Хүнс, хөдөө аж ахуй, хөнгөн үйлдвэрийн яамны харьяа “Малчин лавлах-109” төвөөс ирүүлсэн 2024.05.31-ний өдрийн ноолуурын ханшийн мэдээллийг хүргэж байна.
Зүүн аймагт 125.000 төгрөг
Төв аймагт 120.000 төгрөг
Говийн аймагт 110.000-120.000 төгрөг
Баруун аймагт 120.000 -140.000 төгрөгийн ханштай байна.
Энэ үеэр хонины ноос, ноолуурын үнэ цэнийн сүлжээний тухай ойлголт, зах зээлийн боломжийг сайжруулах, ХХААХҮЯ-наас баримталж буй ноосны бодлого, үйл ажиллагааг хоршоод, аж ахуй нэгжүүдэд таниулах, үйлдвэрлэгчдийн хоршоо, малчдын хооронд үр дүнтэй холбоо тогтоох, зах зээлийн шийдлийг тодорхойлох, ноосны нэмүү өртгийн сүлжээг сайжруулахад шаардлагатай нөөцийг тогтоох, хамтын ажиллагааг өргөжүүлэх талаар хэлэлцэв. Мөн уулзалтад оролцогчид ноос боловсруулах үйлдвэрийн үйл ажиллагаатай танилцжээ.
Түүнчлэн, ноос, ноолуурын зах зээл, үнэ цэнийн сүлжээнд оролцогч, ялангуяа хонины ноос үйлдвэрлэгч малчин, малчдын хоршоод Засгийн газраас танилцуулсан “Шинэ хоршоо хөдөлгөөн”-ий үйл ажиллагааг өргөжүүлэх, ноос боловсруулагч компаниудтай хэрхэн хамтран ажиллах, сүлжээнд оролцогчид үр ашигтай хамтын ажиллагаа өрнүүлж, төр хувийн хэвшлийн түншлэл, зах зээлийн холбоос бий болгох, ноос, ноолуурын үнэ цэний сүлжээг хөгжүүлэх, зах зээлийн шийдэл, түншлэлийн механизмыг тодорхойлж, шаардлагатай арга хэмжээг богино хугацаанд хэрэгжүүлэх зорилготойг ХХААХҮЯ мэдээллээ.
Манай улсын ноос боловсруулах салбарт хивс үйлдвэрлэх 2, нэхэх 4, ээрэх 9, нэхээсгүй үйлдвэрлэл эрхлэх нэг, угаах 25, хялгас ялгах 9, сүлжих 56, эсгий эдлэлийн 16, ноосон бордооны нэг, эсгийлэх 120 гээд нийт 257 үйлдвэр хонь, тэмээний ноос ноолуур, сарлагийн хөөвөр боловсруулан төрөл бүрийн бүтээгдэхүүн үйлдвэрлэж байна.
Хүчит шонхор, Дэнжийн 1000 захад борлуулагдаж буй махны үнэ ханшийн /2024.05.31/ мэдээллийг хүргэж байна.
| Махны үнэ ханш | |||
| Төрөл | Бөөний үнэ
/ малчдаас авах үнэ / |
Жижиглэнгийн үнэ
/лангуун дээрх үнэ / |
|
| Ястай | Цул | ||
| Ямааны мах | 5500-7000 | 9000-9500 | 9000-10.000 |
| Хонины мах | 9000-14.000 | 13.000-14.000 | 12.000-13.800 |
| Үхрийн мах | 10.000-15.000 | 17.000-19.000 | 19.000-20.000 |
| Адууны мах | 7000-10.000 | 11.000-12.000 | 11.500-12.500 |
| Тэмээний мах | 6000-7000 | 11.000 | 11.500 |
Эх сурвалж: ХХААХҮЯ-ны харьяа “Малчин лавлах-109” мэдээллийн төв
Аюулгүй байдал, гадаад бодлогын байнгын хорооны өнөөдрийн /2024.05.31/ хуралдаанаар Төрийн тусгай хамгаалалтын тухай хуулийн шинэчилсэн найруулгын төсөл болон хамт өргөн мэдүүлсэн бусад хуулийн төслүүдийн эцсийн хэлэлцүүлгийг хийлээ.
Хэлэлцэж буй асуудалтай холбогдуулан УИХ-ын гишүүн Ц.Сэргэлэн асуулт асууж, хариулт авсан.
Мөн Монгол Улсын Их Хурлын чуулганы хуралдааны дэгийн тухай хуулийн 42 дугаар зүйлийн 42.2.3-т заасны дагуу “Төслийн 6 дугаар зүйлийн 6.5 дахь хэсгийн “албан тушаалтныг” гэснийг “албан тушаалтан, эсхүл төр, нийгмийн зүтгэлтнийг” гэж өөрчлөх” саналыг УИХ-ын гишүүн Б.Энх-Амгалан гаргасныг Байнгын хорооны хуралдаанд оролцсон гишүүдийн гуравны хоёр нь дэмжин хуулийн төслүүдийн эцсийн хэлэлцүүлгийг явуулсан талаарх Байнгын хорооны танилцуулгыг чуулганы нэгдсэн хуралдаанд хүргүүлэхээр тогтлоо хэмээн Улсын Их хурлын Хэвлэл мэдээлэл, олон нийттэй харилцах газраас мэдээллээ.
Баянзүрх дүүрэг, 26 дугаар хороо, Нийслэл хүрээ өргөн чөлөөний хэсэгчилсэн засвар, шинэчлэлтийн ажлын хүрээнд дараах замуудыг түр хугацаагаар хаажээ.
