Нэн ховор амьтад идээшдэг газарт давс, хужир, өвс тавьжээ.
Тодруулбал, Увс аймгийн Улаангом сумын Засаг даргын Тамгын газар, Байгаль орчны тасаг хамтран тус сумын 2-р багийн нутаг дэвсгэр болох Баян Зуух-Мөстийн чиглэлд 1 тонн давс, 200 кг хужир, шүү, 10 боодол өвсийг зөөвөрлөн зэрлэг, нэн ховор амьтны байршилд нутгийн иргэдийн хамтаар биотехникийн арга хэмжээг авч хэрэгжүүллээ.
Нийслэл Улаанбаатар хотын нийтийн эзэмшлийн гудамж, зам талбай, гэр болон орон сууцны хорооллын цэвэрлэгээ үйлчилгээг сайжруулах, иргэдийн ая тухтай ажиллаж амьдрах орчин нөхцөлийг бүрдүүлэх зорилготой “ЦАГААН САРЫГ УГТСАН ИХ ЦЭВЭРЛЭГЭЭНИЙ БОЛЗОЛТ УРАЛДААН”-ыг Нийслэлийн 9 дүүргийн хэмжээнд 2024 оны 02 дугаар сарын 01-ний өдрөөс 02 дугаар сарын 15-ны өдрийг хүртэл зохион байгуулахаар шийдвэрлэлээ.
Цэвэрлэгээнд Нийслэлийн 9 дүүргийн нутаг дэвсгэрт үйл ажиллагаа явуулж буй төрийн болон хувийн хэвшлийн аж ахуй нэгж байгууллага, СӨХ, орон сууцны контор, сургууль, цэцэрлэг, хог хаягдал, зам цэвэрлэгээний байгууллага, иргэд хамрагдана. Болзолт уралдаан нь,
1. Хог хаягдал, цэвэрлэгээ үйлчилгээг сайжруулах чиглэлээр:
2. Гэрэлтүүлгийн засвар арчлалтыг сайжруулах, асалтыг нэмэгдүүлэх чиглэлээр:
Аяны хугацаанд хийж хэрэгжүүлж буй ажилд Улаанбаатар хотын захирагчийн ажлын алба, Хотын шуурхай удирдлага зохицуулалтын төв болон холбогдох байгууллагуудын оролцсон Хяналтын баг ажиллаж явцын үнэлгээг хийж ажиллах юм.
Цагаан сарын баярын дараа болох Дүнжингарав хурдан морины уралдааныг эсэргүүцэн УИХ-ын гишүүн, Хөдөлмөрийн сайд асан тэргүүтэй иргэд өнөөдөр хэвлэлийн хурал зохион байгуулж, байр сууриа илэрхийллээ.
Хөдөлмөрийн сайд асан Г.Баярсайхан “Арваннэгдүгээр сарын 1-нээс тавдугаар сарын 1-ныг хүртэл хурдан морины үсэргээ, уралдааныг хориглосон байдаг. 1996 оноос хойш 50 гаруй хүүхэд өвөл, хаврын морин уралдааны улмаас амиа алдсан байдаг. Гэвч эрх баригчид удаа дараа өвөл, хаврын морин уралдаан зохион байгуулж байна. Ийн дэлхий нийтийн өмнө хүлээсэн үүргээ биелүүлэхгүй байгаа хэрэг. Уяач улс төрчид Засгийн газарт нөлөөлж байна.
Хэрэв хаврын уралдааныг зохион байгуулах юм бол гаднын улсад муухай харагдана. Хэрэв хаврын уралдааныг зохион байгуулж, хүүхдийн амь нас эрсдэх юм бол бид Засгийн газрыг олон улсын шүүхэд өгнө. Хуулиас хориглосон асуудлыг лоббидох ажиллагааг эхлүүлэх юм бол хүүхдэд ээлгүй улс төрчдийг зарлана. Хүүхдүүдийн эрх ашиг, амь насыг хамгаалж, өвөл, хаврын хурдан морины уралдааныг зохион байгуулж болохгүй” хэмээн ярилаа.” гэв.
Монгол Улсын Засгийн газрын хуралдаанаар 2024 онд Дорноговь аймгийн Замын-Үүдийн нутаг дэвсгэр дэх “Бүс нутгийн логистикийн төв”-ийг ашиглан олон улсын чанартай “Замын-Үүд” хуурай боомт байгуулахаар шийдвэрлэсэн.
