Month: October 2023

Сэлэнгэ аймагт “Стрептококкийн халдвараас сэргийлэх эрт илрүүлэх, үзлэг оношлогоо”-г энэ сарын 30-нд эхлүүлж, эхний ээлжинд Ерөнхий боловсролын сургуулийн 1-5 дугаар ангийн 11 мянга орчим хүүхдийг үзлэгт хамруулахаар ажиллаж байна.

Хоёр өдөр үргэлжлэх үзлэгийг 17 сум, зургаан тосгонд зохион байгуулж буй бөгөөд эхний өдөр нийт хүүхдийн 51.7 хувь нь хамрагдсан байна.

Стрептококкийн халдвараар үүсгэгдсэн гүйлсэн булчирхайн үрэвсэлт өвчин хүндэрсэн тохиолдолд ангина буюу хэрэх өвчин, үе мөч, зүрх, тархины өвчлөл, олдмол гажиг бий болгодог тул аль болох эрт үед нь оношилж эмчлэхийг эмч нар зөвлөдөг.

Тиймээс НҮБ-ын Хүүхдийн сан нь ЭМЯ-тай хамтарч манай улсад “Амны хөндийн эрүүл ахуй, стрептококкийн халдвараар үүсгэгдсэн гүйлсэн булчирхайн үрэвсэлт өвчнийг эрт үед нь оношилж, эмчлэх” хөтөлбөрийг улсын хэмжээнд үе шаттай хэрэгжүүлж эхэлсэн. Уг үйл ажиллагааны хүрээнд есдүгээр сард орон нутгаас Сэлэнгэ аймаг болон нийслэлийн хоёр дүүрэгт НҮБ-ын Хүүхдийн сангийн Монгол дахь суурин төлөөлөгч Эваристе Коуасси-Комлан ЭХЭМҮТ-ийн эмч нартай хамтран 17 сум, зургаан тосгоны ЭМТ-ийн эмч, мэргэжилтнүүдэд онол, дадлага хосолсон багц сургалт явуулж, бэлтгэл ажлаа хангасан юм.

Үзлэгийн үеэр ажлын хэсгүүд таван бүсэд хуваагдаж, сум, тосгодын Засаг даргын тамгын газар, ЕБС-ийн захирал, сургалтын менежерүүдийг арга зүйгээр хангаж ажилласан байна. Тэд дараагийн ээлжээр 6-12 дугаар ангийн 10 мянга гаруй хүүхдийг ирэх онд үзлэг, оношлогоонд хамруулахаар төлөвлөжээ.

Мөн шинжилгээ эерэг болон эргэлзээтэй гарсан үед эмчилгээний дараагийн шатны арга хэмжээг хугацаа алдалгүй эхлүүлэх учраас хүүхдээ үзлэг, оношлогоонд идэвхтэй хамруулахыг эцэг эхчүүдэд зөвлөлөө.

 Боловсрол, шинжлэх ухааны сайд Л.Энх-Амгалан Азийн хөгжлийн банкны Монгол дахь суурин төлөөлөгч Шэннон Коулин, тус банкны Монгол дахь суурин төлөөлөгчийн газрын ахлах эдийн засагч Эдуард Фабе нарыг хүлээн авч уулзлаа.

Уулзалтаар салбарын сайд УИХ-аар баталсан боловсролын багц хуулийн өөрчлөлтийн талаар мэдээлэл өгсөн юм.

Эрх зүйн шинэчлэлийн хүрээнд

• Хөтөлбөрийн шинэчлэл хийх

• Санхүүжилтийн тогтолцоог өөрчлөх

• Үнэлгээний тогтолцоог бэхжүүлэх

• Багш бэлтгэл болон хөгжүүлэх

• Цахим шилжилт

• Удирдлага менежментийг сайжруулах чиглэлээр дорвитой өөрчлөлт гаргана гэж төлөвлөж байгаа юм.

Эдгээр шинэчлэлийг үр дүнтэй хэрэгжүүлэхэд Азийн хөгжлийн банкны дэмжлэг, хамтын ажиллагаа чухал нөлөөтэй болохыг Л.Энх-Амгалан сайд онцоллоо. Тэр дундаа хөтөлбөрийн шинэчлэл хийх, цахим шилжилтийг эрчимжүүлэх чиглэлээр хамтран ажиллах хүсэлт гаргав. Үүнээс гадна сүүлийн жилүүдэд боловсролын хүртээмжийг сайжруулах чиглэлээр Засгийн газар онцгой анхаарал хандуулж байна. Үүний үр дүнд хүүхэд бүрийг цэцэрлэгт хамруулах боломж бүрдсэн. Харин ЕБС-д элсэгчдийн тоо жил ирэх тусам нэмэгдэж байгаа учраас гурван ээлжид шилжих эрсдэл жил бүр үүссээр байна. Тиймээс боловсролын хүрээтэмжийг сайжруулах чиглэлээр хамтран ажиллахыг хүслээ.

