“Хөгжлийн бэрхшээлтэй хүний зогсоол дээр машинаа тавьсан залуу шаардлага тавьсан тэргэнцэртэй иргэнийг цохисон” гэх агуулга бүхий дүрс бичлэг цахим орчинд гараад байна.
Маргалдсаны улмаас нэгнийхээ биед халдсан энэ асуудлыг ЦЕГ “Энэ талаарх дуудлага мэдээлэл долдугаар сарын 31-нд цагдаагийн байгууллагад ирсэн. Хан-Уул дүүргийн цагдаагийн хоёрдугаар хэлтсийн бүртгэлд орсон байна. Хэрэг зөрчлийг үргэлжлүүлэн шалгаж байгаа” гэлээ.
ЭМЯ-наас Улаанбурхан өвчний тохиолдол батлагдсантай холбогдуулан цаг үеийн асуудлаар мэдээлэл хийлээ.
Энэ талаар ХӨСҮТ-ийн захирал Ж.Байгалмаа “Тухайн иргэн нь Монгол Улсад амьдардаггүй, Казахстан улсад амьдардаг. Монголд ирснээс хойш улаанбурхан өвчний шинж тэмдэг илэрч ХӨСҮТ-д тусгаарласан. Мөн одоогоор ойрын хавьтлын 52 хүнийг илрүүлсэн ба тэдний хавьтлууд болох 100 гаруй хүнийг тодорхойлон халдвараас сэргийлэх үүднээс вакцинжуулах ажлыг эрчимжүүлж байна. Хавьтал болсноос хойш 72 цагийн хугацаанд улаанбурхан өвчний эсрэг дархлаажуулалт хийх шаардлагатай байдаг” гэв.
Гадаад харилцааны сайд Б.Батцэцэг, Америкийн Нэгдсэн Улсын Төрийн нарийн бичгийн дарга Энтони Блинкен нар 2024 оны 8 дугаар сарын 1-ний өдөр албан ёсны хэлэлцээ хийв.
АНУ-ын Төрийн нарийн бичгийн дарга Э.Блинкен Гадаад харилцааны сайд Б.Батцэцэгийн урилгаар Монгол Улсад албан ёсны айлчлал хийж байгаа бөгөөд энэ нь АНУ-ын Төрийн нарийн бичгийн даргын түвшинд Монгол Улсад 8 жилийн дараа хэрэгжиж буй айлчлал юм.
УИХ-ын гишүүн Монгол Улсын сайд, ЗГХЭГ-ын дарга Н.Учрал, УИХ-ын гишүүн, Эрүүл мэндийн сайд Т. Мөнхсайхан нар өчигдөр улсын төсвийн хөрөнгө оруулалтаар Сүхбаатар дүүргийн гуравдугаар хороонд баригдаж буй Сүхбаатар дүүргийн Эрүүл мэндийн төвийн Салбар амбулаторийн барилгын ажлын явцтай газар дээр нь танилцаж, барилгын ажил удааширсан шалтгаан, тулгамдаж буй асуудал, асуудлыг хэрхэн шийдвэрлэх талаар холбогдох албаны хүмүүстэй уулзжээ.
Энэхүү барилгын ажлыг Эрүүл мэндийн яамны захиалгаар “Кенжикү” ХХК гүйцэтгэхээр шалгарч, барилгын ажил 2020 онд эхэлсэн хэдий ч одоог хүртэл ашиглалтад ороогүйгээс Сүхбаатар дүүргийн Эрүүл мэндийн төвийн эмнэлгийн тусламж үйлчилгээний ачаалал нэмэгдэж, тусламж үйлчилгээний тэгш бус хүртээмж үүссэн төдийгүй Салбар амбулаторийн үйлчлэх хүрээний иргэд болох Сүхбаатар дүүргийн 1-6 дугаар хорооны 35 мянга орчим иргэн эмнэлгийн тусламж үйлчилгээ авахад хүндрэл чирэгдэлтэй тулгарч байна.