Хуурай боомт байгуулснаар Монгол Улсын өргөн хэрэглээний бараа бүтээгдэхүүний худалдааны өртгийг бууруулах буюу тээврийн зардал, тээвэрлэлтийн хугацааг бууруулах, хилээр хүлээж авах галт тэрэгний тоо нэмэгдэх, хилийн ачаа нэвтрүүлэх, боловсруулах, хүчин чадал нэмэгдэж, шилжүүлэн ачилтын хугацаа, зардал багасна гэж үзэж байна.
Эх сурвалж: ЗТХЯ
Авлигатай тэмцэх газрын Судалгаа шинжилгээний алба нь 2024 оны 1 дүгээр сарын 22-26-ны өдрүүдэд иргэн, хуулийн этгээдээс ирүүлсэн 58 өргөдөл, гомдлыг хүлээн авч, харьяалах чиг үүргийн нэгжид хүргүүллээ.
Хүлээн авсан өргөдөл, гомдол, мэдээллийн 72.4 хувь нь авлигын гэмт хэргийн шинжтэй бөгөөд тендер, худалдан авах ажиллагаа, төрийн албан хаагчийн үйл ажиллагаатай холбоотой гомдол давамгайлж байна. Өнгөрсөн долоо хоногт авлигыг мэдээлэх 110 тусгай дугаараар 229 дуудлага хүлээн авчээ.
Замын хөдөлгөөний аюулгүй байдлын тухай хуулийн 8 дугаар зүйл “Цагдаагийн байгууллагын эрх үүрэг” 8.2.2-т “Замын хөдөлгөөний аюулгүй байдлыг хангах зорилгоор замын хөдөлгөөнийг зохион байгуулах, урсгал, чиглэлийг түр өөрчлөх, хязгаарлах, хаах” эрхтэй гэж заасан байдаг.
Энэ дагуу Чингэлтэй дүүргийн 12 дугаар хороо Дэнжийн мянга “Хүчит шонхор” худалдааны төвийн зүүн тал болон урд талын замыг 2024 оны хоёрдугаар сарын 3, 4-ний өдрүүдэд 08:00-17:00 цагийн хооронд нэг чигийн хөдөлгөөнд оруулахаар болсон байна.
Нийслэлийн нутаг дэвсгэрт иргэдийн эрүүл, аюулгүй орчинд амьдрах эрхийг хангах, газар ашиглалтыг сайжруулах, авто замын түгжрэлийг бууруулах, явган хүний зам, ногоон байгууламж, нийтийн эзэмшлийн зам, талбайг нэмэгдүүлэх зорилгоор хууль, журам зөрчсөн, стандартын бус хашаа, хайсыг 2021 оноос буулгаж эхэлсэн.
Энэ ажил 2024 онд ч мөн үргэлжлэх бөгөөд энэ хүрээнд Баянзүрх дүүргийн 26, 36 дугаар хороонд орц, гарцыг нэмэгдүүлэх зорилгоор 40 гаруй сууц өмчлөгчдийн холбоо /СӨХ/-нд зөрчлийг арилгах мэдэгдэл хүргүүлээд байна.
Нийслэлийн Засаг даргын Эдийн засаг, дэд бүтцийн асуудал хариуцсан нэгдүгээр орлогч П.Сайнзориг “Ашиглаж, эзэмшиж байгаа газраа дур мэдэн нэмэгдүүлж, нийтийн эзэмшлийн талбайд зохих зөвшөөрөлгүй хашаа, хайс барьсан зөрчлийг арилгах, газар чөлөөлөх арга хэмжээний хүрээнд одоогийн байдлаар 33,300 метр гаруй хашааг буулгаж, 7480 орчим хашаанд стандарт мөрдүүлээд байна. Хашаа арга хэмжээг энэ жил ч мөн үргэлжлүүлж, эрчимжүүлнэ. Өнгөрсөн долоо хоногт “Дүнжингарав” худалдааны төв орчимд болсон харамсалтай ослоос бид сургамж авах хэрэгтэй. Энэ алдааг дахин давтагдуулахгүйн тулд нэн түрүүнд төлөвлөлтийн алдаатай буюу нягтаршил ихтэй, орц, гарц байхгүй, өндөр хашаа барьсан хотхон, хорооллуудын СӨХ-нд хашаа буулгах мэдэгдлийг хүргүүлж байна. Энэ хүрээнд Баянзүрх дүүргийн 26, 36 дугаар хорооны 40 гаруй СӨХ-нд Нийслэлийн Газар зохион байгуулалтын алба, Хот байгуулалт, хөгжлийн газраас мэдэгдэл хүргүүлсэн. Цаашид энэ чиглэлийн арга хэмжээг нийслэлийн есөн дүүрэгт зохион байгуулах юм. Мэдэгдлээр хүргүүлсэн хууль ёсны шаардлагыг биелүүлээгүй бол албадан буулгаж, гарсан зардлыг тухайн СӨХ, барилгын компаниас гаргуулна. Иймд иргэд, олон нийт зөвөөр ойлгож, хамтарч ажиллах зайлшгүй шаардлагатай байна” гэлээ.
