Month: October 2024

Categories
мэдээ улс-төр цаг-үе

Улсын Их Хурлын 2024 оны намрын ээлжит чуулган эхэллээ DNN.mn

Монгол Улсын Их Хурлын 2024 оны намрын ээлжит чуулган өнөөдөр (2024.10.01) 10 цаг 09 минутад  100 гишүүн  буюу  79.4 хувийн ирцтэйгээр эхэллээ.

Чуулганы нээлтэд, Монгол Улсын Ерөнхий сайд Л.Оюун-Эрдэнэ, Үндсэн хуулийн цэцийн дарга, Засгийн газрын гишүүд, Улсын Их Хуралд ажлаа шууд тайлагнадаг байгууллага болон нийслэлийн удирдлагууд, Үндэсний аюулгүй байдлын зөвлөлийн нарийн бичгийн дарга зэрэг төрийн өндөр албан тушаалтнууд Монгол Улсад суугаа Дипломат төлөөлөгчийн газар, Олон Улсын байгууллагын суурин төлөөлөгчийн газрын тэргүүнүүд уригдан оролцсон юм.

Монгол Улсын Их Хурлын 2024 оны намрын ээлжит чуулганыг нээж, УИХ-ын дарга Д.Амарбаясгалан үг хэлэв. /УИХ-ын даргын хэлсэн үг бүрэн эхээрээ /

Тэрбээр хэлсэн үгэндээ, намрын чуулганаар бид эдийн засгийн тогтвортой байдлыг хангах, хөрөнгө оруулалтын эрх зүйн орчныг илүү боловсронгуй болгож, улмаар гадаадын хөрөнгө оруулалтыг нэмэгдүүлэх, нэг салбараас хамааралтай эдийн засгийн суурийг өргөжүүлж, солонгоруулах, дотоодын бизнес эрхлэгчдийг дэмжих, эдийн засаг дахь төрийн оролцоог багасгах хууль, эрх зүйн шинэчлэлийг хийх шаардлагатай хэмээн онцлон тэмдэглэв.

Мөн Монгол Улсын 2025 оны төсвийн тухай хууль болон түүнтэй хамт өргөн мэдүүлсэн хууль тогтоомжууд нь ирэх дөрвөн жилийн хөгжлийн ерөнхий хандлага, эдийн засгийн өсөлтийг тодорхойлох тул Улсын Их Хурлын зүгээс Засгийн газраас авч хэрэгжүүлэх мега төсөл хөтөлбөр, хөрөнгө оруулалтын бодит хүрэх үр дүнг нарийвчлан судалж, өмнөх алдаа сургамжаа эргэн санаж, ирээдүйд болох эрсдэлийг урьдчилан тооцож ул суурьтай хандах нь зүйтэйг сануулсан.

Түүнчлэн Үндсэн хуулийн Хорин тавдугаар зүйлийн 1-д заасан Улсын Их Хурлын онцгой бүрэн эрхийг хэрэгжүүлэх зорилгоор Улсын Их Хурлын даргын захирамжаар байгуулагдсан 54 ажлын хэсэг ажилдаа эрчимтэй ороод байгааг мэдэгдээд, цаашид хуулийн чанарт онцгой анхаарал хандуулж, батлагдсан хууль тогтоомж хүн бүрд адил, тэгш үйлчилдэг, хэн нэгэнд зүй бус давуу байдал бий болгодоггүй, хүний эрхийг дээдэлсэн, тодорхой, ойлгомжтой байхад бид хичээх ёстойг гишүүдэд анхаарууллаа.

Улсын Их Хурлын дарга хэлсэн үгийнхээ төгсгөлд, намрын чуулганы нээлт Олон Улсын ахмадын өдөр тохиож буй тул  төр улсынхаа түшиг, түмэн олон залуусынхаа нөмөр нөөлөг болсон нийт ахмадууддаа эрүүл энх, урт удаан наслахыг ерөөв.

Улсын Их Хурлын дарга Д.Амарбаясгалан үг хэлсний дараа Монгол Улсын Төрийн дуулал эгшиглэснээр намрын ээлжит чуулганы нээлтийн ажиллагаа өндөрлөв хэмээн Улсын Их Хурлын Хэвлэл мэдээллийн газраас мэдээллээ.

Categories
мэдээ нийгэм

Он гарсаар 1579 иргэн угаарын хийд хорджээ DNN.mn

2024 оны нэгдүгээр сарын 1-ний өдрөөс есдүгээр сарын 7-ны өдрийн байдлаар 1579 иргэн угаарын хийн хордлогод өртжэн.

Үүнээс эмнэлгийн тусламж үйлчилгээ авч буцсан 1360, эмнэлэгт хэвтэн эмчлүүлж эдгэрч гарсан 188, нас барсан 31 тохиолдол улсын хэмжээнд бүртгэгдсэн байна.

2024 оны есдүгээр сарын 1-7-ны өдөр угаарын хийн хордлогод өртсөн дөрвөн хүн (хүүхэд-2, насанд хүрэгчид-2) хандаж, эмнэлгийн тусламж үйлчилгээ авсан байна.

Байршлаар авч үзвэл БЗД, СХД, ЧД-т зонхилон бүртгэгджээ.

Categories
мэдээ нийгэм цаг-үе

Зорчигчийн галт тэрэгний цагийн хуваарьт өөрчлөлт оржээ DNN.mn

Зам засварын ажилтай холбоотойгоор зорчигчийн галт тэрэгний цагийн хуваарьт дараах өөрчлөлт орлоо. Тухайлбал,

Аравдугаар сарын 1, 4, 7, 10, 18, 21, 24, 28, 31, XI/04-ний өдрүүдэд Улаанбаатар – Замын-Үүд чиглэлийн галт тэрэг 18:30 цагт хөдөлж, Замын-Үүдэд 10:35 цагт хүрнэ.

Аравдугаар сарын 13, 15-ны өдрийн Улаанбаатар-Замын-Үүд чиглэлд 16:40 цагт аялах галт тэргийг 20:22 цагт аялуулахаар боллоо.

Аравдугаар сарын 2-ны өдрийн Улаанбаатар-Сүхбаатар чиглэлийн 10:35 цагт явах галт тэрэг, Сүхбаатар-Улаанбаатар чиглэлийн 06:58 цагт явах галт тэрэг цуцлагдах болсныг мэдэгдье.

Энэ мэт зарим чиглэлийн галт тэрэгний цагийн хуваарьт өөрчлөлт орсон тул та бүхэн галт тэрэгний цагийн хуваарьтай холбоотой болон бусад дэлгэрэнгүй мэдээллийг 1900-1949, 1900-8899 лавлах утсаар авч, аяллаа төлөвлөөрэй гэж Улаанбаатар төмөр зам ХНН-ээс мэдээллээ. 

