Month: September 2024

“Монгол, Хятадын найрамдлын нийгэмлэг”(МХНН), БНХАУ-аас Монгол Улсад суугаа ЭСЯ-наас хамтран 2024 оны есдүгээр сарын 20-нд нийслэл Улаанбаатар хотноо жил бүрийн уламжлалт “Монгол, Хятадын Найрамдлын өдрүүд”-ийг эхлүүлж байна.

Энэ нь Монгол Улс, БНХАУ-ын хооронд дипломат харилцаа тогтоосны 75 жил, БНХАУ байгуулагдсаны 75 жилийн ойг тус тус тэмдэглэн өнгөрүүлэх хүрээнд тохиож буйгаараа онцлог ач холбогдолтой юм.

Эдгээр арга хэмжээг угтуулан тус нийгэмлэгээс 9 дүгээр сарын 18-ны өдөр Монгол Улсын ГХЯ, БНХАУ-аас Монгол Улсад суугаа ЭСЯ ба “Нэг бүс нэг зам” судалгааны төвтэй хамтран “БНХАУ–ын Ногоон хөгжлийн ололт ба Монголын боломж” сэдэвт эрдэм шинжилгээний хурал Гадаад харилцааны яаманд зохион байгуулна.

“Найрамдлын 75 жил” гэрэл зургийн үзэсгэлэнг Чингис хаан үндэсний музейн Төв үзэсгэлэнгийн танхимд 9 дүгээр сарын 20-27 өдрүүдэд олон нийтэд дэлгэж толилуулна.

Мөн “Монгол, Хятадын найрамдлын 7 хоног”-ийн болон “БНХАУ-ын ТӨЗО-ны хөгжил цэцэглэлт” гэрэл зургийн үзэсгэлэнгийн нээлтийг Монголын Урчуудын Эвлэлийн Үзэсгэлэнгийн танхимд 9 дүгээр сарын 23-нд хийнэ. Уг үзэсгэлэн 9 дүгээр сарын 30 хүртэл  гарна. Энэ удаа БНХАУ-ын Т Ө З О-ны хүндэт зочид, төлөөлөгчид хүрэлцэн ирж оролцож буй нь уг арга хэмжээний агуулга, хүрээг өргөтгөж байгаа болно.

Түүнчлэн 9 дүгээр сарын 24-нд Гадаад харилцааны яамны Зөвшилцөл танхимд “Иж бүрэн стратегийн түншлэлийн харилцаа хөгжүүлэх тухай хамтарсан тунхаглал ба Монгол, Хятадын харилцаа” сэдэвт эрдэм шинжилгээний хурал болно.

Дээрх өдрүүдэд тус нийгэмлэгээс “Монгол, Хятадын харилцаа, хэтийн төлөв” сэдэвт дугуй ширээний хэлэлцүүлэг, ярилцлагыг Монголын Үндэсний Олон Нийтийн телевиз болон Радиогоор зохион явуулна.

Хятадын нэрт зохиолч Лиү Жэньюаний “Гурван намраас урт ганц өдөр” романы монгол орчуулгын нээлт 9 дүгээр сарын 25-нд Улаанбаатар дахь Хятадын соёлын төвд, мөн зохиолчийн уншигчид, оюутан залууст зориулсан лекц, уулзалт 9 дүгээр сарын 26-нд МУИС-д тус тус зохион байгуулагдана.

Үүнээс гадна “Монгол, Хятадын хөдөө аж ахуйн шинжлэх ухаан, технологийн салбарын хамтын ажиллагаа” сэдвээр Академич А. Бакей олон нийтийн хэвлэл, мэдээллийн хэрэгсэлд ярилцлага өгнө.

Найрамдлын өдрүүдийн хүрээнд БНХАУ-ын орчин цагийн дижитал хөгжлийн тухай мэдээ, мэдээлэл, танилцуулга болон цөлжилттэй тэмцэж буй туршлагаас олон нийтэд хүргэх болно.

