Кенийн нийслэл Найроби хотын олон улсын нисэх онгоцны буудлаас хөөрсөн ачааны онгоц осолдсон байна.Орон нутгийн цагаар өглөөний 4.00 цагт хөөрч удалгүй байшин дээр унасны улмаас дөрвөн хүн амь үрэгджээ. Осол болсон газар түргэн тусламжийн хоёр ч баг ажиллаж байгаа тухай Кенийн хэвлэл мэдээллээ. Одоогоос ослын шалтгааныг тогтоогоогүй байна.
Ю.Дэлгэр
Цахим ярилцлагын эхэнд Төрийн нарийн бичгийн дарга Үндэсний их баяр наадмаар зохион байгуулах соёлын арга хэмжээний талаар танилцууллаа. Үндэсний их баяр наадам нь Монгол үндэстэн оршин байгаагийн илэрхийлэл, монгол түмний бахархал болсон хүндэтгэлт их цэнгэл юм. Тийм ч учраас Засгийн газраас баяр наадмын бэлтгэл ажилд онцгой анхаарч Шадар сайдаар ахлуулсан байнгын ажиллагаатай зохион байгуулах хороо ажилладаг. Эрийн гурван наадмаас гадна зохиогдох соёлын арга хэмжээнүүдийн бэлтгэл ажил төлөвлөгөөний дагуу хийгдэж байна гэж Соёл, спорт, аялал жуулчлалын яамны Төрийн нарийн бичгийн дарга П.Алтангэрэл хэллээ. Баяр наадмын нээлт, хаалтын ёслол, Монгол төрийн хүндэтгэлийн концерт, Улаанбаатарын үдэш их цэнгүүнээс гадна “Эх орноо хамтдаа дуулъя” сэдэвт урлагийн наадам зохион байгуулахаар төлөвлөжээ. Үндэсний их баяр наадмын нээлтийн ажиллагаанд өнгөрсөн жил 900 гаруй уран бүтээлчид оролцож байсан бол энэ жил 4000 орчим хүн оролцож, Монгол улсын түүхийг үечлэн харуулсан урлагийн тоглолт бүхий нээлт хийхээр бэлтгэж байна.
Соёл, спорт, аялал жуулчлалын яамны Төрийн нарийн бичгийн дарга П.Алтангэрэлд хандаж иргэдээс ирүүлсэн асуултын дийлэнх нь аялал жуулчлалын салбартай холбоотой байлаа. Шинэчлэлийн Засгийн газар байгуулагдсанаар аялал жуулчлалын салбарт цоо шинэ бодлого хэрэгжиж, 2017 он гэхэд Монголд ирэх жуулчдын тоог 1 саяд хүргэх зорилт тавин ажиллаж байна. Энэ салбарт үйл ажиллагаа явуулж байгаа хувийн хэвшлийнхнийг төр бодлогоор дэмжиж, эрх зүйн орчноо шинэчилж, жуулчдад зориулсан бүтээгдхүүнийхээ агуулгыг баяжуулж, тоог нэмэгдүүлж, үйлчилгээний чанарыг сайжруулж байж энэ зорилт хэрэгжинэ. Жилд сая жуулчин авдаг болсон үед нэг жуулчнаас 1000 доллар Монгол улсад үлдэхэд нийт 1 тэрбум доллар улсын эдийн засагт шингэж үлдэнэ гэсэн тооцоо байна. Энэ нь одоогийн ноолуурын салбарын Монголд үлдээж байгаа мөнгөнөөс нэг дахин их, нүүрсний салбарын оруулж байгаатай дүйцэхүйц хэмжээний мөнгө гэдгийг Төрийн нарийн бичгийн дарга хэллээ гэж Засгийн газрын Хэвлэл мэдээлэл, олон нийттэй харилцах албанаас мэдээллээ.