Categories
мэдээ нийгэм нүүр-хуудасны-онцлох онцлох-нийтлэл туслах-ангилал

Таксины зөвшөөрөл олон айлыг хоногийн хоолноос нь салгана гэж жолооч нар үзэж байна DNN.mn

Улаанбаатар хотод таксины олдоц тааруу, үйлчилгээ чанарын шаардлага хангадаггүй гэх шүүмжлэл байдаг. Тэгвэл нөгөө талдаа энэ бүхэн хувийн машинаараа “халтуур” хийдэг хүмүүсээс болдог гэх тайлбарыг ч такси үйлчилгээ эрхлэгчид хэлдэг. Тэгвэл ойрын өдрүүдэд нийслэлд такси үйлчилгээ эрхлэхийн тулд зөвшөөрөл авах ёстой болж, 3-10 сая төгрөгийн хураамж төлөхөөр хуульчлагдсан талаарх мэдээлэл гарсан. Энэ асуудлаар бид тодрууллаа.

Ноднин жилийн арванхоёрдугаар сарын 07-ны өдөр Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах тухай хууль батлагдан хүчин төгөлдөр үйлчилж байгаа. Энэ хууль батлагдсантай холбогдуулан хэд хэдэн хуульд нэмэлт, өөрчлөлт орсон. Үүн дотор нийтийн тээвэр болон такси үйлчилгээг энэ оны аравдугаар сарын 15-ны өдрөөс зөвхөн хуулийн этгээд тусгай зөвшөөрөлтэйгөөр эрхлэхээр заасан байна. Харин тус зөвшөөрлийг аймаг, нийслэлийн Засаг дарга олгох бөгөөд зөвшөөрлийн үргэлжлэх хугацаа таван жил байхаар тусгасан гэдгийг албаны хүн хэлж байна. Мөн орон нутаг, хот доторх болон хот орчмын нийтийн зорчигч тээвэр, такси үйлчилгээ эрхлэх тусгай зөвшөөрөл авахдаа 3-10 сая төгрөгийн хураамж төлөх аж.

Энэхүү хураамж нь Нийтийн тээврийг хөгжүүлэх санд төвлөрч, нийслэлийн иргэдийг эрүүл, аюулгүй орчинд амьдрах нөхцөлийг хангахад зарцуулагдах гэнэ. Хэрэв зөвшөөрөлгүй нийтийн тээвэр, таксины үйлчилгээ эрхэлсэн бол иргэнийг тав, хуулийн этгээдийг 50 сая төгрөгөөр торгоно. Энэ зөрчлийг цагдаагийн байгууллагын эрх бүхий алба хаагч шалган шийдвэрлэнэ гэсэн олон нэмэлт, өөрчлөлт орчихсон байгааг албаныхан хэлж байгаа юм.

Хуулийн этгээд такси үйлчилгээ эрхлэх зөвшөөрөл авах хүсэлтээ нийслэлийн Нийтийн тээврийн бодлогын газарт ирүүлэх ёстой. Тус газраас томилогдсон ажлын хэсэг ирүүлсэн баримтуудыг нягтлан шалгаж, түүнд нь үндэслэн нийслэлийн Засаг дарга зөвшөөрлийг олгох юм байна. Ингэхдээ такси үйлчилгээг шуурхай зохион байгуулах, жолооч, зорчигчдын аюулгүй байдлыг хангах дүрс бичлэгийн төхөөрөмжөөр тоноглогдсон, техникийн хяналтын үзлэгт хамрагдаж тэнцсэн тээврийн хэрэгсэлтэй, такси үйлчилгээг гүйцэтгэх мэргэшсэн жолооч, мэргэжлийн хүний нөөц, санхүүгийн чадавхтай, техникийн оношилгоо, үйлчилгээний болон засвар, угаалгын байртай байх, автотээврийн хэрэгсэл нь хөгжлийн бэрхшээлтэй иргэний аюулгүй, чөлөөтэй зорчих нөхцөлийг бүрдүүлсэн, Монгол Улсын стандартад заасан шаардлага хангасан, автотээврийн хэрэгсэл нь үйлдвэрлэснээс хойш 10-аас дээш жил ашиглагдаагүй, татвар төлөгчөөр бүртгүүлсэн, татварын өргүй, цахим төлбөрийн баримтын системд холбогдсон, жолоочийг тогтсон тарифын дагуу үйлчилж байгаа эсэхийг шалгах хэмжилт-хяналтын төхөөрөмж, таних тэмдэгтэй автотээврийн хэрэгсэлтэй байх, жолооны зөв хүрдтэй байх гэсэн арван нөхцөл, шаардлага хангасан хуулийн этгээдэд зөвшөөрөл олгох юм байна.

Тэгэхээр энэ сарын 15-наас эхлэн та зөвшөөрөлгүй таксигаар үйлчлүүлээд энэ талаар хэн нэгэн цагдаагийн байгууллагад гомдол гаргасан тохиолдолд зөрчлийг хянан шалгаж эхэлнэ. Ингээд жолооч зөвшөөрөлгүй байсан нь батлагдвал таван сая төгрөгөөр торгуулна. Энэ нь нэг талдаа хувин машинаараа таксинд явж, өрхийн орлогодоо нэмэрлэдэг, амьдралаа залгуулдаг хүмүүст хүнд тусна гэсэн гомдол ч гарч байгаа. Бид хувиараа такчинд явдаг зарим хүмүүсээс сэтгэгдлийг нь сонссон юм. Иргэн Ц “Таксины жолооч болгон бүтэн цагаар энэ ажлаа хийдэггүй. Зарим нь ажлынхаа хажуугаар давхар ажилладаг. Энэ хуулийн зохицуулалт бүтэн цагаар ажилладаг жолооч нарт л хүнд тусаж байх шиг байна. Би эхнэр, таван хүүхдийн хамт амьдардаг. Эхнэр маань хүүхдүүдээ хараад сүүлийн гурван жил эрхэлсэн ажилгүй байна. Би өдрийн цагаар түгээгч хийдэг. Гэвч дан ганц түгээгчийн цалин долоон хүнийг тэжээж хүрэлцэхгүй шүү дээ. Ингээд бага охиноо төрснөөс хойш шөнийн цагаар таксинд явдаг болсон. Гэтэл надад тэр яриад байгаа зөвшөөрлийг авах 3-10 сая төгрөгийг шууд гаргаад өгөх боломж үнэхээр алга. Тийм боломж байдаг байсан бол таксинд явж байхгүй л байлаа” гэсэн юм. Харин иргэн Г “Хувиараа такси үйлчилгээ явуулдаг хүмүүсийг багасгаж, бүр хориглож ч болно л доо. Таксины жолоочтой холбоотой янз бүрийн л юм сонсогдох юм байна шүү дээ. Гэхдээ ямар нийгэмд амьдарч байгаагаа бодох л хэрэгтэй. Нийгэмд баян хэсэг байхад ядуу хэсэг ч байгаа. Нийгмээ мэдэрч чаддаггүй хүмүүс хууль баталж байгаа нь харамсалтай. Энэ шийдвэр олон айл гэрийг хоногийн хоолноос нь салгаж байна. Миний таньдаг олон жолооч байгаа. Тэдний ихэнх нь яах учраа олохгүй явж байх шиг байна” хэмээв.

