийн замаар замнахыг тууштай баримталж, НҮБ-аар төв болгосон олон улсын тогтолцоо болон олон улсын харилцааны үндсэн хэм хэмжээг хамгаалахыг хичээж байна. Харин ч АНУ хүйтэн дайны хуучин мөрөөдөлдөө автаж, ганц туйлт ноёрхолдоо автаж байна, олон улсын дүрмүүд өөртэй нь нийцэж байвал ашиглаж, нийцэхгүй бол орхин хаяж, “жижиг тойрог” бүрдүүлж, лагерийн сөргөлдөөн явуулж байгаа учир тэд бол өөрсдөө олон улсын эмх дэглэмийг самууруулж буй хамгийн том эх үүсвэр юм” гэжээ.
Эх сурвалж: sonin.mn
Г.Бямба