Month: April 2019

Монгол Улсын Хүний эрхийн Үндэсний Комиссоос “Монгол Улс дахь хүний эрх, эрх чөлөөний байдлын талаарх 18 дахь илтгэл”-ийг 2019 оны 03 дугаар сарын 29-нд Улсын Их хуралд өргөн барьсан билээ. Тус илтгэлийг Улсын Их Хурлын Хүний эрхийн дэд хороо 2019 оны 04 дүгээр сарын 30-ны өдрийн хуралдаанаар авч хэлэлцэн танилцуулга хийлээ. Хуралдаан анх удаа ирц сайтай буюу УИХ-ын 9 гишүүнээс 7 гишүүний бүрэлдэхүүнтэйгээр хуралдаж, Хүний эрхийн Үндэсний Комиссоос ХЭҮК-ын дарга Ж.Бямбадорж, гишүүн П.Оюунчимэг, гишүүн Н.Ганбаяр, Эрүүл мэндийн Дэд сайд Л.Бямбасүрэн, Хууль зүй, дотоод хэргийн Дэд сайд Г. Элбэгсайхан, Цагдаагийн ерөнхий газрын Тэргүүн дэд дарга Р.Отгонжаргал, Улсын ерөнхий прокурорын орлогч прокурор М.Чинбат, Шүүхийн шийдвэр гүйцэтгэх ерөнхий газрын дарга Д.Дамдинцэрэн болон холбогдох албан тушаалтнууд оролцов.

Монгол Улсын Хүний эрхийн Үндэсний Комиссын тухай хуулийн 13 дугаар зүйлийн 13.2.3, 20 дугаар зүйлийн 20.1 дэх хэсэгт тус тус заасны дагуу ХЭҮК тухайн жилийн хүний эрх, эрх чөлөөний төлөв байдлыг тодорхойлж, “Монгол Улс дахь хүний эрх, эрх чөлөөний байдлын талаарх илтгэл”-ийг жил бүрийн эхний улиралд багтаан Улсын Их Хуралд өргөн мэдүүлдэг билээ. Монгол Улс дахь хүний эрх, эрх чөлөөний байдлын талаарх Хүний эрхийн Үндэсний Комиссын 18 дахь илтгэлийг “Монгол Улс дахь хүний эрхийн боловсролын талаарх бодлого, түүний хэрэгжилт”, “Хөгжлийн бэрхшээлтэй эмэгтэйчүүдийн бэлгийн болон нөхөн үржихүйн эрүүл мэнд, эрхийн асуудал”, “Ажлын байран дахь бэлгийн дарамтын нөхцөл байдал”, “Эрүү шүүлтээс урьдчилан сэргийлэх үйл ажиллагаа”, “Онцгой байдлын байгууллагын алба хаагчдын хөдөлмөрлөх эрхийн хэрэгжилт”, “Жендэрийн эрх тэгш байдлыг хангах тухай хуулийг хэрэгжүүлэх талаар төрийн холбогдох байгууллагын үйл ажиллагааны төлөв байдал” гэсэн үндсэн 6 сэдвийн хүрээнд боловсруулсан болохыг ХЭҮК-ын дарга Ж.Бямбадорж хуралдааны эхэнд гишүүдэд танилцуулав.

УИХ-ын Хэвлэл мэдээллийн албанаас ирүүлсэн мэдээг уншигч та бүхэндээ хүргэе.

…18 дахь илтгэлтэй холбогдуулан Улсын Их Хурлын гишүүн Л.Болд, Ш.Раднаасэд, Ж.Батзандан Н.Оюундарь, Д.Ганболд нар асуулт асууж, санал хэлсэн. Гишүүдийн зүгээс өнгөрсөн хугацаанд хэлэлцүүлсэн 17 илтгэл, 295 санал, дүгнэлтийн хэрэгжилтэд хэрхэн хяналт тавьсныг тодруулахын зэрэгцээ энэ удаагийн илтгэлд С.Зориг агсны амь насыг бүрэлгэсэн хэрэгтэй холбоотой шүүгдэгчдийг эрүүдэн шүүсэн талаарх өргөдөл, гомдлыг оруулах боломж байгаа эсэхийг лавлав. Мөн дохионы орчуулагч байхгүйгээс хөгжлийн бэрхшээлтэй иргэдийн 80 хувь нь эмнэлгийн үйлчилгээ авах боломжгүй, эрх нь ноцтойгоор зөрчигдөж байгаа явдал болон судалгаагаар ажлын байран дахь бэлгийн дарамт төрийн байгууллагуудад зонхилж байгаа асуудлыг шийдвэрлэхээр авч хэрэгжүүлэх арга хэмжээний талаар тодруулсан.