Үнэхээр ч түүний хэлсэн шиг таксины жолооч нартай холбоотой олон хэрэг өнгөрсөн хугацаанд гарсан. Энэ бүхэн нь ямар нэгэн бүтгэлгүй хувийн таксиг цэгцлэх ёстой гэсэн ойлголтыг олон нийтэд өгсөн. Гэвч аливаа бүхэн хоёр талтай байдгийн адилаар таксинд явж амьдралаа залгуулж байгаа олон хүн бий. Хууль гаргахаасаа өмнө энэ хүмүүсийн асуудлыг хэрхэх вэ гэдгийг ч давхар бодолцох ёстой байсан мэт санагдана. Зөвшөөрөл авахын тулд заавал аж ахуйн нэгж байх шаардлагатай гэж байгаа. Гэтэл энэ бүхнийг цэгцлээд, бичиг баримтыг нь бүрдүүлээд явдаг нь таксины жолооч нарын дунд ховор. Дээрээс нь шууд бэлэн гаргаад өгөх мөнгө байхгүй учраас цаашид хулгайгаар таксинд явах зэрэг асуудлууд гарах шинжтэй байгаа юм. Мөн хувийн унаагаараа ажлын газрынхаа хүмүүс, найз нөхдөө гэрт нь хүргэж яваа хүмүүсийг таксинд явсан гэж үзэх үү. Үүнийг нь хэнээр нотлуулах вэ гээд хариултгүй олон асуулт урган гарч байна.

Мөн тус хуулийн хүрээнд “Ubcab”, “Aba” гэх мэт дуудлагын такси үйлчилгээний газрууд нийслэлийн Засаг даргаас такси үйлчилгээ эрхлэх тусгай зөвшөөрөл авах хэрэгтэй болж байгаа юм. Сонирхуулахад, нийслэлийн Нийтийн тээврийн бодлогын газар нь Нийтийн тээврийн болон такси үйлчилгээний нийт 31 аж ахуйн нэгж байгууллагуудтай хамтран ажилладаг байна. Тэр дундаа үндсэн чиглэлийн 1364, буухиа үйлчилгээний 40, такси үйлчилгээний 253 нийт 1657 тээврийн хэрэгсэл үйлчилгээнд явж байгаа гэсэн тооцоо байдаг ажээ. Бид бүхэн сэтгэгдлийг нь сонссон дараагийн хүн бол сүүлийн 10 гаруй жил хувиараа таксинд явж байгаа иргэн С байлаа. Тэрбээр “Би амьдралын боломжоосоо болоод их, дээд сургууль төгсөөгүй. Ганц сурсан зүйл минь машин барих. Такси бол аль ч улсад байдаг л үйлчилгээ. Харин манай оронд төдийлөн сайн хөгжөөгүй байна. Хөгжүүлэх олон арга зам байгаа. Би олон жил такси барьж, янз янзын хүнтэй таарч явлаа. Гэтэл яагаад ийм ойлгомжгүй зохицуулалт хийж байгааг ойлгохгүй байна. Бид яагаад харсаар байж энэ хуулийг батлуулчихав аа гэж хожимдсон хойно нь боддог. Энгийн иргэн сайхан амьдрахад их л ээлгүй нийгэм дээ” хэмээн хэлсэн юм.

Нийгмийн сайн сайхны төлөө хууль тогтоомж гаргадаг. Тэгэх ч ёстой. Гэхдээ судалгаа тооцоог нь сайн хийж, амьдралд тохирсон, иргэдээ хохироодоггүй тийм л хуулийг гаргах нь шийдвэр гаргах түвшинд байгаа хүмүүсийн үүрэг. Харин энэ хуулийг гаргахдаа тэд төдийлөн сайн тооцоо хийгээгүй, иргэдийнхээ амьдралыг сайтар судлаагүй юм уу даа гэсэн бодол төрж байлаа. Хувийн таксиг цэгцлэх амьдралын шаардлага гарсан. Гэхдээ шууд ингэж тулган шаардах байдлаар бус уян хатан байдлаар асуудлыг шийдвэрлэх хэрэгтэй байсан гэдгийг ч жолооч нар хэлж байна.

Ө.АНХзАяА

 

Categories
мэдээ нийгэм

Метро барих техникийн тодорхойлолтыг баталж, Тендерийн үнэлгээний хороонд шилжүүллээ DNN.mn

Энэ онд Улаанбаатар хотод их багтаамжийн нийтийн тээврийн хэрэгсэл метро барих төслийн зөвлөх үйлчилгээний олон улсын нээлттэй тендерийг хоёр үе шаттай зохион байгуулж, БНСУ-ын “Духуа инженеринг” компанийн түншлэл шалгарсан. Тэгвэл аравдугаар сарын 3-нд метро барих барилга угсралтын гүйцэтгэгчийг сонгон шалгаруулах I шатыг зарлана. Энэ хүрээнд өнөөдөр ажлын хэсгийн хуралдаан болж, метроны техникийн тодорхойлолтыг Тендерийн үнэлгээний хороонд шилжүүлээд байна.

Энэ үеэр нийслэлийн Засаг даргын нэгдүгээр орлогч Н.Мандуул “Их багтаамжийн нийтийн тээврийн хэрэгсэл метро барих төслийн зөвлөх үйлчилгээг Солонгосын Сөүл хотын метрог барьсан “Духуа инженеринг” ХК үзүүлж байна. Метро барих төслийн ажлын хэсгийн хуралдаанаар техникийн тодорхойлолтыг баталж, Тендерийн үнэлгээний хороо руу шилжүүллээ. Ингэснээр аравдугаар сарын 3-нд барилга угсралтын эхний шатны гүйцэтгэгчийг зарлана” гэсэн юм.

Улаанбаатар хотын метро Толгойтоос Амгалан хүртэл 18 орчим км үргэлжлэх бөгөөд 14 зогсоолтой. Зогсоол хоорондын зай 1.3 км. Цагт 17500 зорчигч тээвэрлэнэ. Нийт аяллын хугацаа 27 минут байхаар төлөвлөгдсөн. Мөн ил, далд инженерийн байгууламжууд хийж, метроны 14 зогсоолыг худалдаа, үйлчилгээний цэг байдлаар хөгжүүлэх эхний ээлжийн техникийн тодорхойлолтыг гаргажээ. Улмаар барилга угсралтын ажлыг 2025 онд эхлүүлэх юм.

Categories
гадаад мэдээ

BBC: Ираны байр суурь эрс зөөлрөв DNN.mn

BBC-ийн “Иран яагаад Хезболлагийн талд орох гэж яарахгүй байна вэ?” нийтлэлийг орчуулан хүргэж байна.