Жил бүрийн уламжлалт “Монгол, Хятадын найрамдлын 7 хоног” нь найрамдалт хоёр орны соёл, хүмүүнлэгийн салбар, орон нутгийн харилцаа хийгээд ардын дипломатын үйл ажиллагааг өргөтгөн хөгжүүлэхэд дэмжлэг үзүүлэх, улмаар ард түмний хоорондын харилцан танин мэдэхүй, харилцан ойлголцол, харилцан итгэлцлийг гүнзгийрүүлэх, бэхжүүлэх үйлсэд чухал үүрэг гүйцэтгэж байгаа билээ.

Монгол, Хятадын найрамдлын элчээр Мазаалай, Панда хоёрыг анх 2022 онд өргөмжилснөөс хойш эдгээр ховордсон амьд байгалийн өвийг жил бүр тэмдэглэх найрамдлын өдрүүдийн бэлэгдэл болгосон билээ.

Улсын хэмжээнд томуугийн дархлаажуулалт 50 хувьтай байна.

Улсын хэмжээнд өнгөрсөн сараас зорилтот бүлгийнхэнд томуугийн вакциныг хийж эхэлсэн. Одоогийн байдлаар 45 мянга гаруй иргэнийг дархлаажуулаад байна.

“Бридж Моторс” ХХК-ны зүгээс үндэсний баяр наадмын долоогийн даваанд тунан барилдан давсан Сэлэнгэ аймгийн Цагаан Нуур сумын Уугуул Монгол улсын Арслан Баярсайханы Орхонбаярт намрын дунд сарын билэгт сайн өдрийг сонгон 4 дэх “Заан Жимни” бай шагналыг гардуулан өглөө.

Уг арга хэмжээнд  “Бридж Корпорац”-ын  ТУЗ-ийн дарга Д.Ганхуяг, “Монголын Үндэсний бөхийн Холбоо”-ны Ерөнхий менежер С.Гантөр, “Бридж Корпорац”-ын Гүйцэтгэх захирал Ө.Батзориг, “Бридж Моторс ХХК” Гүйцэтгэх захирал Н.Батбаяр болон бусад удирдлагын баг бүрэлдэхүүн оролцон, залуу арсланд баяр хүргэлээ.

Жимни нь дэлхийд хамгийн авсаархан оффроуд автомашин гэдгээрээ өндөр үнэлэгддэг ба Өмнөд Америкийн ноён оргил Чили Улсын Охос дель Саладо уулын 6688м-ийн өндөрт гарснаар дэлхийн дээд амжилтыг тогтоож, Гиннесийн номд бүртгэгдсэн юм.

Монгол Улсын Ерөнхий сайд Л.Оюун-Эрдэнэ “Сэлбэ дэд төв”-ийг түшиглэсэн гэр хорооллыг орон сууцжуулах төслийн  бэлтгэл ажилтай танилцлаа. “Сэлбэ дэд төв” 20 минутын хот бодлогын жишиг хот болох юм. Нийтдээ 158 га газрыг хамрах бөгөөд 12 мянган айлын орон сууц, цэцэрлэг, сургууль, эмнэлэг зэрэг нийгэм, соёлын барилга байгууламж цогцоор баригдана. Энэ хотын 40 хувь нь ногоон байгууламж байхаар төлөвлөжээ. Нийт 2206 айлын газрыг чөлөөлөхөөс одоогоор 1500 айлынхыг чөлөөлөөд байна. “Сэлбэ дэд төв” орчмыг орон сууцжуулах төслийн ТЭЗҮ, барилгажилтын төсөл, олон улсын зөвлөх үйлчилгээ, зураг төсөл боловсруулах гэрээ байгуулжээ. Гэрээт ажлын хүрээнд эхний ээлжийн барилгажилтын төсөл болох Сүхбаатар дүүрэг дэх 10 га, Чингэлтэй дүүрэг дэх 13 га газрын төлөвлөлтийг батлуулсан байна. “Сэлбэ дэд төв”-ийн дэд бүтцийн ажил бүрэн дуусчээ.  Энэ онд багтаж газар чөлөөлөлтийг дуусгаж 1184 өрхийн орон сууцны барилгын ажлыг эхлүүлж, шат дараатайгаар бүтээн байгуулалтыг хийнэ. Тус төсөл 2028 онд хэрэгжиж дуусна. Дараагийнх нь “Баянхошуу дэд төв” байх бөгөөд одоогоор Сэлбэ, Баянхошуу дэд төвүүдийн инженерийн шугам сүлжээний ажил бүрэн дууссан байна.