Нийслэлийн Засаг даргын албан үүргийг түр орлон гүйцэтгэгч Нийслэлийн Засаг даргын Санхүү, эдийн засгийн асуудал хариуцсан орлогч Н.Батаа “Улаанбаатар хотын эдийн засгийн хөгжлийн стратеги боловсруулах” ажлын хэсэг байгуулах тухай А/547 захирамж гаргалаа. Захирамжаар Улаанбаатар хотын эдийн засгийн хөгжлийн стратеги боловсруулах удирдах болон салбар хороодын ажлын хэсгийн бүрэлдэхүүнийг баталсан байна. Ажлын хэсгийн чиг үүргийг уялдуулан зохион байгуулах, үйл ажиллагаанд хяналт тавьж, удирдлага, зохион байгуулалтаар хангаж ажиллахыг нийслэлийн Эдийн засгийн хөгжлийн газар, хороодын хурлыг зохион байгуулах, стратеги боловсруулах байнгын ажиллагааг хангаж ажиллахыг Ажлын хэсгийн ахлагч нарт үүрэг болголоо. Улаанбаатар хотын эдийн засгийн стратегийг 2014 оны 12 дугаар сарын 30-ны дотор боловсруулж дуусган, 2015 оны төсөвт шаардлагатай зардлыг тусгуулахыг нийслэлийн Эдийн засгийн хөгжлийн газар, Ажлын хэсгийн ахлагч нарт үүрэгдсэн байна.
Бразил улсад амжилттай үргэлжиж буй хөлбөмбөгийн ДАШТ-ий финал ойртох тусам орон орны фанатуудын сэтгэл хөдлөл дээд цэгтээ хүрч буй. Тус улсын эргүүлийн цагдаа нар Аргентин, Герман улсын шигшээ багийн 50 гаруй фанатыг Бразилийн төрийн далбаатай зүй бусаар харьцаж, галдан шатааж байхад нь саатуулсан тухай “Синьхуа” агентлаг мэдээллээ. Аргентиний шигшээ багийн фанатууд мэдүүлгийнхээ үеэр “Бразилийн шигшээ баг, Наймер бэртэл аваасай хэмээн төрийн далбааг нь шатаасан гэсэн бол Германчууд “Бразил жуулчдын эрхийг ноцтой зөрчиж байна” хэмээн мэдүүлэг өгөхөөс татгалзсан аж. Баригдсан хоёр орны фанатуудаас тус бүр 25 ам.долларын торгууль авч сулласан гэнэ. Германы Хөлбөмбөгийн холбоо тус улсын Ерөнхийлөгч Дилма Русеффээс уучлалт хүсч, иргэдээ соёлтой боловсон байхыг сануулсан байна.
Францын экс Ерөнхийлөгч Николя Саркозийг авлига авсан хэмээн буруутгаж, Парист байрлах гэрээс нь албадлагаар баривчилсан тухай “ВВС” агентлаг мэдээллээ. Холбооны мөрдөх товчооноос мэдээлсэнээр Николь Саркоз 2007-2012 онд Ерөнхийлөгчөөр ажиллаж байхдаа эрх мэдлээ хэтрүүлэн ашиглаж, Монакогийн шүүгч Гилберт Азибертийг өндөр албан тушаалд томилж, хариуд нь их хэмжээний мөнгөн хууль бусаар авсан гэнэ. Гилберт Азиберт нь давж заалдах шатны шүүхийн дэд ахлах бөгөөд ирэх даваа гаригт Ерөнхийлөгчтэй хамт шүүх хуралд оролцох гэнэ. Цагдаагийнхан мөн Патрик Сазоуст хэмээх шүүгчийг энэ хэрэгт холбогдуулан шалгаж байгаа аж. Ерөнхийлөгч түүнийг мөн адил өндөр албан тушаалд хууль бусаар томилсон хэмээн таамаглаж буй. Харин экс тэргүүн хатагтай Карла Бруни “Энэ бол хууль бус. Би бүх шатны хуулийн байгууллага болон өнөөгийн Ерөнхийлөгч Франсуа Олландад хүртэл хандах болно” гэж хэлжээ.