Сургууль цэцэрлэгийн хүртээмжийг сайжруулахын тулд үр ашигтай төлөвлөх, ингэхдээ төр хувийн хэвшлийн урт хугацааны түшлэлийг бий болгох чиглэлээр хамтарна. Азийн хөгжлийн банкны зүгээр техник туслалцааны дэмжлэг үзүүлэх боломжтой талаар мэдээлэл өгсөн юм.

Өдгөө 220 мянга орчим айл гэр хороололд амьдарч байна. Тиймээс гэр хорооллыг орон сууцжуулах ажлыг зургаан дэд төвийн бүтээн байгуулалтад тулгуурлан хэрэгжүүлнэ. Эхний ээлжид Баянхошуу, Сэлбэ дэд төвийн дэд бүтэц, авто зам, инженерийн барилга байгууламжийн ажил бүрэн дууссан. Харин Баянхошуу дэд төвийн барилга угсралтын ажлын хүрээнд эхний 800 айлын орон сууц 2024 онд ашиглалтад орно. Сэлбэ дэд төвийн тухайд 158 га газрын 2000 нэгж талбар дахь айлуудын газрыг чөлөөлөхөөр төлөвлөлт гаргасан. Газар чөлөөлөлт хийхдээ иргэдтэй тохиролцох гурван зохицуулалтыг хуулийн төсөлд тусгасан. Нэгдүгээрт, иргэд газраа жишиг үнээр буюу бэлэн мөнгөөр худалдах, хоёрдугаарт, түр орон сууцанд орж, дараа нь тухайн байршилд барьсан орон сууцыг өмчлөх, гуравдугаарт, бэлэн орон сууцаар газар, объектоо солих юм.

Энэ 2000 айлын газрыг чөлөөлөн 12,000 айлын, нам давхрын, дундаа ногоон байгууламж, цэцэрлэгт хүрээлэнтэй, иж бүрэн орон сууцны цогцолбор хорооллыг босгох боломжтой. Ингэхдээ 60 хувь нь ногоон байгууламж, авто зогсоол, тоглоомын талбай, 40 хувь нь орон сууц байна. Сэлбэ дэд төвийн 12,000 айлын орон сууц боссоноор газар эзэмшиж байсан 2000 айл нь орон сууцандаа ороод, цаана нь илүү гарсан 10,000 айлын орон сууцанд Хайлааст, Чингэлтэй, Таван буудал, Дарь эх орчмын айлуудыг оруулах боломжтой. Тус барилга байгууламжийн цогцолбор бүхий 158 га талбайг орон сууцжуулснаар Сэлбэ орчмыг усны урсцын тохируулга бүхий далан шуудуутай болгоно. Мөн СУИС, эрүүл мэндийн болон төрийн томоохон байгууллагуудыг эдгээр орон сууцны хороолол дунд цогц байдлаар төлөвлөх боломжтой. Том зургаараа ажлын байр нэмэгдүүлж, ядуурлаас салах боломж бүхий төсөл гэдгийг онцолж байна.

Хот өөрөө олон улсын санхүүгийн зах зээл дээрээс хөрөнгө мөнгө, бонд босгож, дэд төвүүддээ тулгуурлан орон сууцны цогц хорооллуудыг байгуулах замаар Их тойруу доторх төвлөрлийг задлах боломжтой юм.

УИХ энэ өдрүүдэд Монгол Улсын 2024 оны төсвийн төслийн анхны хэлэлцүүлгийг хийж байна. Ирэх оны төсөвт цалин, тэтгэвэр, тэтгэмжийг дөрөвдүгээр сарын 1-нээс нэмэгдүүлэхээр тусгасан.

Сангийн дэд сайд С.Мөнгөнчимэг энэ талаар “Төрийн бүх албан хаагчдын цалинг 10 хувиар нэмэгдүүлэх бол төрийн нийтлэг үйлчилгээний ажиллагсдын цалинг 20 хувиар нэмэгдүүлэхээр тусгасан. Мөн суманд ажиллаж байгаа төрийн захиргааны болон үйлчилгээний бүх албан хаагчдад сар бүр үндсэн цалингийн 40 хувиар орон нутгийн нэмэгдэл олгох бол аймгийн төв болон нийслэлийн алслагдсан гурван дүүрэг болох Багануур, Багахангай, Налайх дүүрэгт ажиллаж байгаа төрийн албан хаагчдад 20 хувиар тооцож, орон нутгийн нэмэгдэл олгоно гэлээ. Түүнчлэн төрийн албан хаагчид орон нутагт байр худалдан авах тохиолдолд 3 хувийн ипотекийн зээлд хамруулж, хүүгийн зөрүүг төсвөөс төлнө. Мөн урьдчилгаа төлбөрийн 60 хувийг Зээлийн батлан даалтын сангаас баталгаа гаргана гэв.