Өнгөрсөн долоо хоногт Ливан дахь Хезболла бүлэглэл урьд өмнө болж байгаагүй хэд хэдэн халдлагад өртсөн нь тус бүлэглэлд сүүлийн 40 жилийн хамгийн гүн хямрал үүсгэсэн гэж зарим хүмүүс үзэж байна. Нэгдүгээрт, орон даяар тус бүлгийн гишүүдийн хэрэглэж байсан холбооны хэрэгсэл болох пейжер, холбооны гар станцууд дэлбэрч, олон арван хүн амь үрэгдэж, олон зуун хүн шархадсан. Үүний дараа Израилийн агаарын довтолгоо Хезболлагийн объектуудад цохилт өгч, дээд командлагчдыг нь устгасан. Өөрөөр хэлбэл, тус бүлэглэлийн хувьд 2006 оны Израильтай хийсэн дайнаас хойших хамгийн том цус урсгасан явдал болсон. Хезболла бол Израильтай дайсагнагч бүс нутгийн зэвсэгт бүлэглэлийн эвслийн “эсэргүүцлийн тэнхлэг” гэгддэг хамгийн том зэвсэгт бүлэглэл юм. Иймээс Хезболлаг ихэвчлэн “дэлхийн хамгийн хүчирхэг төрийн бус арми” гэж нэрлэдэг. Байгуулагдсан цагаасаа л Ираны бүрэн бөгөөд гуйвшгүй дэмжлэгийг хүртэж ирсэн байдаг. Иймээс Хезболлаг ноцтой сүйтгэсэн, урьд өмнө хэзээ ч байгаагүй Израилийн эдгээр хүчтэй цохилтын дараа Иран шийдэмгий хариу үйлдэл үзүүлнэ гэж олон хүн хүлээж байв. Гэсэн хэдий ч ийм хариу үйлдэл хараахан гараагүй байна.

Хэдийгээр Иран Хезболла “улаан шугам” давагдангуут тулаанд орно гэж олон жилийн турш мэдэгдэж, “Хезболла”-гийн удирдагч Хассан Насралла саяхан Израиль “бүх улаан шугамыг давсан” гэж байсан ч Иран одоогоор ямар ч шийдэмгий хариу үйлдэл үзүүлээгүй байна. Израилиас өшөө авах тухай Ираны галтай үг хэллэг хүртэл энэ удаад мэдэгдэхүйц дарагдсан шинжтэй сонсогдов.

Нью-Йорк хотноо болж буй НҮБ-ын Ерөнхий Ассамблейн чуулганд оролцсон Ерөнхийлөгч Масуд Пезешкяны хэлсэн үгнээс Ираны байр суурийг олж харж болно.

Америкийн сэтгүүлчидтэй хийсэн уулзалтын аудио бичлэгээс үзвэл, Пезешкян ер бусын гэмээр мэдэгдэл хийж, Израилийн үйлдэлд Иран цэргийн хүч хэрэглэхгүй байж магадгүй гэдгийг харуулав. Энэ нь хоёр сар хүрэхгүй хугацааны өмнө Тегеранд ХАМАС-ын удирдагч Исмаил Ханиегийн амь насыг бүрэлгэсний дараа Иран Израильд хатуу хариу үйлдэл үзүүлэхээ амлаж байсан Ираны байр сууринаас эрс ялгаатай сонсогдов. Нью-Йоркт Иран илүү эвлэрэх өнгө аяс руу шилжсэн үг хэлсэн нь үнэхээр олон нийтийн гайхширлыг төрүүлсэн тул Ираны Гадаад хэргийн сайд Аббас Арагчи “Иран Израильтай харилцаагаа сайжруулахад бэлэн байна гэсэн ойлголт байхгүй” гэж яаран мэдэгдэв. Харин Ираны Гадаад хэргийн сайд асан, одоо тус улсын дэд ерөнхийлөгч болсон Мохаммад Жавад Зариф олон нийтийн сүлжээгээр Пезешкяны хэлснийг дэмжиж “Манай ерөнхийлөгч үнэн хэрэгтээ Израилийн гэмт хэргийг буруушааж, Ираныг бүс нутгийн энх тайвны төлөө тэмцэгч, цөмийн зэвсгээс ангижрахыг дэмжигч гэж танилцуулсан” гэж онцолжээ. Зариф Израилийг Ираны санаа зорилгын талаар аюултай, худал мэдээлэл тарааж байна гэж буруутгаад, Израилийн худал мэдэгдлийн эсрэг Иран дайн хийхийг эрмэлзэхгүй” гэж бичсэн байна. Ираны ерөнхийлөгч Пезешкян Америкийн сэтгүүлчидтэй хийсэн ярилцлагадаа “Бид дайн хүсэхгүй байна” гээд Израилийг ялагч гэж байхгүй дайнд Ираныг татан оруулах урхи тавьсан гэж буруутгасан билээ.

Мөн Израиль, АНУ-ын талаар хамгийн хатуу байр суурьтай байдаг Ираны дээд удирдагч, аятолла Али Хаменеи хүртэл Хезболлагийн пейжер болон гар станцыг дэлбэлснээс гурав хоногийн дараа олон нийтийн өмнө үг хэлэхдээ Ливаны талаар товчхон дурдаад үүний оронд тэрээр Исламын улс орнуудыг Израилийн эсрэг нэгдэж, эдийн засаг, улс төрийн харилцаагаа таслахыг уриалсан билээ. Энэхүү чиг хандлага Израилиас өшөө авахыг уриалдаг уламжлалтай Ираны засгийн газрыг дэмжигч хэвлэл мэдээллийн хэрэгслүүдэд хүртэл илэрч байна. Олон жилийн турш өшөө авахыг уриалсан ч хүссэн үр дүндээ хүрч чадаагүй эдгээр эх сурвалжууд өшөө авалтын оронд Израилийн эсрэг Исламын эв нэгдэл хэрэгтэй болоод байна гэх мэт санаануудад илүү анхаарал хандуулж эхлэв. Эдгээр олон хэвлэл мэдээллийн хэрэгслүүдээр Израилийн пуужингийн цохилтын аймшигт гэрэл зургууд гарсаар байгаа ч өс хонзонгийн өнгө аяс алга болжээ. Жишээлбэл, хэт консерватив хуучинсаг “Kayhan” сонин хүртэл саяхан Израилийн эсрэг “Цаг явж эхэллээ!” гэсэн гарчигтай редакцийн нийтлэл нийтэлсэн ч Израилийн технологи, тагнуулын давуу талыг аядуухан хүлээн зөвшөөрч, үүнийг барууны дэмжлэгтэй холбон тайлбарлаад, харин Хезболлаг зөвхөн Иран, Палестин, Йемен болон Ирак дахь эсэргүүцлийн бүлгүүд дэмждэг гэж бичжээ. “Kayhan”-ы энэхүү өнгө аяс Израилийн сүйрлийн цохилтуудын оршил болсон Хезболлагийн харилцаа холбооны хэрэгслийн дэлбэрэлт гэх мэт нарийн төвөгтэй ажиллагаа Хезболлаг гайхшируулаад зогсохгүй, Ираны удирдлагад ноцтой эргэцүүлэл төрүүлсэн байж магадгүй гэдгийг нотолж байна. Эдгээрийг Иран өшөө авалтаас татгалзаж байна гэж тайлбарлаж болно. Гэхдээ зарим эх сурвалж “Энэ нь Иран гэнэтийн хариу цохилт өгөхөөр төлөвлөж байгааг илтгэж байна” гэж үзэж байна. Одоогийн байдлаар ингэх магадлал бага байгаа мэт боловч Ойрхи Дорнод нь эрт дээр үеэс урьдчилан таамаглах аргагүй үйл явдлууд тохиодог бүс нутаг байсаар ирсэн гэдгийг мартаж болохгүй.