ХЭҮК-ын дарга Ж.Бямбадорж хариултдаа, Монгол Улсын хувьд нөхцлийн эрүүдэн шүүлтээс ангид байх боломжийг бүрдүүлсэн. 25 хорих анги, 21 аймгаас гадна хэд хэдэн газарт цагдан хорих байр байдаг. Өмнөговь, Өвөрхангай, Баян-Өлгий аймгаас бусад бүх цагдан хорих байр шинэчлэгдэж баригдсан. Өөрөөр хэлбэл, нөхцөл байдал сайжирсан. Харин хүмүүсийн үйл ажиллагаанаас шалтгаалсан эрүүдэн шүүлттэй холбоотой асуудал тасрахгүй байна. Ялангуяа цагдан хорих байр сэлгүүлдэг нь хамгийн анхаарал татсан асуудал болоод байна. Олон улсын баримт бичигт тухайн хүний амьдарч, оршиж байгаа газарт хэрэг мөрдөх ёстой гэж заасан байдаг. Гэтэл өнөөдөр Улаанбаатар хотын иргэнийг Төв аймаг, Дархан-Уул аймагт сэлгүүлэн хорьсноос хүний эрх зөрчигдөх, эрүүдэн шүүх асуудал үүсч байна гэдгийг онцолж байлаа.

Мөн тэрбээр, хүний эрхийн илтгэлийг эхний улиралд өргөн барьдаг хуультайг тодотгоод 18 дахь илтгэл орчуулагдаад олон улсад хэдийнэ хүргүүлсэн учраас С.Зоригийн хэрэгтэй холбоотой эрүүдэн шүүсэн асуудлыг оруулах боломжгүй. Харин энэ асуудлаар ямар ч шийдвэр гарсан Хүний эрхийн Үндэсний Комисс оролцож ажиллахад бэлэн гэв. Түүнчлэн Хууль зүйн байнгын хорооны тогтоолын дагуу хоёр жил тутам илтгэлээс гаргасан санал, дүгнэлтийг хэрэгжилтийг хангах зөвлөмжийн биелэлтийг гаргаж өгч байгаа. Ингэхдээ холбогдох байгууллагаас мэдээлэл авч, тэр хүрээнд биелэлтийн тайлангаа хүргүүлдэг гэлээ.

Харин Жендерийн эрх тэгш байдлыг хангах тухай хуулиар ажлын байран дахь бэлгийн дарамттай холбоотой асуудлаарх өргөдөл, гомдлыг Хүний эрхийн Үндэсний Комисс шалгахыг үүрэг болгосон. Энэ асуудлын хохирогч нь эмэгтэйчүүд бөгөөд ажлаасаа гарах, эсвэл бэлгийн дарамтад орсноор гэр бүлээс гадуурх харилцааг үүсгэх, үүнээс болоод гэр бүлийн хүчирхийлэлд өртөх эрсдийг дагуулж байгааг Хүний эрхийн Үндэсний комиссын гишүүн П.Оюунчимэг хариултдаа тодотгов. Тэрбээр цаашдаа ажлын байран дахь бэлгийн дарамттай холбоотой асуудал зогсохгүй байвал бэлгийн дарамт үзүүлсэн албан тушаалтан, хүмүүсийн талаарх мэдээллийг хуулийн дагуу ил болгохыг онцгойлон анхааруулав.