Өнгөрсөн долоо хоногт болсон ослын газарт Барилга, хот байгуулалтын яамнаас Ажлын хэсэг гаран ажиллаж байгаа. Ослын газрын ойролцоо зам, талбайд орц, гарцыг хязгаарлан, орон сууц болон өөр объектууд барьсан нь гал командын машин нэвтрэхэд хүндрэлтэй нөхцөл байдлыг бий болгосон байна. Иймд цаашид энэ мэт алдаатай хот төлөвлөлт, барилгын зураг төслийг хийж байгаа байгууллагууд болон баталж байгаа албан тушаалтнуудтай хариуцлага тооцно гэдгийг тэрбээр онцолж байлаа.
Монгол Улсын Ерөнхийлөгч Ухнаагийн Хүрэлсүх “Морин хуурыг эрхэмлэн дээдэлж, түгээн дэлгэрүүлэх тухай” зарлиг гаргасныг бүрэн эхээр нь хүргэж байна.
Монгол Улсын Үндсэн хуулийн Гучин гуравдугаар зүйлийн 1 дэх хэсгийн 3 дахь заалт, Гучин дөрөвдүгээр зүйлийн 1 дэх хэсэг, Монгол Улсын Ерөнхийлөгчийн тухай хуулийн 9 дүгээр зүйлийн 1 дэх хэсэг, 12 дугаар зүйлийн 12 дахь хэсгийг тус тус үндэслэн ЗАРЛИГ БОЛГОХ нь:
Нэг.Хүн төрөлхтний соёлын биет бус өв, монгол үндэсний бахархал, монголчуудын түүхэн ой санамж, оюун сэтгэл, хүсэл тэмүүлэл, хийморь золын эгшгэн судар болсон арга билгийн хос чавхдаст, ая хөгийн яруу дуурьсалт морин хуурыг эрхэмлэн дээдэлж, түгээн дэлгэрүүлэх ажлыг эрчимжүүлэх талаар дараах арга хэмжээг авч хэрэгжүүлэхийг Монгол Улсын Засгийн газар (Л.Оюун-Эрдэнэ)-т чиглэл болгосугай.
1.1.Ерөнхий боловсролын сургалтын байгууллагуудад үндэсний урлагийн цогц боловсрол олгох сургалтын орчин, нөхцөл, санхүүжилтийг бүрдүүлж, сургалтын хөтөлбөрт морин хуурын тусгайлсан хөтөлбөрийг тусган хэрэгжүүлэх;
1.2.Аймаг, сум, нийслэл, дүүргийн соёлын төв, соёлын ордны үйл ажиллагааны чиглэлд морин хуурын сургалт явуулах агуулгыг тусган, мөрдүүлэх;
1.3.Олон улсад морин хуурыг сурталчлан таниулж, түгээн дэлгэрүүлэх чиглэлд түлхүү анхааран, хилийн чанад дахь Монгол сургууль, сургалтын төвүүд дэх морин хуур болон үндэсний урлагийн сургалтыг дэмжих тусгайлсан хөтөлбөр гаргах;
1.4.Төрийн дээд, тэргүүн зэргийн “Чингис хаан” одонт, Монгол Улсын Соёлын элч – Морин хуурын чуулгыг найрал хөгжим болгон өргөжүүлж, холбогдох төсөв, санхүү, материаллаг баазыг бэхжүүлэн шийдвэрлэх, мэргэжлийн морин хуурч бэлтгэх тогтолцоог дэмжихэд анхаарах;
1.5.Морин хуур хөгжмийн зэмсгийн урлал, үйлдвэрлэлийг дэмжин хөгжүүлэх, хөгжмийн зэмсэг урлаачдыг бэлтгэх;
1.6.Монгол Улсын Ерөнхийлөгчийн ивээл дор “Морин хуурын олон улсын наадам”-ыг 3 жил тутам зохион байгуулах.