BBC-ийн энэхүү нийтлэл дээр НҮБ-ын Ерөнхий Ассамблейн чуулган дээр Израилийн засгийн газрын тэргүүний хэлсэн үгийг нэмж дурдах нь зүйтэй юм. Ерөнхий сайд Биньямин Нетаньяху “Хэрэв Тегеранд байгаа дарангуйлагчид бидэн рүү дайрвал бид ч бас адилхан та нар руу дайрах болно. Израилийн урт гар хүрэхгүй газар Иранд байхгүй. Энэ бол бүх Ойрхи Дорнодод хамаатай зүйл. Израильчууд Ливантай хиллэдэг нутаг дэвсгэрт байгаа гэр орондоо өөрийн иргэдийг тайван амгалан буцаж ирэх хүртэл бид Хезболлаг устгасаар байх бүрэн эрхтэй. Хэрэв хил орчмынх нь иргэд дайжиж хоосорсон хотууд үлдвэл АНУ-ын засгийн газар үүнийг хэр удаан тэвчих вэ? Энэ тэвчих ёсгүй нөхцөл байдлыг бид бүтэн жилийн турш тэвчиж байна” гэж хэлсэн юм. Үнэхээр ч түүнийг НҮБ-ын индэр дээр эдгээр үгийг хэлж байхад Израилийн Агаарын цэргийн хүчний сөнөөгч онгоцууд Бейрут хотын Дахия хороололд байрлах энгийн иргэдийн олон давхар орон сууцны дор, тусгай бэхлэлт, хийн байрласан Хезболла бүлэглэлийн төв байрыг тусгай бөмбөг ашиглан сөнөөж тус бүлэглэлийн тэргүүн Хассан Насраллатай нь хамт дээд удирдлагуудыг нь устгав. Үүнээс өмнө Хезболлагийн тусгай хүчнүүдийн удирдлагуудыг устгаад байсан билээ.

Ийнхүү Хезболла ганцхан долоо хоногт дээд, дунд тушаалын удирдлагагүй болов. Бейрут дахь тоймч Зейна Ходр тус бүлэглэлийн удирдагч алагдсан явдлыг “Хассан Насралла бол зүгээр нэг бэлгэ тэмдэг биш, тэр бүлэглэлийн стратеги, цэргийн тархи нь болж байсан хүн юм. Түүний үхэл Хезболлад ноцтой үр дагавар авчрах нь эргэлзээгүй. Энэ нь тэд байнгын удирдагчаа төдийгүй хөл доорх газар шороо, тулгуураа алдсан гэсэн үг” гэжээ. Мөн олон цэргийн шинжээч Хезболла Израилийг эсэргүүцэх чадваргүй болон тарж, бутарч буйг онцолж байна. Үнэхээр ч Израилийн Агаарын цэргийн хүчин Йемений Ходейда, Рас Иса дахь Хуситууд гэх террорист бүлэглэлийн цэргийн байгууламжуудад цохилт өгч эхлэв. Учир нь Иран Ливанаас гадна, Йемен, Сири, Иракт нөлөөгөө тогтоогоод байгаа билээ. Ийнхүү Ираны дэглэм өөрсдөө Хезболлагийн удирдлагын хувь заяаг давтаж магадгүй болсон тул Израилийн эсрэг террорист бүлгүүдэд туслах боломжгүй болов.

 