Үүнтэй холбогдуулан УИХ-ын гишүүн Монгол Улсын сайд, ЗГХЭГ-ын дарга Н.Учрал, УИХ-ын гишүүн, Эрүүл мэндийн сайд Т. Мөнхсайхан нар тус барилгын ажлын гүйцэтгэгч компанид 2024 оны аравдугаар 1-ний өдөр гэхэд барилгын ажлыг бүрэн дуусгаж, ашиглалтад оруулах талаар үүрэг даалгавар өгч, тус компанитай харилцан тохиролцлоо.
Сайд нар барилгын ажлын гүйцэтгэлийн ажилтай зэрэгцэн Салбар амбулаторийн тусламж үйлчилгээг эхлүүлэх төлөвлөлтийг яаралтай хийж, шаардлагатай нөөцүүдийг тодорхойлж, бэлэн байдлаа хангах талаар холбогдох байгууллагуудын удирдлагуудад чиглэл өгөв. Түүнчлэн Сүхбаатар дүүргийн Засаг даргын Тамгын газраас Салбар амбулаторит шаардлагатай тоног төхөөрөмжөөр хангахад дэмжлэг үзүүлнэ гэдгээ илэрхийлэв.
Өнөөдөр буюу долдугаар сарын 31-ний өдрийн байдлаар Хэнтий нурууны баруун хажуугаас усжих Туул /Лүн/, зүүн хажуугийн Балж,Онон /Дадал/, Их Хянганы нуруунаас эхтэй Халх, Хангай нурууны арын Хануй, Урдтамир, Хойттамир, Орхон /Хархорин/, өврийн Онги /Сайхан-Овоо/ зэрэг голуудын усны түвшин өмнөх өдрийнхөөс 5-20 см нэмэгдсэн байна.
Туул / нийт уртын дагуудаа/, Эг, Хэрлэн / дунд болон адаг хэсгээрээ/, Халх зэрэг голууд үерийн түвшинг 10-35 см, Туул /Лүн/, Хурх, Балж, Онон, Улз, Хэрлэн гол Мөнгөнморьт сум Багануур дүүрэг орчимд үерийн аюултай түвшинг 15-100 см даван тус тус хүчтэй үерлэж байна.
Мөн түүнчлэн Алтай нуруунаас эхтэй Ховд, Буянт, Увс нуурын савын Хархираа гол үерийн түвшинг 5-20 см давсан байдалтай байна.
Маргааш буюу наймдугаар сарын 1-нд Халх гол Ялалт баг орчимд усны түвшин 15 см, Туул гол Лүн сум орчимд 5 см, Хэрлэн гол Өндөрхаан-Чойбалсан хот орчимд 5-10 см тус тус нэмэгдэх хандлагатай байна.
Иймд дээрх голуудын эрэг хөвөө дагуу суурьшиж буй малчид, аялаж амарч яваа ард иргэдийг үерийн аюулаас сэрэмжтэй байж Ус, цаг уурын байгууллагаас өдөр бүр гаргаж буй мэдээлэл, сэрэмжлүүлэгийг байнга, онцгой анхаарч байхыг сануулж байна.
2021 онд “Netflix” стриминг үйлчилгээгээр үзэгчдийн хүртээл болж бүх цаг үеийн шилдэг цувралын эхэнд бичигдэж байсан “Squid Game” цувралын шинэ бүлэг арванхоёрдугаар сарын 26-нд нээлтээ хийх болсныг Netflix компани зарлалаа.
Тус киноны найруулагч Хван Дон Хюгийн хэлж буйгаар цувралын гурав дахь буюу сүүлийн бүлэг 2025 онд гарна.
“Парис-2024” олимпийн хийн гар бууны төрөлд оролцсон тусгай зориулалтын нүдний шил, чихний хамгаалалтгүйгээр нэг гараараа буудсан Туркийн тамирчны зураг, бичлэг цахим орчинд шуугиан дэгдээгээд байна.