Эрүүл мэндийн Дэд сайд Л.Бямбасүрэн хариултдаа, Монгол Улсад хөгжлийн бэрхшээлтэй иргэд нийт 109306 байгаагийн 47 хувь нь эмэгтэйчүүд бөгөөд үүний 24.3 хувь нь нөхөн үржихүйн насныхан гэдгийг дурдаад хөгжлийн бэрхшээлтэй эмэгтэйчүүдийн бэлгийн болон нөхөн үржихүйн эрүүл мэнд, эрхийн асуудалд Эрүүл мэндийн яам анхаарал тавьж ажиллаж байгаа гэв. Тухайлбал, Эрүүл мэндийн анхан шатны статистик бүртгэлийн маягтуудад хөгжлийн бэрхшээлтэй эмэгтэйчүүдэд шаардлагатай эрүүл мэндийн мэдээллийн маягтуудыг шинэчлэх, тэднийг эрүүл мэндийн урьдчилан сэргийлэх үзлэгт хамруулах, жирэмслэлтээс хамгаалах арга, хэрэгслээр тогтмол хангахаар төлөвлөн ажиллаж байгаа талаар дурдсан.

Хуралдааны эцэст Хүний эрхийн дэд хорооны дарга Н.Оюундарь Монгол Улс дахь хүний эрх, эрх чөлөөний байдлын талаарх 18 дахь илтгэлийг статистик мэдээлэлтэй, кейс болгоноор асуудлаа дүгнэсэн сайн илтгэл болсныг дурдаад, Дэд хорооноос гарах тогтоолд С.Зоригийн хэрэгтэй холбоотой шүүгдэгчдийг эрүүдэн шүүсэн талаарх асуудлыг тусгахаа мэдэгдэв.

Илтгэлийг 2019 оны 05 дугаар сарын 01-ний өдөр УИХ-ын Хууль зүйн байнгын хороогоор хэлэлцүүлэхийг дэмжлээ.

Барилга, хот байгуулалтын яам, Газар зохион байгуулалт, геодези зураг зүйн газар, Монголын геодези, фотограмметр, зурагзүйн холбоо хамтран зохион байгуулж буй “Геодези, зураг зүйн салбарын ажилтны II зөвлөгөөн” Төрийн ордны их танхимд боллоо.

Зөвлөгөөнд УИХ-ын гишүүн М.Билэгт, Барилга, хот байгуулалтын дэд сайд Б.Мөнхбаатар, яамны удирдлагууд, Газар зохион байгуулалт, геодези, зураг зүйн газрын орлогч дарга А.Батбаяр, Нийслэлийн төр захиргааны байгууллагууд, аймгуудын Газрын харилцаа, барилга хот байгуулалтын газрын дарга нар, Монголын геодези, фотограмметр, геодези, зураг зүйн холбоо, Геодези, зураг зүйн үйлдвэрлэл үйлчилгээ эрхлэх тусгай зөвшөөрөл бүхий аж ахуйн нэгжүүдийн 300 гаруй төлөөлөгч оролцсон юм.

Зөвлөгөөнийг Барилга, хот байгуулалтын дэд сайд Б.Мөнхбаатар нээж, Ерөнхий Сайд, УИХ-ын гишүүн М.Билэгт, Гавьяат барилгачин Б.Рагчаа нар мэндчилгээ дэвшүүллээ.

Дэд сайд Б.Мөнхбаатар “Монгол Улсын Хөгжлийн бодлогын баримт бичгүүд, Засгийн газрын үйл ажиллагааны хөтөлбөрт туссан болон бусад бүтээн байгуулалтын ажлуудыг хэрэгжүүлэхэд геодези, зураг зүйн салбар л зөв мэдээллээр хангаж байдаг. Ингэж байж л зөв төлөвлөлт, хөгжилд хүрэх учиртай” гэдгийг онцоллоо.

Геодези, зураг зүйн салбар нь улс орны нийгэм, эдийн засгийн бүхий л салбар тэр дундаа Улсын хилийг зураглах, хилийн баганы солбицлыг геодезийн аргаар тодорхойлж улс орныг батлан хамгаалж, аюулгүй байдлыг хангахад, мөн байгаль орчин, хөдөө аж ахуй, геологи, уул уурхай, зам тээвэр, барилга, хот байгуулалт зэрэг нийгэм, эдийн засгийн бүхий л салбарын төлөвлөлт, ашиглалтад суурь газрын зураг, орон зайн мэдээллийн санг бүрдүүлээд зогсохгүй, хэмжилт зураглалт, хяналтыг гүйцэтгэдэг 200 гаруй тусгай зөвшөөрөлтэй аж ахуйн нэгжтэй, салбарын хэмжээнд 2000 гаруй ажилтан, албан хаагчтай томоохон салбар юм.

