Month: May 2024

Монгол Улстай хиллэдэг БНХАУ, ОХУ-ын боомтуудын ажиллах болон түр хаах хуваарийг Гаалийн байгууллагаас танилцууллаа.

Энэ сард агаарын болон төмөр замын боомтууд өдөр бүр ажиллах бол авто замын зарим боомт түр хаагдах юм байна.

Тодруулбал ОХУ-тай хиллэдэг Цагааннуур, Арцсуурь, Тэс, Боршоо, Ульхан боомт тавдугаар сарын 1-нээс гадна ялалтын баярын өдрүүдэд түр хаах бол БНХАУ-тай хиллэдэг Замын-Үүд, Хавирга, Ханги, Булган, Гашуунсухайт, Шивээхүрэн, Бургастай, Бичигт, Баянхошуу, Сүмбэр авто замын боомтыг өнөөдрөөс эхлэн тавдугаар сарын 4-нийг хүртэл түр хаажээ. Энэ нь олон улсын хөдөлмөрчдийн баяр тохиож буйтай холбоотой байна.

Монгол Улсад Бурхан багшийн их дүйчин өдөр буюу бүх нийтийн амралтын өдөр тавдугаар сарын 23-нд тохиох тул эдгээр авто замын боомт түр хаагдана.

2023 оны хичээлийн жилээс сурагчид дөрвөн улирал хичээллэж эхэлсэн билээ.

ЕБС-ийн сурагчдын амралтын хуваарийг танилцуулж байна.

• I-II ангийн сурагчид зургадугаар сарын 1-нд амарна
• III-V ангийн сурагчид зургадугаар сарын 8-нд амарна
• VI-XII ангийн сурагчид зургадугаар сарын 15-нд амарна.

Монгол Улсын Их Хурлын сонгуулийн тухай хуулийн 25 дугаар зүйлийн 25.1 дэх хэсэгт “Иргэний шилжилт хөдөлгөөнийг санал авах өдрөөс 60 хоногийн өмнө зогсоож, санал авах өдрийн дараах өдрөөс сэргээнэ” гэж заасан.

Улсын бүртгэлийн байгууллага хуулийн хэрэгжилтийг хангаж иргэний засаг захиргааны нэг нэгжээс нөгөө нэгжид шилжин суурьших хөдөлгөөний бүртгэлийг энэ сарын 29-ний өдрөөс эхлэн түр хугацаанд зогсоолоо.

• 2024 оны 01 дүгээр сарын 01-ний өдрөөс 4 дүгээр сарын 29-ний өдөр хүртэл нийт 70,071 шилжилт хөдөлгөөний бүртгэл хөтөлсөн байна. Үүнээс 1 дүгээр сард 42,750, 2 дугаар сард 9,420, 3 дугаар сард 11,389, 4 дүгээр сард 6,512 бүртгэл хөтөлсөн.
• Иргэний шилжилт хөдөлгөөний бүртгэлийг сүүлийн 5 жилийн эхний 4 сарын байдлаар харьцуулбал: 2020 онд 229,149, 2021 онд 50,231, 2022 онд 52,762, 2023 онд 60,808, 2024 онд 70,071 шилжилт хөдөлгөөн бүртгэгдсэн.

  Жич: 2020 оны Монгол Улсын Их Хурлын ээлжит сонгуультай холбогдуулан 2020 оны 02 дугаар сарын 01-ний өдрөөс шилжилт хөдөлгөөний бүртгэлийг түр зогсоосон тул  2019 оны 10 дугаар сарын 01-ний өдрөөс 2020 оны 01 дүгээр сарын 31-ний өдөр хүртэл 4 сараар тооцсон болно.