Тухайлбал, 51 настай Юсуф Дикечийн ямар ч нэмэлт хэрэгсэлгүй буюу тусгай линз, нүдний шилгүй, чихний хамгаалалтгүй, харин энгийн нүдний шил, чихний хөвөнтэй гараа халаасандаа хийж байгаад буудсан юм.
Олимпийн наадамд оролцож буй ихэнх тамирчид буудахдаа чихний хамгаалалт хэрэглэж, нэг нүдний харааг бүрхүүлдэг тусгай нүдний шил зүүж, хурц гэрлийг арилгах өнгөт линзтэй байдаг.
Нийслэлийн хүн амыг эх орны хөрсөнд ургасан төмс, хүнсний ногоогоор хангах зорилгоор “Намрын ногоон өдрүүд” хүнсний ногооны өргөтгөсөн худалдааг өнөөдрөөс эхлүүлжээ.
Иргэд хүнсний ногоогоо нөөцлөх, нөөшлөх боломжийг бий болгох, нийлүүлэлтийг нэмэгдүүлэх зорилготой өргөтгөсөн худалдаа есөн дүүргийн 21 байршилд болж байна.
Улаанбаатар хотын ойрын өдрүүдийн цаг агаарын төлөв байдлыг ЦУОШГ-ын Технологич инженер С.Батбаяраас тодрууллаа.
Өнгөрсөн шөнө буюу долдугаар сарын 31-нээс наймдугаар сарын 1-нд шилжих шөнө нутгийн төв хэсгээр усархаг аадар орлоо. Улаанбаатар хот орчмоор аадар бороо өнөөдөр шөнөдөө үргэлжилж орох төлөвтэй байна. Харин наймдугаар сарын 2, 3-ны өдрүүдэд Хэнтийн уулархаг нутгаар аадар бороо үргэлжилж орно. Иймд Хэнтийн уулсаас эхтэй томоохон голууд үерлэх магадлалтай учир голын ай сав дагуу нутаглаж байгаа иргэд болзошгүй үер усны аюулаас сэрэмжтэй байхыг анхааруулж байна.
НОБГ-ын гамшгаас урьдчилан сэргийлэх хэлтсийн дарга Дэд хурандаа Д.Хадбаатар:
– Ойрын өдрүүдэд тур зуурын бороо орох төлөвтэй байгааг ЦУОШГ-аас мэдээлсэн. Өнгөрсөн долоо хоногт орсон борооны улмаас Туул, Тэрэлж голын усны түвшин эрс нэмэгдэж үерийн аюултай түвшинд хүрээд байна. Үүнтэй холбогдуулан НОБГ-аас Нийслэлийн Засаг даргын баталсан захирамжийн дагуу гол усны аюулаас урьдчилан сэргийлэх чиглэлээр завьт эргүүлийн алба хаагчид өглөө 08:00 цагаас 22:00 цаг хүртэл Туул, Тэрэлж гол дагуу эргүүл шалгалт хийж, иргэдэд сэрэмжлүүлэг мэдээллийг өгч ажиллаж байна. Өчигдөр буюу долоодугаар сарын 31-ний өдөр анхаарал болгоомжгүй үйлдлийн улмаас хоёр иргэн иргэн золгүй байдлаар усанд осолдож, эндсэн. Тухайн иргэдийг эрэн хайх үйл ажиллагаа явуулж холбогдох байгууллагад хүлээлгэн өгсөн. Иймд иргэн, аж ахуйн нэгж байгууллагууд мэргэжлийн байгууллагуудаас өгч буй сэрэмжлүүлэг мэдээллийг цаг тухай бүрд нь авч, согтууруулах ундаа хэрэглэсэн үедээ гол, ус руу ойртохгүй байж, болзошгүй үерийн аюулаас урьдчилан сэргийлэхийг анхааруулж байна.
Ерөнхийлөгч У.Хүрэлсүх “Шинэ Хархорум” хотын Хөгжлийн ерөнхий төлөвлөгөөний үзэл баримтлал /концепц/-ыг боловсруулах олон улсын нээлттэй сонгон шалгаруулалтын үзэсгэлэнтэй танилцлаа.