Г.АМАРСАНАА

Categories
мэдээ нийгэм нүүр-хуудасны-онцлох онцлох-нийтлэл туслах-ангилал

Үндсэн хуулийн Цэц хэвлэн нийтлэх эрх чөлөөнд халдах оролдлого хийлээ! DNN.mn

Эхлээд нэг “тэмдэглэл”-ээс хүргэе. Жилийн өмнө “Үндсэн хуулийн хяналтыг боловсронгуй болгох нь” сэдэвтэй эрдэм шинжилгээний бага хурал болжээ. Тэр үеэр Үндсэн хуулийн Цэцийн гишүүн асан Ш.Цогтоо “…Энэ УИХ, тухайлбал Г.Занданшатар дарга “…Үндсэн хуулийн Цэцийн шийдвэрийг үндэслэж Засгийн газрын бүтцэд өөрчлөлт хийж болохгүй. Цэц хууль тогтоогчдын бүрэн эрхэнд халдлаа. Цэц ер нь цаашдаа ч ингэж ийм нэмэлт, өөрчлөлт хийж болохгүй” гээд Цэцийн тухай хуульд нэмэлт, өөрчлөлт оруулсан. Товчдоо бол энэ яриад байгаа асуудалд цэг тавьсан гэж би ойлгож байгаа. УИХ ер нь Цэцийн энэ тэнэглэлийн эсрэг өөр яалтай ч билээ. Өөр ийм шийдвэр авахаас ч өөр аргагүй байсан байх гэж би боддог юм. Тэр Цэцийн шийдвэр долоон хоног ч үйлчлээгүй. Цаашид ч үйлчлэхгүй. Гэхдээ суурь нь хэвээрээ байгаа шүү. Кейс тэр чигээрээ, хэн ч ашиглахад бэлэн байгаа. Тэгэхээр энэ их үр дагавартай юмыг хуульчдын давлагаагүйгээр, сэхээтний өргөн давхарга бол эсэргүүцэж, зэвүүцэж дургүйцээд зөндөө л юм болоод байна л даа. Гэтэл энэ асуудлаар эрдэм шинжилгээний бага хурал байнга хийгээд л, дахин дахин хэлэлцээд л, зарим нь бүр дахин хянуулах гээд ч байгаа юм шиг, магадгүй боловсронгуй болгуулах гээд ч байгаа юм шиг. Ер нь бол цаад утгаараа УИХ-ын шийдвэрийг эсэргүүцээд ч байгаа юм болов уу гээд зөндөө ийм мөн, биш болсон юм ярих бололтой юм аа. Үүнийг нь ер нь та юу гэж үзэж байна вэ. Зөндөө юм болж байна. Долоо хоногийн өмнө Хуульчдын холбооны өдөржин, шөнөжин хурал болсон. 7600 хуульч оролцсон гэж би бодож байна, бүх сувгаар нээлттэй байсан. Одоо хуульд өөрчлөлт оруулах гэж байгаа. …Би өөрийнхөө саналыг шуудхан хэлчихье. Нуухыг нь авах гэж байгаад нүдийг нь сохолчхов оо. Боловсронгуй болгох гэж оролдвол яг саяын Үндсэн хуулийнх шиг, Үндсэн хуулийн шүүх нь Үндсэн хуульдаа халддаг шиг завхрал болж мэдэх тийм нигуур бол зөндөө ажиглагдаж байна. Иймэрхүү юм чинь цааш цаашаагаа үргэлжлээд байвал улс төрийн хямралд хүрч, нийгмийг төөрөгдөлд оруулна. Энэ бол бараг зүй тогтол шүү дээ. Бусад оронд тохиолддог” гэж байв. Мөн тэрбээр “Хуулийг мухар сохроор шүтсэний хэрэггүй” илтгэлдээ “… Миний бие яах вэ, Цэц гэдэг том айлын тогооноос долоон жил хоол хороосон ч гэсэн илтэд буруу зүйл дээр, тэр тусмаа өөрийнхөө судалгааны ажлын гол обьект болсон Үндсэн хуулийн эмзэг, нарийн төвөгтэй асуудал дээр та бүхэнтэй санал нэг байгаагаа хэлмээр байна. Шуудхан хэлчихэд хамгаалах ёстой Үндсэн хуульдаа өөрсдөө халдлага үйлдчихсэн Цэцийн энэхүү халдлагыг займчуулж хэн нэг “захиалагч”-ийн тухай ярьж үймүүлэх, аль нэг нам руу түлхэж зайлуулах, эрт эдүгээ цагийн “төрийн гурван өндөрлөг”-тэй холбогдуулах гэж оролдох, янз бүрийн нөхдүүдээр элдэв эрээн мяраан тайлбар хийлгэх зэрэг аливаа увайгүй үйлдлүүд ямар ч утгагүй гэдгийг онцлон тэмдэглэмээр байна. Энд хэрэг үүсгэж тогтоол шийдвэр гаргасан Цэцээс өөр буруутныг хайх хэрэггүй ээ. Учир нь хэргийн эзэд, хэнгэргийн дохиур тодорхой. Цэц ийм буруу зүйл хийсэн үү гэвэл хийсэн. Цэц Үндсэн хуулийн үзэл санааны эсрэг маш том алдаа гаргасан. Одоо энэ алдаагаа Цэц өөрөө засаж нүглээ наманчлах ёстой. Монгол Улсын Үндсэн хуулийн 69 дүгээр зүйлийн дөрөв дэх хэсэгт “…Үндсэн хуульд оруулсан нэмэлт, өөрчлөлт Үндсэн хуулийн нэгэн адил хүчинтэй байна” гэсэн тов тодорхой заалтыг бүдүүлгээр зөрчиж, хоёрхон жилийн өмнө 2019 онд ард нийтээр хэлэлцүүлж байгаад баталсан Үндсэн хуулийн ямар ч маргаангүй зүйл, заалтыг шууд устгасан Үндсэн хуулийн Цэц өөрөө буруутай.  …Зүй нь Үндсэн хууль зөрчсөн тухайлсан нэг салбар хуулийн зүйл, заалт юм уу, аль эсхүл Үндсэн хууль зөрчсөн гэм буруутай албан тушаалтны үйлдлийг Цэц хэлэлцдэг болохоос “…Үндсэн хууль нь өөрөө буруу” гэж хэлэлцдэг тийм шүүх, тийм Цэц манай улсаас өөр оронд байхгүйг саяхан болсон Хууль зүйн үндэсний хүрээлэнгийн 20 жилийн ойн олон улсын эрдэм шинжилгээний хурал дээр Япон, Солонгос, Сингапурын эрдэмтэд асуултад хариулахдаа ямар ч хоёрдмол утгагүй нотолж баталж л байна” гэсэн байгаа юм.

Тэгвэл яг үүнтэй холбоотой асуудал улс төрийн хүрээнд, цаашлаад олон нийтийн дунд ч “…Үндсэн хуулийн Цэцийн тухай хууль, Үндсэн хуулийн Цэцэд маргаан хянан шийдвэрлэх тухай хуульд 2022 оны наймдугаар сард оруулсан өөрчлөлт Үндсэн хууль зөрчсөн болж, түүнийг хүчингүй болгох замаар Үндсэн хуулийн Цэц Үндсэн хуульд оруулсан нэмэлт өөрчлөлтийг хянадаг болохоор зэхэж байна” гэх агуулга бүхий мэдээлэл өнгөрсөн зунжин яригдлаа.

Тэр байтугай 2023 оны хавар, 2024 оны өвөл нэр бүхий иргэд яг энэ асуудлаар Үндсэн хуулийн Цэцэд мэдээлэл гаргасан талаар ч эх сурвалжууд ярьж, мэдээлэв.

Бид ч “…Үндсэн хуулийн Цэц нь Үндсэн хууль, түүнд оруулсан нэмэлт өөрчлөлтийг хянах эрхгүй гэж УИХ хуульчилсан нь Үндсэн хууль зөрчсөн” буюу товчхондоо “…Үндсэн хуулийн Цэц Үндсэн хуулийг хянах ёстой гэсэн агуулга бүхий иргэдийн мэдээлэл Үндсэн хуулийн Цэцэд очиж, тэр дагуу маргаан үүсгэж, хяналтын үйл ажиллагаа явуулж эхэлсэн” тухай мэдээлсэн. Тиймээс бид, “…Цэцийг Дээд шүүхэд “нэгтгэх” хувилбар яригдаж эхэллээ”, “…Г.Баясгалангийн үед Цэц “цэг” тавиулах уу”, “…Цэцийн дээр нэг л юм бий, тэр нь хөх тэнгэр биш Үндсэн хууль юм” мэдээ, нийтлэлийг хүргэсэн.

Харин Үндсэн хуулийн Цэц өчигдөр албан ёсны мэдээллийн сайтдаа нийтэлсэн мэдэгдэлдээ “…Эдгээр нийтлэлүүдэд гүтгэлгийн шинжтэй, үндэслэл, нотолгоогүй зүйлсийг дурдсаныг зарим цахим сайт хуулбарлан түгээсэн байна. Энэ бүхэн нь Монгол Улсын Үндсэн хуулиар баталгаажсан Цэцийн бие даасан үйл ажиллагааг алдагдуулах, Цэцийн гишүүдийг ямар ч нотолгоогүй гүтгэх замаар Үндсэн хуулийн байгууллагын ажил хэргийн нэр хүнд, хүний нэр төр, алдар хүндэд санаатай халдсан, Цэцийн үйл ажиллагаанд хөндлөнгөөс оролцох, нөлөөлөхийг хориглосон зарчимд нийцэхгүй байна” гэжээ.