Хоёр.Монгол айл өрх бүр морин хуурын аялгууг эгшиглүүлэн, үр хойчдоо өвлүүлэн сургаж, үндэсний урлаг, монгол өв соёлоо түгээн дэлгэрүүлэхэд хувь нэмрээ оруулахыг нийт ард иргэдэд уриалсугай.
Гурав.Энэхүү зарлигийн хэрэгжилтийн явцыг олон нийтэд тухай бүр мэдээлж, тайланг Монгол Улсын Ерөнхийлөгчид жил бүр ирүүлж байхыг Монгол Улсын Засгийн газар (Л.Оюун-Эрдэнэ)-т чиглэл болгосугай” гэжээ.
АНУ-ын ерөнхийлөгч Жо Байден Йорданд Америкийн гурван цэрэг амиа алдсан дроны цохилтод АНУ хариу өгөх болно гэж мэдэгдсэн ч Ойрхи Дорнодод том дайн хийх шаардлагагүй гэж онцлов. Жо Байден энэхүү цохилтыг Ираны дэмжлэгтэй зэвсэгт бүлэглэл хийсэн гэж Ираныг буруутган “Цагаан ордон ноцтой хариу арга хэмжээ авна” гэж амласанч АНУ яг ямар арга хэмжээ авах гэж байгаа талаар тодорхой зүйл хэлсэнгүй. Мөн тэрбээр сэтгүүлчдэд “Ойрхи Дорнодод бүрэн хэмжээний дайн явуулах шаардлага бидэнд байхгүй гэж би бодож байна. Надад ингэх сонирхол алга” гэж хэлжээ.
АНУ-ын ерөнхийлөгчийн энэхүү мэдэгдэл ХАМАС-тай дайн эхэлснээс хойш тус бүс нутагт Америкийн цэргүүд амь үрэгдсэн ч тус улсын өнөөгийн эрх баригчид Ойрхи Дорнод дахь мөргөлдөөнийг хурцатгахгүй бодлого барьж байгааг тодорхой болгов.
Мөн Ираны удирдлага ч өөрийн дэмждэг зэвсэгт бүлгүүдэд цохилт өгч буй АНУ, Их Британийг буруутгасан мэдэгдэл хийхгүй байгаа юм. Ираны ГХЯ-ны хэвлэлийн төлөөлөгч Нассер Канаани Жо Байдены энэ мэдэгдлийг “Бүс нутгийн бодит байдлыг хурцатгахгүй байх улс төрийн тодорхой зорилготойгоор хийгдсэн” гэжээ. Өөрөөр хэлбэл, Ираны өнөөгийн төр, засгийн дарлалд зовж бас тэмцэж байгаа 84 сая хүн амыг бүрдүүлж буй иран буюу перс( 60%), азарбайжан(20 %), араб, курд, лур, туркмен, белуж, армян, еврей үндэстнүүдийн хувь заяа АНУ-ын өнөөгийн төр, засгийн санааг огт зовоохгүй байгаа аж. Уг нь дэлхийн II дайн бидэнд улстөрчид нэгэнт тулсан дайнаас зайлах гэж оролдох, дайн хийж буй дайсантайгаа хэлэлцээр хийх аваас ямар их хохирол амсдагийг хангалттай харуулсан. Гэтэл өнөөдөр АНУ-ын ерөнхийлөгч Жо Байден, ерөнхийлөгч асан Дональд Трамп нар Их Британийн ерөнхий сайд асан Артур Чемберлений алдааг давтах гэж хичээсээр байна. Хүн төрөлхтөн “Түүх давтагддаг. Эхний удаа эмгэнэлт явдал, хоёр дахь удаагаа инээдэм болдог” гэдгийг харж байна. Иймээс бид хэн гэдэг Америк “Уинстон Черчилль” гарч ирж эдгээр “Хос Чемберлен”-ий халааг авахыг л харах үлдэв.
Учир нь ирж яваа цаг үүнийг шаардаж байгаа юм. Тэгээд ч Сиритэй хиллэдэг Йордан дахь АНУ-ын “Tower 22” агаарын баазад дроноор цохилт өгсний улмаас АНУ-ын гурван мянга орчим цэргийн албан хаагчийн гурав нь амиа алдан 34 нь шархадсан явдал зүгээр өнгөрөхгүй нь тодорхой.
Г.АМАРСАНАА
Цагдаагийн байгууллагын 102 тусгай дугаарт нэгдүгээр сарын 31-ны өдөр нийт 1751 дуудлага, мэдээлэл бүртгэгдсэнээс зөрчлийн шинжтэй 1350, гэмт хэргийн шинжтэй 86 дуудлага, мэдээлэл байна.
