Багын найзууд хамтран 100 хувь өөрсдийн хөрөнгөөрөө тоглож өссөн байрныхаа өмнө талбайд усан оргилуур барьжээ. Тодруулбал, Дархан-Уул аймгийн 8,9 дүгээр байрны өмнө уг бүтээн байгуулалтыг босгосон байна. Залуус анх “Цаг хугацааны машин №89” гэсэн фэйсбүүк хуудсанд нэгдэж олон янзын бүтээн байгуулалтын санаа солилцжээ. Ингээд усан оргилуур барих санаан дээр нэгдэцгээн үйл ажиллагаагаа эхлүүлсэн байна. Нийт 123 хүн одоогоор энэ группт байдаг аж. Энэхүү ажлыг санаачлагчдын нэг болох Д.Баярхүүгээс энэ тухай тодруулсан юм.
-Анх энэ санааг гаргах болсон шалтгаан тань юу вэ?
-Бид Дархан-Уул аймгийн 8, 9 дүгээр байранд төрж өссөн залуучууд. Хар багаасаа тоглож өссөн газраа өөрсдийн ирээдүй болсон хүүхэд багачууддаа зориулж тохижуулъя гэж ярилцаад гурван үеийн буюу 1970, 80, 90 оны залуучууд хамтарч энэ ажлыг хийлээ.
-Ажлаа хийх явцад хүндрэл бэрхшээл тулгарсан уу?
-Бид нэгдээд сэтгэлийн хөдөлгөөнөөр юугаа ч мэдэхгүй барилгын ажилдаа орсон. Мэргэжлийн хүний туслалцаа их хэрэгтэй байсан. Урьдчилж газрын бичиг, зөвшөөрөл авах ёстой байдгийг мэдэлгүй шууд ажлаа эхлүүлчихсэн юм. Харин нутгийн удирдлагууд болон иргэд биднийг дэмжиж энэхүү ажлаа дуусгахад хүндрэл тулгараагүй.
-Хөрөнгө мөнгөний асуудлаа хэрхэн шийдсэн бэ?
-Дундаасаа таван сая төгрөг цуглуулсан.
-Дархан-Уул аймгийнхан та бүхний энэхүү сайн үйлсэд мэдээж дуртай байгаа байх?
-Бидэнд Дарханд амьдардаг хүн бүр тусалсан. Тэр ч бүү хэл Дархан-Уул аймгийн Засаг дарга өөрийн биеэр ирж бидэнтэй уулзаж хийж буй ажлыг маань дэмжсэн. Мэргэжлийн хүмүүс ч бидний бүтээн байгуулалтад тусалсан. Энэ үйл хэрэг маань бүтэж өнөөдөр нутагтаа хүлээлгэж өгөх гэж байгаадаа их баяртай байгаа гэв.
Б.ЭРДЭНЭ-ОЧИР