Энэ удаагийн зөвлөгөөнөөр Геодези, зурагзүйн салбарт тулгамдаж буй асуудал, хууль, эрх зүйн орчныг боловсронгуй болгох шаардлага, Геодези, зураг зүйн салбарт улсын төсвийн хөрөнгө оруулалтаар хийгдэж буй төсөл, хөтөлбөрийн хэрэгжилт, салбарын хөгжлийн чиг хандлага, Геодези, зурагзүйн үйлдвэрлэлийн аж ахуйн нэгжүүдийн өнөөгийн байдал, чадавхийг дээшлүүлэх шаардлага, үнэлэмж, Нийслэл хотыг хөгжүүлэхэд Геодези, байр зүйн зургийн хэрэгцээ, шаардлага, Аймаг, орон нутгийг хөгжүүлэхэд Геодези, зураг зүйн үйл ажиллагаа, бүтээгдэхүүний хэрэгцээ, шаардлага зэрэг өргөн хүрээний илтгэл тавьж, салбарын мэргэжилтнүүд, инженерүүдийн санал бодлыг сонссон юм.

Мөн Геодези, зурагзүйн салбарын хөгжлийг харуулсан үзэсгэлэн /хамгийн сүүлийн үеийн техник, технологийг багтаасан/ зохион байгуулагдаж салбарын бүтээгдэхүүн, үйл ажиллагааг Батлан хамгаалах, Байгаль орчин, Хөдөө аж ахуй, Барилга, Хот байгуулалт, Геологи, уул уурхай, Инженерийн дэд бүтцийн салбарт хэрхэн ашиглаж байгааг танилцуулахаас гадна нийтийн хэрэгцээнд зориулсан төрөл бүрийн газрын зураг, атласыг толилон харуулсан юм.

Мөн Геодези, зураг зүйн салбарын II зөвлөгөөнөөр “Геодези, зураг зүйн талаар төрөөс баримтлах бодлого”-ын баримт бичгийн төслийн хэлэлцүүлэг өрнөж зөвлөмж гаргалаа.

Геодези, зураг зүйн салбар нь дараахь томоохон ажлуудыг гүйцэтгээд байна. Үүнд:
– Монгол Улсын хилийг тогтооход хамтран оролцож хилийн багануудыг геодезийн хэмжилтээр солбицолжуулан, хилийн шугамыг зурагласан ба улсын хилийг НҮБ-аар баталгаажуулах суурь мэдээллийг бүрдүүлсэн.
– Монгол орны нийт нутаг дэвсгэрийг 1:100000 болон түүнээс жижиг масштабын байр зүйн зургаар бүрэн зурагжуулсан.
– 2012-2019 онд нутаг дэвсгэрийн 45 хувийг 1:25000-ны масштабтай байр зүйн зургаар зурагжуулсан.
– Аймгийн төв, сумын төв, томоохон суурингийн төвийн 1:1000-ны масштабтай байр зүйн болон кадастрын зураг, газар дээрх болон доорх шугам сүлжээний зураглал, орон зайн мэдээллийн санг бүрдүүлсэн юм.
– 2013-2017 онд хаягийн мэдээллийн систем байгуулах ажлын хүрээнд суурин газрын төвийг 1:1000, суурингаас бусад газрыг 1:100000-ны масштабтай хаягийн зураг, мэдээллийн санг байгуулсан.
– Мөн 1980 онд 242000 газар зүйн нэрийг газар дээр нь явж тодруулан 2004 онд 214000 газар зүйн нэрийг УИХ-аар батлуулсан.

Эдгээр газрын зураг, орон зайн мэдээллийн сан, хаягийн мэдээллийн санг Үндэсний орон зайн өгөгдлийн дэд бүтцийн системээр дамжуулан хэрэглэгчдэд хүргэхээр ажиллаж байна.