БНХАУ-ын Засгийн газар болзол хангасан гэр бүлийг хоёр хүүхэдтэй болохыг зөвшөөрсөн тухай “Ройтерс” агентлаг мэдээллээ. Хагас зуун жилийн турш үргэлжилсэн “Нэг гэр бүл нэг хүүхэд” хууль жендерийн асуудалд ноцтой зөрчигдөж, хөгшрөлт газар авч буйтай тэмцэх зорилготойгоор тодорхой болзол хангасан, хүндэтгэх шалтгаантай гэр бүлд хоёр дахь хүүхэд гаргахыг хүлээн зөвшөөрч, хуульд өөрчлөлт оруулжээ. Тус хуульд “Гэр бүлийн нэг нь өргөмөл хүүхэд буюу одоо төрийн албан хаагч”, “0-3 насандаа эцэг, эхээ алдсан”, “500 сая юань буюу түүнээс дээш хөрөнгөтэй мөртлөө эцэг эхийн нэг нь хорт хавдар эсвэл хүнд өвчнөөр өнгөрсөн”, “18 нас хүртлээ асрамжийн газарт амьдарсан одоо төрийн албан хаагч” гэх мэт болзол хангасан гэр бүлийг хоёр дахь хүүхдээ төрүүлэхийг зөвшөөрчээ. НҮБ-ын судалгаагаар “Энэхүү хууль хэрэгжиж эхэлсэнээр 2020 онд хамгийн багадаа 2.5 сая хүүхэд төрнө” гэсэн байна.
УИХ-ын нэгдсэн чуулганы өчигдрийн хуралдаанаар Төрөөс төмөр замын тээврийн талаар баримтлах бодлогын хэрэгжилтийг хангах зарим арга хэмжээний тухай УИХ-ын тогтоолын төслийг хаалттай хэлэлцээд уг төслийг хаврын чуулганаар хэлэлцэхгүй болж, хойшлуулав. Ингэснээр төмөр замын асуудлыг намрын чуулганаар үргэлжлүүлэн хэлэлцэхээр болж байна.
“Азтай савар- Амьтанд хайртай залуус” ТББ-аас Чингэлтэй дүүргийн мэргэжлийн хяналтын хэлтэст солонгос хоолны газарт нохойн махаар хоол хийж байгаа тухай мэдээлэл ирүүлжээ. Энэхүү мэдээллийн дагуу дүүргийн мэргэжлийн хяналтын хэлтсээс Урт цагаан худалдаа үйлчилгээний төвийн наймдугаар корпусын хоёр давхарт үйлчилгээ явуулдаг “Пхеньян” хоолны газарт хяналт шалгалт хийхэд нохойн мах хэрэглэж байсныг тогтоожээ.
Шалгалтын явцад 7.2 кг нохойн мах илрүүлэн устгаж, үйл ажиллагааг түр хугацаагаар зогсоох шийдвэр гаргасан байна. Мөн холбогдох хуулийн заалтын дагуу 960.000 төгрөгийн торгууль ногдуулж, шийтгэврийн арга хэмжээ авчээ.
Энэ долоо хоногийн эхээр Энэтхэгт хуучирч муудсан барилга нурж олон хүний аминд хүрсэн байна. Цагдаа нар болон аврах албаныхан эцсийн байдлаар амиа алдагсдын тоо 32-т хүрсэн тухай мэдээлжээ. Тус улсын Тамил Наду мужийн Ченнайд 11 давхар байшин үргэлжлэн орсон аадар борооны усны түрлэгэнд нурсны улмаас маш их хохирол дагуулсан юм. Аврах албаныхан барилгын нурангид дарагдсан хүмүүсийн тоог нарийвчлан гаргаж, 32 хүн амиа алдаж 20 гаруй хүн сураггүй алга болсон гэжээ. Одоогоор 27 хүн эмнэлэгт хэвтэн эмчлүүлж байгаа бол барилгын нурангинаас гадна аадар борооны үерт 10 хүн урсан оджээ. Тэднийг амиа алдсан хэмээн Энэтхэгийн хуулийнхан мэдээлсэн байна.
Наадмын өдрүүдэд буюу 7-р сарын 10, 11, 12, 13-нд Хүй долоон худаг руу төмөр замын автобус болох Railbus-аар зорчих боломжтой болжээ. RailBus Амгалан өртөөнөөс зорчигчдоо суулгаж эхлэх бөгөөд замдаа Дүнжингарав худалдааны төв, Дунд гол гэсэн хэд хэдэн зогсоолоор дайран Хүй долоон худаг дахь Давааны өртөө хүрэх юм. Харин тэндээсээ Морь барианы газар хүртэл том оврын автобус наадамчин олонд “үнэ төлбөргүй” үйлчлэх аж.