Монгол Улсын Ерөнхийлөгч хэлсэн үгэндээ, Их эзэн Чингис хаан, түүнийг залгамжилсан их хаадын суу алдар, үйл хэрэг, билиг сургаалыг эрхэмлэн дээдэлж, даган мөрдөж, төрт ёсны үнэт зүйл, өв соёлыг үр хойчдоо өвлүүлэн үлдээж, дэлхий дахинд сурталчлан таниулж, түгээн дэлгэрүүлэх нь Их Монгол Улсын гал голомтыг сахин суугаа монголчуудын эрхэм үүрэг гэдгийг онцоллоо. Монгол Улсын урт хугацааны хөгжлийн бодлого “Алсын хараа 2050”-д “2021-2030 онд Орхоны хөндийд шинэ хотын байршлыг тодорхойлж, Техник, эдийн засгийн үндэслэл, хөгжлийн ерөнхий төлөвлөгөө боловсруулж, бүтээн байгуулалтын ажлыг эхлүүлнэ” гэж заасныг дурдав. Иймд Монгол Улсын Ерөнхийлөгч Монголын эртний төрт улсуудын ариун гал голомт болсон дэлхийн үнэт өв, түүх, соёлын дурсгалт газар Орхоны хөндийд Их Монгол Улсын нийслэл Хархорум хотыг сэргээн байгуулах зарлиг гаргасан гэдгийг тэмдэглэж, зарлигийн хэрэгжилтийг хангах хүрээнд цаашид ажлаа эрчимжүүлэх шаардлагатай байгааг онцлов. Шинэ Хархорум хотыг өвөг дээдсийн байгуулсан төрт ёс, түүх, соёлын үнэт зүйлийг шингээсэн, тогтвортой хөгжлийг дэмжсэн, нүүдлийн болон суурин иргэншлийг орчин үеийн чиг хандлагатай хослуулсан, аялал жуулчлал, засаг захиргааны төв болсон эко, ухаалаг хот байхаар төлөвлөх учиртайг тодотголоо. Энэхүү түүхэн бүтээн байгуулалт нь ихээхэн цаг хугацаа, төсөв хөрөнгө, хөдөлмөр, зүтгэл шаардах бөгөөд төр засаг, түмэн олноороо нэгдэн нийлж, нэгэн зорилгын төлөө тууштай зүтгэж чадвал Шинэ Хархорум хотоо сэргээн байгуулж чадна гэлээ. Түүнчлэн “Шинэ Хархорум” хотын Ерөнхий төлөвлөгөөний үзэл баримтлал /концепци/ боловсруулах олон улсын нээлттэй сонгон шалгаруулалтад бүтээлээ ирүүлж, Улаанбаатар хотноо зохион байгуулж буй Хот төлөвлөлтийн олон улсын үзэсгэлэнд идэвхтэй оролцож буй хот төлөвлөлтийн мэргэжилтэн, архитектор, инженер, эрдэмтэн, судлаачид болон шүүгчид, нийт зохион байгуулагчдад гүн талархал илэрхийлж, амжилт хүслээ. Олон улсын нээлттэй сонгон шалгаруулалтын хоёрдугаар шатанд тэнцсэн 36 багийн бүтээлийг олон нийтэд танилцуулж, санал авах зорилгоор долдугаар сарын 28-ны өдөр нээсэн хот төлөвлөлтийн үзэсгэлэн өнөөдөр өндөрлөж, шилдэг таван багийн бүтээлийг 2024 оны наймдугаар сарын 1-ний өдөр эцэслэн шалгаруулна. Сонгон шалгаруулалтын хоёрдугаар шатанд БНХАУ, ОХУ, Турк, Австрали, Итали, БНСУ, Их Британи, Казахстан, Польш, Болгар, Бруней, Мексик, Бангладеш, Сингапур, Индонез, Хорват, Серби зэрэг улсын 36 багийн бүтээл шалгараад байгаа юм.