БАРИЛГА, ХОТ БАЙГУУЛАЛТЫН ЯАМ

“Singapore school of Mongolia” сургуульд хоолны хордлого гарч, 30 гаруй хүнд хоолны хордлогот халдварын шинж тэмдэг илэрч, Халдварт өвчин судлалын үндэсний төвд шинжилгээ, оношилгоо хийлгэж байна гэж ЭМЯ-наас мэдээлж байсан. Тэгвэл мэргэжлийн хяналтын улсын байцаагчид хяналт шалгалт хийж, дүгнэлтээ гаргажээ. Тус сургуулийн хоолны газрыг “УНЭТО трейд” ХХК түрээслэн ажиллуулдаг байсан бөгөөд 2019 оны дөрөвдүгээр сарын 5-ны өдрөөс эхлэн бүхэлд нь түр хугацаагаар зогсоож, зөрчил шалган шийдвэрлэх үйл ажиллагааг явуулсан байна.

Лабораторийн шинжилгээний хариу:

• Боловсруулсан долоон нэрийн хоол, хоёр нэрийн хүнсний бүтээгдэхүүн, арчдасны нэг буюу 11.1 хувь, шүүсэн усны дээжинд эрүүл ахуйн шалгуур үзүүлэлтийн зөвшөөрөгдөх хэмжээнээс нянгийн бохирдол их гарсан байна.
• Нян судлалын шинжилгээнд 109 хүн хамрагдсанаас шигел /Shigella Flexner 1a/ илэрсэн нийт хүний тоо 44 байна. Үүнээс сурагч 34, багш 8, гал тогооны 2 ажилтан байжээ.
• Төвлөрсөн шугамын унд ахуйн ус нь хими, нян судлалын шинжилгээгээр холбогдох стандартын шаардлага хангасан байна.
• Тахианы мах нийлүүлэгч 4 аж ахуйн нэгж /Импортлогч болон ханган нийлүүлэгч, жижиглэн худалдаа эрхлэгч/-ээс тахианы махыг дээжинд авч Улсын мал эмнэлэг, ариун цэврийн төв лабораторийн шинжилгээгээр аюулгүй байдлын болон эрүүл ахуйн шалгуур үзүүлэлт нь Хүнсний бүтээгдэхүүн дэх бичил биетний аюулгүй байдал болон эрүүл ахуйн шалгуур үзүүлэлтийн зөвшөөрөгдөх хэмжээ MNS 6308:2012 стандартын ерөнхий шаардлагыг хангаж байна.

ДҮГНЭЛТ

• Тархвар зүйн тандалт судалгаа, өвчтөнд илэрсэн эмнэлзүйн шинж тэмдэг, эпидемийн муруй, нууц үеийн хугацаа, эмнэл зүйн лабораторийн нян судлалын шинжилгээний дүнг үндэслэн Сингапур скүүл оф Монголиа сургуулийн багш, сурагчдын дунд гэдэсний бүлгийн эмгэгтөрөгч нянгаар (Shigella spp) үүсгэгдсэн хоол хүнсээр дамжих өвчний дэгдэлт гарчээ.
• УНЭТО ХХК-ийн хоолны газрын ажлын байр нь эрүүл ахуйн нөхцөл, шаардлагыг хангахгүй, 2019 оны 4 дүгээр сарын 1-ний өдөр хоол үйлдвэрлэлийн өрөөний бохир зайлуулах шугам хоолой бөглөрч, бүрэн бүтэн байдал алдагдсан, халдваргүйтгэл хийлгээгүй нь халдварт өвчнийг дамжуулах хүчин зүйл, эрсдлийг нэмэгдүүлсэн байна.
• УНЭТО ХХК-ийн хоолны газрын ажилчид /тогооч, бэлтгэгч нар/ гэдэсний халдварт өвчнөөр хөнгөн балархай хэлбэрээр өвчилсөн үедээ хоол боловсруулах, савлах, түгээх үйл ажиллагаанд оролцож байсан нь халдварын эх уурхай болсон гэж үзэх үндэслэлтэй байна.

