Амны хаалтаас үүдэлтэй батга, тууралт ихэнх хүний гоо сайхан, сэтгэл зүй, эрүүл мэндэд сөрөг нөлөө үзүүлдэг.
Агаарын солилцоогүй орчинд удаан хугацаагаар байх нь тууралт бий болох гол хүчин зүйл болдог талаар Нью-Йоркийн гоо сайханч, арьсны мэргэжилтэн София Павитт тайлбарласан байдаг. Түүнчлэн олон улсын хэмжээнд энэ төрлийн тууралтыг маскне гэж нэрлэх болжээ.
ҮҮСЭХ ШАЛТГААН:
- Эрүү, хацар, хамар хэсгийн арьс маш эмзэг байдаг тул амархан цочирддог
- Амны хаалт зүүсэн үед агаарын солилцоо маш бага байдаг
- Амны хаалт зүүсэн үед агаарын солилцоо бага байдаг тул хөлс ууршихгүйн улмаас сэвх, нөсөө толбо, нүхжилт үүсдэг
- Арьсны гадаргуу дээр гадны биет үрэлт үүссэнээс болж арьс цочирч, үрэвсдэг
- Хэрэв тослог арьстай бол улам тослогжиж, нүхжилт үүсэж, батга гардаг бол хуурай арьстай хүний хамар, хацар, эрүү орчимд тууралт үүсдэг.
“Маскне”-гээс хэрхэн урьдчилан сэргийлэх вэ?
- Юуны өмнө маскаа зүүхийн өмнө болон дараа нь арьсаа зөөлөн цэвэрлэгчээр тогтмол цэвэрлэх хэрэгтэй. Ингэснээр маскны дор нян үржихээс сэргийлнэ.
- Химийн гаралтай гуужуулагч хэрэглэн арьсны гадаргуу дээрх үхсэн эд эсүүдийг цэвэрлэх хэрэгтэй. Гликолийн хүчил, сүүн хүчил зэрэг AHAs буюу альфа гидрокси хүчлүүд болон салицилийн хүчил зэрэг BHAs буюу бета гидрокси хүчлүүдийн тусламжтай үхсэн эд эсүүдээ задалж, арилгах боломжтой. Арьсыг цочроох хатуу найрлагатай скраб хэрэглэхээс зайлсхийгээрэй.
- Сайтар цэвэрлэж, гуужуулсны дараа арьсыг тайвшруулах үйлчилгээтэй чийгшүүлэгч тос түрхэх нь маш чухал. Зөөлөн бүтэцтэй, үнэртүүлэгч ороогүй, нүх бөглөдөггүй, гиалуроны хүчил агуулдаг тоснууд арьсыг тайвшруулж, чийгшүүлж, хамгаалалтын давхаргыг сэргээх болно.
- Ямар ч нөхцөлд нарны тос түрхэхээ мартаж болохгүй. Нүүрний дийлэнх хэсэг маскаар бүрхэгдсэн байгаа ч бусад хэсгүүд рүү нарны хэт ягаан туяа шууд тусаж байгаа тул өндөр SPF-тэй тос түрхэх зайлшгүй шаардлагатай.
- Эцэст нь олон удаа хэрэглэх боломжтой маск зүүдэг бол арьсаа үрэвсүүлэхгүйн тулд зааврын дагуу хэд хоногтоо нэг удаа биш, харин зүүх бүртээ угааж, цэвэрлэж заншаарай.