Зуслангийн чиглэлийн зам энэ зуны турш засвартай байж, зарим иргэд Дарь-Эхийн замыг сонгон зорчиж байлаа. Тэгвэл өчигдрөөс эхлэн зуслангийн чиглэлийн зарим замыг хэсэгчлэн нээсэн байна. Тухайлбал, Долоон буудлын замын цагдаагийн посттой уулзвараас Шадивлан хүртэлх таван км авто замыг нээжээ. Ингэснээр иргэд энэ замыг сонгох боломжтой болжээ.
Салхитаас Шадивлан хүртлэх замын өнгөн хучилтын ажил хийгдээгүй байгаа бөгөөд хучилт хийх үедээ замыг хаах аж. Одоогоор хэзээ хааж хучилтын ажил хийх нь тодорхойгүй байгааг замын ажилчид хэлж байгаа юм.
Энэ зуны хувьд зуслангийн замаас гадна нийслэлийн зүүн хэсгийн замд засвар шинэчлэлийг хийж байна. Албаныхны мэдээлж буйгаар 14 байршилд 91 тэрбум төгрөгөөр засвар хийж байгаа гэнэ. Зам засварын ажлыг ирэх сарын нэгнээс өмнө албан ёсоор дуусгах төлөвлөгөөтэйгөөр ажиллаж байгаа аж.
Ж.ЭНХ