МХЕГ-аас энэ оны хяналт шалгалтын төлөвлөгөө, Засгийн газраас өгсөн үүргийн дагуу Налайх дүүргийн нутаг дэвсгэрт үйл ажиллагаа явуулдаг “Заламт гол”, “Хос даль”, “Болор Аграмба” компаниудад хяналт шалгалт хийж байна.

Эдгээр компаниуд нь аюултай хог хаягдал болох автомашины аккумуляторыг дахин боловсруулж, хар тугалгыг ялган экспортонд гаргадаг. “Хос даль”, “Болор аграмба” компаниудын үйл ажиллагааг 2018 онд мэргэжлийн хяналтын байгууллагаас зогсоосон бол “Заламт гол” компанийн үйл ажиллагааг 2013, 2015 онд түр зогсоож байжээ. 2018 онд “Хос даль” компани нь БОНБҮ-гүй, холбогдох зөвшөөрөлгүйгээр үйл ажиллагаа явуулж байсныг НМХГ-аас зогсоож, хүхрийн хүчил хадгалсан тул цагдаагийн байгууллагад шилжүүлсэн байна. 2017 онд Хог хаягдлын тухай хууль шинэчлэгдэн, холбогдох журам 2018 оны тавдугаар сард батлагдаж, 2019 оны нэгдүгээр сараас эдгээр компаниуд тусгай зөвшөөрлийн үндсэн дээр үйл ажиллагаа явуулах нөхцөл бүрдсэн. “Заламт гол” компани тусгай зөвшөөрөл аваагүй байсан тул зөрчил арилгах хүртэл хугацаанд үйл ажиллагааг улсын байцаагчын актаар зогсоож, лацдав. Тус компанийн захирал Ц.Ууганбаярын хэлснээр үйл ажиллагаа явуулах хугацаандаа хаягдал аккумлятороос 600 тонн хүхрийн хүчлийн шингэнийг “Эрдмин компанид нийлүүлж, 4200 тн хар тугалга экспортолжээ. Швейцар Улсын Базель хотноо 1989 оны 3 дугаар сард “Аюултай хог хаягдлыг хил дамжуулан тээвэрлэх, зайлуулахад хяналт тавих тухай Базелийн конвенц”-ийг баталсан байдаг. Монгол Улс 1996 оны 12 дугаар сарын 05-ны өдөр Аюултай хог хаягдлыг хил дамжуулан тээвэрлэх, зайлуулахад хяналт тавих тухай Базелийн конвенцийг УИХ-аар соёрхон баталсанаар дагаж мөрдөх болсон. Энэ конвенци нь аюултай болон бусад хог хаягдал, тэдгээрийг хил дамжуулан тээвэрлэхдээ улс орнууд хүний эрүүл мэндийг хамгаалах, байгаль орчны тэнцвэртэй байдлыг хадгалах зорилгоор олон улсын өмнө үүргээ биелүүлэх ёстой бөгөөд манай улсын хувьд хөрш улсууд аюултай хог хаягдлыг хил дамжуулан тээвэрлэх, импортлох үйл ажиллагааг хориглодог. Иймд аюултай хог хаягдлыг өөрийн улсдаа байгаль орчинд ээлтэй технологиор устгах арга хэмжээг авч хэрэгжүүлэх нөхцөл шаардлага бий болж байгаа аж.

“Өрсөлдөөн дэх оюуны өмчийн үнэ цэнэ” сэдэвт онол, практикийн анхдугаар хурал өчигдөр МУИС-н номын сангийн байранд болж өнгөрлөө. Хурлын үеэр оюуны өмчийг хуулиар хамгаалах, эдийн засгийн эргэлтэд хэрхэн оруулах талаар төр болон хувийн хэвшлийн төлөөлөгч нар хэлэлцсэн юм.

Хурлын үеэр Улаанбаатар Хотын Банкыг онцоллоо. Улаанбаатар Хотын Банк нь импортын барааг орлох үйлдвэрлэл эрхэлж буй бизнес эрхлэгч нарт “Барааны тэмдэг барьцаалсан зээлийг” арилжааны банкууд дундаас анх удаа олгож эхэлсэн. Ингэснээр оюуны өмчийг эдийн засгийн эргэлтэд оруулах бодит алхам боллоо гэдгийг хэлэлцүүлэгт оролцогч нар цохон тэмдэглэсэн юм.