Цаашлаад энэ оноос эхлэн төрийн албан хаагчдын ажилласан жилийн нэмэгдлийг жил тутам олгодог болсон. Ингэснээр нэгээс дээш жил ажиллавал 1 хувиар, хоёроос дээш жил ажиллавал 2 хувиар, 10-аас дээш жил ажиллавал 10 хувиар ажилласан жилийн нэмэгдэл авдаг болсон. Улаанбаатар хотоос орон нутагт шилжин очиж, Төрийн захиргааны албан хаагчаар ажиллавал ажиллавал 1 жил ажилласан хугацааг 1.3 жилээр, тосгонд 1.6 жил ажилласантай тус, тус дүйцүүлэн тооцдог болсон гэлээ.

Ц.Б нь СУИС-ийн Бүжгийн урлагийн сургуулийн багш, бүжгийн найруулагч мэргэжлээр суралцаж төгсөөгүй хэр нь, 2021 онд төгссөн гэх бакалаврын зэргийн хуурамч диплом ашиглан, 272 дугаар цэцэрлэгт хөгжмийн багшаар ажилд оржээ.

Шүүгдэгч Ц.Б нь дээд сургуульд ямар ч багц цаг авч, суралцаагүй, төгсөөгүй болох нь түүний тайлбар хэрэгт авагдсан баримтаар тогтоогдсон байна.

Ц.Б нь хуурамч диплом ашиглан 2 жилийн хугацаанд төрийн байгууллагад ажилласнаар тухайн мэргэжлийг эзэмшиж, мэргэжлийн диплом аваагүй бусад төрийн үйлчилгээний албан тушаалтнуудаас илүү цалин хөлс авах, хууль бус давуу байдлыг өөртөө бий болгосон гэмт хэрэг гэж үзжээ. Тиймээс ажилласан жилийн олсон орлогыг нь хурааж, улсын төсөвт эргэн төлүүлэх нь шударга ёсны зарчимд нийцэх юм.

Харин ингэхдээ түүнийг ажил хөдөлмөр эрхлэх үндсэн эрхийг нь дээдлэх үүднээс хөдөлмөрийн хөлсний доод хэмжээний цалинг авах эрхтэй, харин түүнээс давсан цалин нь гэмт хэргийн улмаас олсон орлого гэж үзэв.

Ц.Б-гийн үйлдсэн гэмт хэргийн шинжийн хувьд 2 жилийн хугацаанд үргэлжилсэн, хувийн байдлын хувьд ажил эрхэлдэггүй байдлыг нь харгалзан нийтэд тустай ажил хийлгэх ял шийтгэв.

Эрүүгийн хуулийн ерөнхий ангийн 5.4 дүгээр зүйлийн 4 дэх хэсэгт зааснаар нийтэд тустай ажил хийлгэх ялыг биелүүлэхээс зайлсхийвэл шүүх нийтэд тустай ажил хийлгэх ялын найман цагийн ажлыг нэг хоногоор тооцон хорих ялаар солихыг шүүгдэгч Ц.Б-д санууллаа.

Энэ сарын 3-наас ихэнх нутгаар хүйтрэх төлөвтэй байгааг цаг уурын байгууллагаас мэдээлээд буй.

Тодруулбал, арваннэгдүгээр сарын 1-нд баруун аймгуудын ихэнх нутаг, төвийн аймгуудын нутгийн зарим газар, зүүн аймгуудын нутгийн хойд хэсгээр, 2-нд төв болон зүүн аймгуудын ихэнх нутаг, баруун болон говийн аймгуудын нутгийн зарим газраар цас орно.

Мөн тус сарын 3-нд баруун болон төвийн аймгуудын ихэнх нутаг, зүүн аймгуудын нутгийн зарим газар, говийн аймгуудын нутгийн хойд хэсгээр, 4-нд баруун аймгуудын нутгийн зүүн хэсэг, төв, говь, зүүн аймгуудын ихэнх нутгаар цас орж, цасан шуурга шуурахаар байна.

Иймд дараах болзошгүй эрсдэлээс урьдчилан сэргийлэхийг Онцгой байдлын ерөнхий газраас анхааруулж байна. 

• Цаг агаарын мэдээ, мэдээллийг цаг тухай бүр сонсож, мэргэжлийн байгууллагаас өгч буй сэрэмжлүүлэг, анхааруулгыг дагах,
• Тээврийн хэрэгслийн жолооч нар хол, ойрын замд гарахдаа тээврийн хэрэгслийн найдвартай байдлыг хангаж бензин, шатахууны нөөцтэй, дулаан хувцастай зорчих,
• Онц шаардлагагүй бол хол, ойрын замд гарахгүй байх,
• Иргэд, малчид болзошгүй эрсдэлээс урьдчилан сэргийлж, малаа ойрын бэлчээрт хариулах, бага насны хүүхдийг малд явуулахгүй байх

Цагдаагийн байгууллагын 102 тусгай дугаарт 2023 оны 10 дугаар сарын 30-ны өдөр нийт 1822 дуудлага, мэдээлэл бүртгэгдсэнээс зөрчлийн шинжтэй 1249, гэмт хэргийн шинжтэй 117 дуудлага, мэдээлэл байна гэж Цагдаагийн Ерөнхий Газрын Хэвлэл Мэдээллийн төвөөс мэдээллээ.