Тэгвэл, нэр бүхий иргэд “…Тодорхой хуулиудад 2022 оны наймдугаар сард өөрчлөлт оруулсан нь Үндсэн хуулийн Цэцийн онцгой бүрэн эрхийг хязгаарласан” гэсэн нэг агуулга бүхий мэдээллийг Үндсэн хуулийн Цэцэд гаргажээ. Нэг нь, “…Үндсэн хуулийн Цэцийн тухай хуульд нэмэлт өөрчлөлт оруулах тухай хууль болон Үндсэн хуулийн Цэцэд маргаан хянан шийдвэрлэх ажиллагааны тухай хуульд нэмэлт өөрчлөлт оруулах тухай хууль нь Үндсэн хуулийн Удиртгал, 1, 64, 66, 70 дугаар зүйлийг зөрчсөн” гэж, нөгөө нь “…2022 онд Үндсэн хуулийн Цэцэд маргаан хянан шийдвэрлэх тухай хуулийн 13.1-т “…Цэц Үндсэн хуулийг зөрчсөн эсэх тухай дор дурдсан маргааныг хянаж дүгнэлт гаргах бөгөөд шаардлагатай бол дахин хянаж, эцэслэн шийдвэрлэнэ” гээд 13.1.1-т “…Монгол Улсын Үндсэн хууль, түүнд оруулсан нэмэлт, өөрчлөлтөөс бусад хууль, УИХ-ын бусад шийдвэр” гэж, мөн Үндсэн хуулийн Цэцийн тухай хуулийн 8.2-т “…Цэц Үндсэн хуулийг зөрчсөн тухай дараах маргаантай асуудлыг хянан үзэж, дүгнэлт гарган УИХ-д оруулах бөгөөд хэрэв дүгнэлтийг нь УИХ хүлээн зөвшөөрөөгүй бол Цэц дахин хянан үзэж Үндсэн хуулийн 66.З-т заасныг баримтлан эцсийн шийдвэр гаргана” гээд 8.2.1-т “…Монгол Улсын Үндсэн хууль, түүнд оруулсан нэмэлт, өөрчлөлтөөс бусад хууль, УИХ-ын бусад шийдвэр Үндсэн хуульд нийцэж байгаа эсэх” гэсэн нэмэлтүүд оруулсан. Энэ нь Үндсэн хуульд 64.1, 66.2.1, 70.1 дэх хэсгийг тус тус зөрчиж байна” гэсэн мэдээллүүдийг гаргасан талаар бид өмнө нь мэдээлсэн.

Ийм мэдээлэл нийтийн дунд тархсаар байтал Үндсэн хуулийн Цэц өөрөө “…Энэ оны наймдугаар сараас эхлэн Үндсэн хуулийн Цэцэд ирүүлсэн иргэдийн өргөдөл, мэдээлэл, гомдол, эрх бүхий байгууллага, албан тушаалтны хүсэлтийн дагуу Цэцэд маргаан үүсгэсэн тохиолдолд энэ талаар олон нийтэд тогтмол мэдээлж байна” гэсэн ч өнөөдрийг хүртэл дээрх мэдээллүүдийн талаар олон нийтэд хүргэхгүй байгаагаас улс төрийн хүрээнд болоод олон нийтэд хардлага төрүүлээд байгаа юм.

Тиймээс Үндсэн хуулийн Цэцийн дарга Г.Баясгалан дараах гурван асуултад хариулт өгнө үү.

Нэгт, Үндсэн хуулийн Цэцэд 2023 оны дөрөвдүгээр сарын 20-ны өдөр иргэн Н, 2024 оны нэгдүгээр сарын 16-ны өдөр иргэн Х нар мэдээлэл гаргасан эсэх.

Хоёрт, Дээрх иргэдийн мэдээллийн дагуу Үндсэн хуулийн Цэцийн гишүүд маргаан үүсгэсэн эсэх.

Гуравт, энэхүү мэдээлэл, маргааныг хянаж буй Үндсэн хуулийн Цэцийн нэр бүхий гишүүн УИХ-аас тайлбар авсан эсэх.

Эдгээр асуултад хариулт өгөхийг хүсэж байна.

Уг нь Үндсэн хуулийн Цэц бол Үндсэн хуулийн манаач, харин Үндсэн хуулийг “оролдох” эрхгүй. Тэр утгаараа, нэгэнт нийгэмд дэлгэгдээд, яригдаад явж байгаа дээрх мэдээлэл нь Үндсэн хуулийн Цэц, түүний дарга, гишүүд болон хэвлэл мэдээллийн байгууллага, сэтгүүлч сурвалжлагчийн хоорондын асуудал биш юм.

Угтаа Үндсэн хуультай холбоотой аливаа асуудлыг Монгол Улсын иргэд мэдэх эрхтэй. Хэвлэл мэдээллийн байгууллагууд энэ талаар мэдээлэх үүрэгтэй.

Гэтэл, Үндсэн хуулийн Цэц мэдэгдэлдээ  “…“Хэвлэл мэдээллийн зөвлөл”-өөс баталсан “Хэвлэл мэдээллийн ёс зүйн зарчим”-д олон түмэнд үнэнд нийцсэн мэдээлэл хүргэх нь сэтгүүл зүйн эрхэм дээд үнэт зүйл байх бөгөөд тус зарчмын 1.1-д “Мэдээлэл нь үнэнд нийцсэн эсэхийг баталгаажуулж, санамсаргүй алдаа гаргахаас зайлсхийнэ”, 1.2-т “Эх сурвалжийн баталгаатай эсэхийг нягталж, тодорхой дурдахыг эрмэлзэнэ”, 1.8-д “Буруутгагдсан, шүүмжлэгдсэн этгээдэд тайлбар өгөх боломж олгоно”, 2.1-т “Сэтгүүлч өөрийгөө танилцуулах, ил тодоор ажиллах нь энэхүү мэргэжлийн үндсэн зарчим болно”, 9-д ”Төлбөрт нийтлэл, нэвтрүүлгийг тусгай тэмдэг, тэмдэглэгээгээр ялгана” гэж заажээ. Иргэн үзэл бодлоо чөлөөтэй илэрхийлэх, үг хэлэх, хэвлэн нийтлэх эрх чөлөөтэй ч хэвлэл, мэдээллийн байгууллага дээрх ёс зүйн зарчмыг хэлбэрэлтгүй мөрдөх нь хариуцлагатай сэтгүүл зүйг төлөвшүүлэх, иргэдийн мэдэх эрхийг хангахад туйлын чухал гэж үзэж байна” гэжээ.

Үүгээрээ Монгол Улсын Үндсэн хууль, монгол хүний үндсэн эрхтэй шууд холбоотой мэдээллийг нийтэлж, хүргэсний төлөө Үндсэн хуулийг хамгаалагч Үндсэн хуулийн Цэц нь сэтгүүл, хэвлэл мэдээллийн байгууллагатай ёс зүй ярьж, улмаар Үндсэн хуулиар олгогдсон хэвлэл нийтлэх эрх чөлөөнд халдахыг оролдлоо.

Учир нь Хэвлэл мэдээллийн эрх чөлөөний тухай хууль 1 дүгээр зүйлд “…Энэ хуулийн зорилт нь Монгол Улсын Үндсэн хуульд заасан хүний үзэл бодлоо чөлөөтэй илэрхийлэх, үг хэлэх, хэвлэн нийтлэх эрх чөлөөг баталгаажуулахад оршино” гэж заасан.