Ерөнхий сайд Л.Оюун-Эрдэнэ “Сэлбэ дэд төв”-ийн бүтээн байгуулалттай танилцах үеэрээ “Улаанбаатар хотын 2040 он хүртэлх хөгжлийн ерөнхий төлөвлөгөө”-нөөс гажихгүйгээр ажлаа хийхийг санууллаа. Орон сууцны хороолол барихад эмнэлэг, сургууль, цэцэрлэг, ногоон байгууламж зэргийг бүрэн төлөвлөн иргэд таатай амьдрах нөхцөлийг бүрдүүлж, иргэд түгжрэхгүй, 20 минутад төрийн бүх үйлчилгээ авах боломжийг бүрдүүлэх нь Засгийн газрын бодлого гэдгийг хэллээ. Мөн 1992-2021 он буюу сүүлийн 30 жилд нийслэлд 11.5 их наяд төгрөгийн хөрөнгө оруулалт хийгдсэн бол Засгийн газраас 2024-2028 онд үүнээс хоёр дахин их хэмжээний хөрөнгө оруулалт хийхээр төлөвлөж байна. 20 минутын хот бодлогын эхний жишиг нь Сэлбэ дэд төв байх бөгөөд цаашид Толгойт, Шархад, Дэнжийн 1000, Дамбадаржаа, Яармаг дэд төвүүдийг түшиглэн хот байгуулж нийслэл дэх хэт төвлөрөл, түүнээс үүдэлтэй түгжрэл, агаар, орчны бохирдлын асуудлыг бүрэн шийдвэрлэхийг зорьж байна. Энэ ажилд хувийн хэвшлийг татан оролцуулж, нийгэмд чиглэсэн хөрөнгө оруулалт хийвэл татварын бодлогоор дэмжинэ гэлээ.

Нийслэлийн Засаг дарга бөгөөд Улаанбаатар хотын Захирагч Х.Нямбаатар “Бид ирэх сард багтаан нийт 158 га талбайд баригдах 12 мянган орон сууцны гүйцэтгэгчийг шалгаруулах тендер зарлаж, сонгон шалгаруулалтыг энэ онд дуусгах төлөвлөгөөтэй байна.  “Сэлбэ дэд төв”-ийн дараа Чингэлтэй, Хайлааст, Таван буудал, Дарь-Эх, Дамбадаржаа орчмын айлуудтай газраа байраар солих арилжааны хэлэлцээр хийнэ. Ингэснээр цаашид гэр хорооллыг орон сууцжуулахад газрын нөөц сан бүрдэнэ. “Сэлбэ дэд төв”-ийг нийслэлийн бондоор санхүүжүүлнэ. Удахгүй Баянхошуу, Ханын материал орчмын төлөвлөлтийг олон нийтэд танилцуулна.  Баянхошуунд 800 айлын орон сууц баригдаж байгаа бөгөөд нийтдээ 1700 айлын орон сууц баригдана гэлээ.
“Сэлбэ дэд төв”-ийн бүтээн байгуулалт дуусаж хот болсноор дотоодын нийт бүтээгдэхүүн 2.5 их наяд төгрөгөөр нэмэгдэж, 25,295 ажлын байр бий болно. Агаарын бохирдол 22 хувь, авто замын түгжрэл 36.3 хувиар буурах тооцоолол гарчээ.