Month: January 2024

ЭТТ ХК-ийн хувьцааны 2022 оны ногдол ашгийг ард иргэдийн данс руу өнөөдрөөс шилжүүлэх талаар албаныхан мэдээллээ.

Сайд Т.Амарбаясгалан “Өмнө нь хувьцаа эзэмшигч 2,4 сая иргэнийх өмнө нь авч байсан дансаар, шинэ 893 мянган хувьцаа эзэмшигчийн мөнгө хүүхдийн мөнгө авдаг данс руу шилжин орно. Нэг үгээр 12 хүртэлх насны бүх хүүхэд шинээр хувьцаа эзэмшигч болж бүртгэгдлээ.

Монгол улсын нийт хүн амын 90 гаруй хувь буюу 3,4 сая хүн хувьцаа эзэмшигч болж байна. 2015 оны Засгийн газар “Сайн” хувьцааг гаргаж ахмад, төрийн албан хаагчид өөрсдийн хувьцааг худалдаж байсан ба нэгж хувьцаа 343 төгрөгөөр зарж байсан. Тэдгээр иргэд өнөөдрийн тоо бүртгэлд байдаг ба хувьцаа эзэмшигчээр үлдсэн 3,4 сая нь дээрх эзэмшигч юм. Ингэснээр нийт хувьцаан 73 хувь нь ЭТТ ХК, 27 хувь нь 3,4 сая иргэнд, 0,6 хувь 487 аж ахуй нэгжийн мэдэлд байна.

2022 онд 1,3 их наяд төгрөгийг цэвэр ашигтай байсан ба иргэдэд 351 тэрбум ногдоно. Татвар суутгагдаад 104 мянган төгрөг өнөөдөр иргэдийн дансанд орно” гэв.

“Эрдэнэс Тавантолгой” ХК-ийн хувьцааны 2022 оны ногдол ашгийг өнөөдөр иргэдийн дансанд шилжүүлэхээр боллоо.

Нэгж хувьцааны ногдол ашгийг 108 төгрөгөөр тооцсоноор 1,072 хувьцаатай иргэн 104,000 төгрөг авна. Харин зарим иргэн хувьцааны тодорхой хувиа зарсан, сургалтын төлбөртөө суутгуулсан зэрэг шалтгаанаар тоо ширхэг нь харилцан адилгүй байна.

Иргэн та хэдэн төгрөгийн ногдол ашиг авахаа мэдэхийг хүсвэл эхлээд хувьцааны тоогоо мэдэх хэрэгтэй. Та хэдэн ширхэг хувьцаа эзэмшиж буйгаа ЭНД дарж нэвтрэн регистрийн дугаараа кириллээр бичин шалгах боломжтой. Мөн өөрөөр Үнэт цаасны төвлөрсөн хадгаламжийн төвийн цахим сайтад нэвтэрч ЭНД дарж, регистрийн дугаараа бичиж шалгана уу.

 Аж үйлдвэрийн салбарын үйлдвэрлэл өнгөрсөн онд урьдчилсан гүйцэтгэлээр 30.5 их наяд төгрөг болж, өмнөх оныхоос 9.5 (45.2 хувь) их наяд төгрөгөөр нэмэгдлээ.

Үүнд уул уурхайн олборлолт 7.2 (50.2 хувь) их наяд, боловсруулах үйлдвэрлэл 1.8 (37 хувь) их наяд төгрөгөөр нэмэгдсэн нь голлон нөлөөлжээ.

Уул уурхай, олборлох аж үйлдвэрийн салбарын нийт үйлдвэрлэл 2023 онд урьдчилсан гүйцэтгэлээр 21.5 их наяд төгрөг болж, өмнөх оныхоос 7.2 (50.2 хувь) их наяд төгрөгөөр өсөхөд чулуун, хүрэн нүүрс олборлолт 5.7 (2.5 дахин) их наяд, металлын хүдэр олборлолт 864.6 (9 хувь) тэрбум, газрын тос олборлолт 530.4 (68.3 хувь) тэрбум төгрөгөөр өссөн нь нөлөөлсөн байна.

Уул уурхай, олборлох аж үйлдвэрийн салбарт цайр, зэс, төмрийн хүдрийн баяжмал, хайлуур жонш, хүрэн нүүрс, газрын тос, баяжуулсан, чулуун нүүрс, мөнгө, хайлуур жоншны баяжмалын биет хэмжээ өмнөх оныхоос 0.7 хувиас 3.9 дахин өсөж, харин цэвэршүүлээгүй алт, төмрийн хүдэр 23.4–30.4 хувиар буурсныг Үндэсний статистикийн хороо мэдээллээ.