Улмаар 3 дугаар зүйлийн 3.1-т “…Хэвлэл мэдээллийн хэрэгсэл нь өөрийн нийтэлж, нэвтрүүлж байгаа зүйлийнхээ төлөө хариуцлага хүлээнэ. Төрөөс олон нийтийн мэдээллийн агуулгад хяналт /цензур/ тогтоохгүй” гэсэн байдаг.

Мөн Үндсэн хуулийн 16 дугаар зүйлийн 16-д “…Монгол Улсын иргэн итгэл үнэмшилтэй байх, үзэл бодлоо чөлөөтэй илэрхийлэх, үг хэлэх, хэвлэн нийтлэх, тайван жагсаал, цуглаан хийх эрх чөлөөтэй” гэж заасан.

Түүнчлэн Үндсэн хуулийн Цэцийн зарим нэр бүхий гишүүн ингэж ёс зүй ярих эрх бий юу. Энэ цаашдаа Үндсэн хуулийн Цэцэд хэн байх вэ гэдгээр илэрч яригдах учиртай юм.

 

Эх сурвалж: “Зууны мэдээ” сонин

2024 ОНЫ АРАВДУГААР САРЫН 1. МЯГМАР ГАРАГ. № 190 (7434)

Categories
мэдээ нийгэм цаг-үе

Тасганы овооны уулзвараас 7 дугаар хорооны уулзвар хүртэлх авто замыг хааж, шинэчилнэ DNN.mn

Чингэлтэй дүүргийн 7, 8-р хорооны нутаг дэвсгэр Хувьсгалчдын гудамжны авто зам, Тасганы овооны уулзвараас 7 дугаар хорооны уулзвар хүртэлх авто замын засвар, шинэчлэлт хийх гэж байна.

Тус замыг 2024 оны 10 дугаар сарын 1-ний өдрийн 22:00 цагаас 2024 оны 10 дугаар сарын 4-ний өдрийн 06:00 цагийн хооронд хааж засварлана.

Иймд иргэд, жолооч та бүхэн бусад замыг сонгон хөдөлгөөнд оролцоно уу.

Categories
мэдээ спорт цаг-үе

Жүдогийн залуучуудын ДАШТ-д Монголын 14 тамирчин өрсөлдөнө DNN.mn

Энэ сарын 2-ноос 6-ныг дуустал Тажикистаны улсын Душанбе хотод жүдогийн залуучуудын ДАШТ болно.

Уг тэмцээнд оролцохоор 67 орны 534 жүдоч (292 нь эрэгтэй, 242 эмэгтэй) өрсөлдөхөөр бүртгүүлжээ.

ЭРЭГТЭЙ

  • 60 кг: Ө.Жанцандорж, М.Тэргэлсар
  • 66 кг: Б.Мөнгөнхуяг
  • 73 кг: Ж.Энхтөр
  • 81 кг: Н.Жангарай
  • +100 кг: О.Гэрэлтбаяр

ЭМЭГТЭЙ

  • 48 кг: Ж.Анударь
  • 52 кг: М.Нандин-Эрдэнэ, Б.Уранзаяа
  • 57 кг: Т.Ариунзаяа, О.Оюунчимэг
  • 63 кг: Д.Есүй
  • 70 кг: Б.Ням-Эрдэнэ
  • -78 кг: О.Хүслэн
Categories
мэдээ нийгэм цаг-үе

Вьетнам улсын Засгийн газарт 200 мянган ам.долларын хүмүүнлэгийн тусламж олгохоор шийдвэрлэв DNN.mn

Ерөнхий сайд Л.Оюун-Эрдэнэ манай улсад төрийн айлчлал хийж буй Бүгд Найрамдах Социалист Вьетнам Улсын Ерөнхийлөгч бөгөөд Коммунист Намын Ерөнхий нарийн бичгийн дарга То Лам-д өнөөдөр бараалхлаа.

Уулзалтын үеэр ерөнхий сайд Л.Оюун-Эрдэнэ Монгол Улсын Ази, Номхон далайн бүс нутагт чиглэсэн гадаад бодлогод Зүүн өмнөд Азийн улс орнууд, түүний дотор БНСВУ-тай хөгжүүлж буй харилцаа, хамтын ажиллагаа чухал байр суурь эзэлдгийг цохон тэмдэглээд, энэ хүрээнд тус улстай худалдаа, эдийн засгийн харилцан ашигтай хамтын ажиллагааг өргөжүүлэн хөгжүүлэхийн төлөө байгаагаа илэрхийлэв.

Мөн манай хоёр улс өнгөрсөн хугацаанд “Найрамдалт хамтын ажиллагааны зарчим”-д тулгуурлан найрсаг харилцаа, хамтын ажиллагааг тогтвортой хөгжүүлж ирснийг дурдаад, энэ онд тохиож буй дипломат харилцаа тогтоосны 70 жилийн ойн хүрээнд Вьетнам Улсын төрийн тэргүүний Монгол Улсад хийж буй энэхүү төрийн айлчлалаар хоёр орны харилцааны түвшинг шат ахиулан “Иж бүрэн түншлэл”-ийн түвшинд хүргэж буйд баяртай байгаагаа илэрхийлэв.

Ерөнхий сайд Л.Оюун-Эрдэнэ “хоёр орны төрийн тэргүүн нарын ярьж тохирсон санал, санаачилгуудыг бодит ажил хэрэг болгох, Ханой хотноо энэ оны арваннэгдүгээр сард зохион байгуулагдах Худалдаа, эдийн засаг, шинжлэх ухаан, техникийн Монгол, Вьетнамын Засгийн хоорондын комиссын XIX хуралдааныг үр ашигтай зохион байгуулах чиглэлд хоёр улсын Засгийн газар нягт хамтран ажиллана гэдэгт итгэлтэй байна” гэлээ.

Хоёр орны харилцааг эдийн засгийн бодит агуулгаар баяжуулж, харилцан ашигтай хамтын ажиллагааг эрчимжүүлэх хүрээнд тээвэр, ложистикийн саад тотгорыг арилгах, хоёр улс хоорондын агаарын харилцааг өргөжүүлэх, шууд нислэг үйлдэх замаар аялал жуулчлал, иргэдийн солилцоог нэмэгдүүлэх чиглэлд хамтран ажиллах болсныг талууд сайшаан тэмдэглэв.

Хүнд бэрх цаг үед монгол, вьетнамын ард түмэн харилцан бие биеэ дэмжиж ирсэн сайхан уламжлалтайг Ерөнхий сайд онцлоод Вьетнам Улсад сүүлийн 30 жилд тохиогоогүй хүчтэй хар шуурга болж, их хэмжээний хохирол учирсантай холбогдуулан Монгол Улсын Засгийн газраас Вьетнам Улсын Засгийн газарт 200 мянган ам.долларын хүмүүнлэгийн тусламж олгохоор шийдвэрлэснийг мэдэгдлээ.

 

Эх сурвалж: Монгол Улсын Засгийн Газар