Дүнжингарав худалдааны төвийн уулзвараас И-Март худалдааны төвийн уулзвар хүртэлх хойд хэсгийн авто замыг 2024 оны зургаадугаар сарын 1-ний өдрийн 23:00 цагаас, 2024 оны зургаадугаар сарын 3-ны өдрийн 06:00 цагийн хооронд хааж авто замын хэсэгчилсэн засвар, шинэчлэлтийн ажлыг хийж гүйцэтгэнэ.
И-Март худалдааны төвийн уулзвараас Дүнжингарав худалдааны төвийн уулзвар хүртэлх урд хэсгийн авто замыг 2024 оны зургаадугаар сарын 4-ний өдрийн 22:00 цагаас, 2024 оны зургаадугаар сарын 6-ны өдрийн 06:00 цагийн хооронд хааж авто замын хэсэгчилсэн засвар, шинэчлэлтийн ажлыг хийж гүйцэтгэнэ.
Иймд иргэд, жолооч та бүхэн бусад замыг сонгон хөдөлгөөнд оролцоно уу
Монголын хөрөнгийн бирж Эрдэнэт Үйлдвэрийн зэсийн баяжмалын арилжааг хоёр дахь удаагаа амжилттай зохион байгууллаа. Тус арилжаагаар 3000 тонн зэсийн баяжмал арилжаалж шууд гэрээний борлуулалттай харьцуулахад 642.000 ам.доллар буюу 2,1 тэрбум гаруй төгрөгийн нэмэлт орлогыг улсын төсөвт төвлөрүүлжээ.
Өмнөх арилжаагаар мөн 3000 тонн зэсийн баяжмалыг амжилттай арилжаалж, АНУ-ын компани худалдан авсан бөгөөд шууд гэрээний борлуулалттай харьцуулахад 500 гаруй мянган ам.долларын нэмэлт орлого олсон үр дүнг үзүүлсэн юм.
Өмнө нь гэрээгээр хийгддэг байсан экспортын гол нэрийн бүтээгдэхүүнийг биржээр арилжаалснаар дэлхийн зах зээлийн дундаж үнээс өндөр үнээр борлуулах бүрэн боломжтой болжээ.
Эх сурвалж: Уул уурхай, хүнд үйлдвэрийн яам
Хотын дарга Х.Нямбаатар ТҮК-ийн ажилчдын цалинг дунджаар 1000 ам.доллар буюу 3.5 сая төгрөгт хүргэнэ гэж мэдэгдэж байсан.
Тэгвэл маргааш буюу 6-р сарын 1-нээс эхлэн ажилчдын цалинг 3.5 сая төгрөгт хүргэхээр болжээ.
Зургадугаар сарын 3, 4-нд цахилгаан шугам тоноглолд засвар, үйлчилгээ хийх хуваарийг танилцуулж байна.
Цаг агаарын нөхцөл байдлаас шалтгаалан хуваарьт өөрчлөлт орвол гэрээнд бүртгэлтэй утасны дугаарт мэдээлэл хүргэх юм байна.
Мөн засварын ажлыг тухайн тоноглолыг хүчдэлээс бүрэн чөлөөлсний дараа хийдэг нөхцөл байдлыг харгалзан үзэж, хүлээцтэй хандахыг хэрэглэгч та бүхнээс хүсье хэмээн Улаанбаатар цахилгаан түгээх сүлжээ ТӨХК-аас мэдээллээ.
Энэ оны эхний дөрвөн сарын байдлаар усны ослын улмаас 16 иргэн амь насаа алджээ. Үүнтэй холбоотойгоор ОБЕГ-ын Ажиллагааны удирдлагын газрын хэлтсийн дарга, хурандаа Л.Тамир дараах зөвлөмжийг хүргэлээ.
Тэрээр “Зуны улиралд иргэдийн аялал, зугаалга эхлэхээр усны ослын тохиолдлын дуудлага мэдээлэл бүртгэгдэх нь ихэсдэг. Усны ослоор амь насаа алдах, эд хөрөнгөөрөө хохирох тохиолдол буурахгүй байна. Иргэд аялал зугаалгаар явахдаа цаг агаарын мэдээллийг цаг алдалгүй авах шаардлагатай. Түүнчлэн эцэг эхчүүд гол мөрний дагуу амарч, аялахдаа согтууруулах ундааны зүйл хэрэглэсэн үедээ бага насны хүүхдэд тавих анхаарал суларсны улмаас хүүхэд усанд осолдох эрсдэл өндөр байдаг. Үүнийг анхаарахыг зөвлөе. Хөдөө орон нутагт зорчихдоо гарц гарамгүй газраар гол гаталж байгаад амь насаа алдах тохиолдлууд байдаг учир баталгаатай зам, гүүрийг сонгож зорчих хэрэгтэй.
Хийлдэг гудас, тоглоомуудыг ашиглаж хүүхдээ гол мөрний усанд тавьдаг. Аяллын дэлгүүрүүдэд зарагдаж буй зарим хэрэгсэл усан бассейнд зориулагдсан байдаг. Бассейнд зориулагдсан хэрэгслүүдийг голын усанд ашигласнаас мод, чулуунд цохигдон хагарч, амь насаа алдах эрсдэлтэй учир зориулалтыг сайн судалж, худалдан авах нь зүйтэй. Хөдөө орон нутагт хоноглохдоо уулын ам, гуу жалга, сайр зэрэг үерт өртөх газрыг сонгохгүй байх”-ыг зөвлөв.