• 2020 оноос 2024 оны эхний 4 сард хийгдсэн шилжилт хөдөлгөөний бүртгэлийг нарийвчилж үзвэл…

Цагдаагийн байгууллагаас “Жолоодох эрхийн үнэмлэх”, “Олон улсын жолоодох эрхийн үнэмлэх”, “Жолоодох эрхийн түр үнэмлэх”-ийг Венын конвенцын шаардлагад нийцүүлсэн шинэ загварын үнэмлэхийг хэвлэж байгаа бөгөөд энэ оны 02 дугаар сарын 20-ны өдрийг хүртэлх хугацаанд “Жолоодох эрхийн үнэмлэх”-ийн захиалга ирүүлсэн 34.600 иргэний үнэмлэхийг хэвлэж олгоод байна.

Харин өнөөдрийн байдлаар төрийн үйлчилгээний И-Монголиа системээр 16.384, орон нутгаас ирүүлсэн эрх сэргээх, үнэмлэх нөхөн авах 1633, нийслэл болон орон нутгийн шинээр жолооч болсон, ангилал нэмсэн 15.403, нийт 33.420 иргэний жолоодох эрхийн үнэмлэхийн захиалга хэвлэлтэд хүлээгдэж байна. Энэ нь тээврийн хэрэгсэл жолоодох эрхийн үнэмлэх, бэлдэц, дагалдах хэрэгсэл, нийлүүлэлт тодорхойгүй хугацаагаар хойшлогдсоны улмаас иргэдэд үзүүлж байгаа үйлчилгээнд доголдол үүссэн билээ.

Иймд иргэд таны жолоодох эрхийн үнэмлэх хэвлэгдээгүй бол “Е-Мongolia” платформ ашиглан “Жолоочийн лавлагаа, мэдээлэл” хэсэгт үнэмлэхийн төлөв “баталгаажсан” эсвэл “хүчинтэй” болсон, мөн бичиг баримтууд хэсэг дэх жолооны үнэмлэхийн мэдээлэл тань шинэчлэгдсэн бол Монгол Улсын хаана ч замын хөдөлгөөнд оролцох боломжтой юм.

МУИС-ийн Аэробик гимнастик болон Чирлидингийн шигшээ багийн тамирчин, сэтгүүлзүйн III курсийн оюутан Б.Маралгуатай ярилцлаа.

Бангкок хотноо болсон Ази тивийн цомын тэмцээнээс багаараа аваргын алтан медаль хүртсэн юм. 

---

-Саяхан Банкок хотод болсон тэмцээнд оролцож алтан медаль хүртсэн. Тэмцээнийхээ талаар ярихгүй юу?

-Тайланд улсын Бангкок хотноо дөрөвдүгээр сарын 06-08-ны өдрүүдэд Ази тивийн цомын “3rd SISB Aerobic Gymnastics Open 2024 Bangkok, (THA)” тэмцээн боллоо. Тус тэмцээнд найман улсын 300 гаруй тамирчин оролцсон  юм. Энэхүү тэмцээнд амжилттай оролцож 18+ насны ангилалд алтан медаль хүртлээ.

Манай МУИС-ийн баг анх удаа бүрэн бүрэлдэхүүнээрээ оролцсон олон улсын тэмцээн байсан. Тиймээс маш үнэ цэнтэй дурсамжтай тэмцээн байлаа.

– Энэ спортоор хичээллээд хэр удаж байгаа вэ?

-2022 оны хавар биеийн тамирын хичээлээ Түмэнтөгс багшийн хичээлийг үзээд шалгаруулалтаар cheer leading тэнцсэн. Ер нь энэ спортоор хичээллээд гурван жил болж байгаа.

– Тэмцээнд орохынхоо өмнө юу хийдэг вэ. Сонирхолтой зуршил байдаг уу?

-Тэмцээний өмнө нь булчин сулруулахгүй гээд усанд ордоггүй. Багаараа бэлтгэлийн төгсгөлд тойрч хэвтэж байгаад ая тавиад гүйцэтгэлээ сайн хийж байна гэж дотроо төсөөлцгөөдөг.

– Тэмцээний бэлтгэл хийх явцад дурсамжтай зүйл их байдаг байх?