Боловсруулах аж үйлдвэрийн салбарт ус, ундаа жүүс, шингэн сүү,самнасан ноолуур, янжуур тамхи, цемент, металл бэлдэц, малын мах зэрэг гол нэр төрлийн бүтээгдэхүүний үйлдвэрлэлийн биет хэмжээ 9.6 хувиас 2.5 дахин өсөж, харин катодын зэс, гурил, цэвэр спирт, цагаан архи, ноолууран сүлжмэл эдлэл, шохой, нүүрсэн шахмал түлш зэрэг гол нэр төрлийн бүтээгдэхүүний үйлдвэрлэл 0.8– 30 хувиар буурсан аж.

Авлигатай тэмцэх газрын Урьдчилан сэргийлэх, соён гэгээрүүлэх хэлтэс нь 2024 оны 1 дүгээр сарын 22-26-ны өдрүүдэд авлигын шалтгаан, нөхцөлийг арилгах чиглэлээр улсын хэмжээнд зураг төсөвгүй барилга байгууламжийн судалгаа, Кино урлагийг дэмжих сангаас эргэн төлөх нөхцөлгүй олгогддог санхүүжилт, эрчим хүчний салбарын байгууллагуудын худалдан авах ажиллагааны нөхцөл байдал, даатгалын сангаас тэтгэмж, тэтгэвэр олгох журмын хэрэгжилт, Эдийн засаг хөгжлийн яамны болон Шударга өрсөлдөөн, хэрэглэгчийн төлөө газрын худалдан авах ажиллагаа зэрэгт тус тус дүн шинжилгээ хийв.

Төрийн албан хаагчийн ёс зүй, төрийн албаны хүнд суртал, чирэгдлийн талаарх иргэдээс ирүүлсэн Богд уулын дархан цаазат газар, “Эрдэнэт үйлдвэр” ТӨҮГ, Баянзүрх дүүргийн хөгжлийн төв, Зам тээврийн хөгжлийн төв зэрэг байгууллагын албан тушаалтнуудад холбогдох гомдлуудыг шалгаж, Говь-Алтай аймгийн Засаг даргын Тамгын газар, Баянзүрх дүүргийн Засаг дарга, Хүүхэд гэр бүл хөгжил хамгааллын ерөнхий газрын дарга зэрэг албан тушаалтнуудад хүргүүлсэн мөрдөгчийн мэдэгдлийн мөрөөр ажиллаж, хэрэгжилтийг хянан үзэв.

Авлигын эсрэг сургалтад нийт 352 хүнийг хамруулан зохион байгууллаа.

УОК-ын шуурхай штаб болон ХХААХҮЯ мах бэлтгэн нийлүүлэгч аж ахуй нэгжүүдтэй хамтран өвөлжилт хүндэрсэн Сүхбаатар, Дорнод аймгийн зарим сумдаас мал худалдан авах ажлыг зохион байгуулж байна.

Тухайн аймгуудын тодорхой цэгт малчдын гараас дундын зуучлалгүй амьд мал худалдан авах ажлын хоёрдугаар сарын 2-ны өдрийг хүртэл зохион байгуулах юм.

Хөдөө аж ахуйн биржэд урьдчилан мал зарах захиалга өгсөн малчдын малыг худалдан авахын зэрэгцээ мал ачих цэгүүдийн цасанд боогдсон замыг чөлөөлөх, өвс, тэжээл, түлш шатахууны тээвэрлэлтийг саадгүй хүргэн, мал тээвэрлэх ажлыг зохион байгуулан ажиллаж байна.

Сүхбаатар аймгийн хэмжээнд 9 сум төмөр зуд, 4 сум цагаан зудын байдалтай байна. Өвс тэжээлийн аюулгүйн нөөцөд 60 мянган боодол өвс нэмж бүрдүүллээ.

Амьд мал худалдан авах ажлын хүрээнд Сүхбаатар аймгийн Мөнххаан, Түмэнцогт, Сүхбаатар, Эрдэнэцагаан сумын 100 малчин өрхөөс 20.100 толгой мал худалдах захиалга Хөдөө аж ахуйн биржэд өгөөд байна.

Дундын зуучлалгүй мал худалдан авах ажил Дорнод аймагт мөн зохион байгуулагдаж байна.

Хэрвээ та мал худалдах бол https://trade.mce.mn/ хаягаар захиалга, зараа өгөх боломжтой.