Усан спортын дэлхийн аварга шалгаруулах тэмцээн эдгээр өдрүүдэд ОХУ-ын Казаньд болж байна. 16 дахь удаагийн ДАШТ-д 190 орны 2400 орчим тамирчин 75 багц медалийн төлөө өрсөлдөж байна.
Манай улсаас эрэгтэй, эмэгтэй тус бүр хоёр нийт дөрвөн тамирчин ДАШТ-д оролцохоор хойд хөршийг зориод байна. Тодруулбал, усан спортын ОУХМ Б.Дөлгөөн, спортын мастер М.Дэлгэрхүү, спортын 1-р зэрэгтэй Б.Есүй (бүгд “Хангарьд” клуб), спортын дэд мастер Б.Энххүслэн (БГД-ийн УССТ-ийн тамирчин) нар өрсөлдөх юм. Тамирчид 50 м-ийн мэлхий сэлэлт, араар даллах, 100 м-ийн далайн гахай, өврөөр даллах, 4*100 холимог сэлэлт зэрэг төрлүүдэд өрсөлдөх бөгөөд наймдугаар сарын 4-ний өдрөөс эхлэн тэмцээнээ эхлүүлнэ.
Монголын баг тамирчид Казаньд. Фотог Mongolian Amateur Swimming Federation
16 дахь удаагийн ДАШТ-ийг өнөөдрийн байдлаар БНХАУ 6 алт, 4 мөнгө, 3 хүрэл медаль хүртсэн амжилтаар тэргүүлж байгаа бол ОХУ (4+2+1), АНУ (3+0+1), Итали (1+0+2), Их Британи (1+0+1) улс удаалж байна.
Тэмцээний нээлтийн үйл ажиллагаанд усан спортын ОУХМ, “Хангарьд” клубын тамирчин А.Тамир Монголын багийн тугчаар оролцжээ.