-Бид чухал тэмцээнд бэлдэхдээ оюутны дотуур байранд долоо хоног байрладаг. Тэр нь илүү дурсамжтай санагддаг. Хамт байрласнаар бэлтгэлийн цаг их гардаг. Мөн бие биеэ илүү ойлгодог.  Яг л нэг хүн шиг болж чаддаг.  Тэмцээний гүйцэтгэл сайжирч илүү өндөр үр дүн гаргадаг.

– Хамгийн гоё мэдрэмж өгч байсан тэмцээн нь юу байв?

-Гадаад руу явж оролцож байгаа анхны тэмцээн болохоор илүү хичээл зүтгэл гаргаж, маш их догдолж сандарч бэлдсэн. Мөн хамгийн ач холбогдол өгсөн болохоор сэтгэлд үлдсэн нь сая Тайландад болсон тэмцээн.

-Анхны гимнастикийн тэмцээндээ орж байх үе хэр байсан бэ?

-Анхны гимнастикийн тэмцээн бол аерэбеки стапын тэмцээн байсан. Хоёрдугаар курст байхдаа орж байсан юм. Мэргэжлийн баг хамт олонтой оролцож байсан болохоор алдчих вий гээд их хэцүү мэдрэмж төрж байсан л даа. Гэхдээ тэр үед спорт гэдэг чинь тэвчээртэй байх, тууштай байх, шантрахгүй байх гэдгийг ойлгосон.

-Энэ спортын давуу тал болон хэцүүг юу гэж хардаг вэ?

-Давуу тал маш их бий. Энэ спортоор хичээллэснээс хойш надад ажиглагдсан зүйл нь сэтгэлийн хаттай болсон. Бие бялдрын хөгжил сайжирч, сахилга баттай болсон. Ер нь товлосон зүйлээс хоцорчих гээд байсан бол одоо яг цагтаа ирж байгаа. Яагаад гэвэл багаар ажиллаж байх үед бусдыгаа бодох хэрэгтэй, хүлээлгэхгүй байх хэрэгтэй. Ирсэн л бол цагийг үр дүнтэй ашигладаг байх ёстой гэх мэт зүйлсэд суралцсан. Хэцүү нь гэвэл сайн хийж чадахгүй байхдаа шантраад хаячихмаар санагддаг. Бас хичээлийнхээ хажуугаар бэлтгэлдээ явахад хичээлээ хийх, найзуудтайгаа уулзах, гэр бүлтэйгээ байх цаг хугацаа маш хомс болсон. Гэхдээ тэглээ гээд шантарч нураагүй тиймдээ ч энэ спортод дурлаад явж байна.

– Гадаадаас ирээд л шууд Монгол улсынхаа тэмцээнээс алтан медаль авлаа. Ямар мэдрэмж төрж байна?

-Тайланд руу явахаас өмнө Оюутны юниверсатад бэлдэхэд хугацаа нь богинохон байсан. Тэгээд багаараа ярилцаад тэнд тэмцээнд орохынхоо хажуугаар монголд болох Монголын оюутны спортын дөрөвдүгээр наадмын Чирлидинг буюу Хөгжөөн дэмжигч бүжгийн спортын төрлийн тэмцээндээ бэлдэнэ гэж байсан ч бодсоноор сайн бэлдээгүй. Гэхдээ ирээд хоёр, гурван хоногт бүх хичээл зүтгэлээ шавхаад оролцсон болохоор их сандарч байсан.

Түүний дараа алтан медаль авах мэдрэмж маш сайхан байсан.

-Багийнхан болон багшдаа хандаж хэлэх үг байдаг уу?

-Мэдээж байлгүй яахав. Хамт оюутан насны үнэтэй дурсамжууд бүтээлцэж яваа найзууд болон багшдаа баярлаж талархаж явдгаа хэлмээр байна.

 

 

П.ТЭРГЭЛСАРАН

Э.АНХЧИМЭГ