Э.Шинэбаяр: Улаанбаатар Хотын Банкны Бүтээгдэхүүн Хөгжлийн Хэлтсийн Захирал

Улаанбаатар хотын банк нь 20 жилийн ойн хүрээнд банкны системд анх удаа “Барааны тэмдэг буюу оюуны өмч”-г барьцаалан 50 сая хүртэлх төгрөгийн зээлийн бүтээгдэхүүн гаргасан юм. Зах зээлд анх удаа нэвтэрсэн энэхүү бүтээгдэхүүн маань өнгөрсөн гурван сарын хугацаанд маш олон бизнес эрхлэгчийн гарт хүрээд байна. Төрийн зүгээс хууль эрх зүйн тал дээр шаардлагатай асуудлуудыг зохицуулбал зөвхөн барааны тэмдэг гэдгээр зээлийн бүтээгдэхүүн хязгаарлагдахгүй. Цааш нь илүү хөгжүүлж барьцаа болон нөхцөл шаардлагыг сайжруулах боломжтой юм.

Э.Анхгэрэл: Бөбүн трейд ХХК-ийн Гүйцэтгэх Захирал

Манай Бөбүнэ ааруулан чихрийн үйлдвэр маань энэ жил Mongol HD телевизийн Шарк Танк төсөлд оролцож Энхтүвшин шарк болон Чинбат шаркаас 50 сая төгрөгийн хөрөнгө оруулалт авч чадсан. Энэхүү хөрөнгө оруулалтаа үйлдвэрийн хүчин чадлыг нэмэгдүүлэхэд ашигласан юм. Үйлдвэрийн тоног төхөөрөмжөө шинэчилсэнтэй холбоотой бүтээгдэхүүн дээрээ шинэчлэлт хийх шаардлага гарсан. Ингээд өөрийн брэндийн барааны тэмдэгээ барьцаалан УБХБанкнаас 50 сая төгрөг зээлсэн. Үндэсний үйлдвэрлэлийг ингэж бодитой дэмжиж байгаад бид баяртай байгаа.

Ерөнхий боловсролын сургуулийн 2018-2019 оны хичээлийн жилийн сурагчдын зуны амралт зургадугаар сарын 1-нд эхэлнэ. гуравдугаар улирын амралтаар нийслэлийн сургуулийн сурагчид нэг долоо хоног, аймаг, сумын сургуулийн сурагчид гурван долоо хоног амарч, дөрөвдүгээр сарын 15-нд хичээллэж эхэлсэн.

Нийслэл болон аймаг, сумын сургуулийн сурагчдын зуны амралт нэгэн зэрэг зуравдугаар сарын 1-нд эхлэх аж. Тодруулбал, улс даяар

• I-II ангийн сурагчид VI сарын 01-нээс
• III-V ангийн сурагчид VI сарын 08-наас
• VI-XII ангийн сурагчид VI сарын 15-наас эхлэн амарна.

Богдхан уулын дархан цаазат газрын хязгаарлалтын бүс Бага тэнгэрийн аманд аялал жуулчлалын зориулалтаар 4.0 га газрыг эзэмшиж байсан “Зүүнбаян рефайнери” ХХКомпани эрх бүхий албан тушаалтны зөвшөөрөлгүйгээр 0.6891 га талбайд бургасан ойг сүйтгэсэн талаар мэдээлсэн билээ. Уг хэрэг бүртгэлтийн хэргийг Нийслэлийн прокурорын газраас 2019 оны дөрөвдүгээр сарын 04-ний өдөр хааж, шийдвэрлэснийг сэргээн шалгуулахаар болсон байна. Тус компани нь газар, газрын хэвлий, хөрс, ургамлыг зөвшөөрөлгүйгээр гэмтээсэн, устгасан, усны нөөцийг хордуулсан, тасалдуулсан эсэхийг бүрэн шалгаж тогтоогоогүй байх тул дахин шинжээч томилж, мөрдөн шалгах ажиллагаа явуулж байгаа аж.