Авлигатай тэмцэх газрын Мөрдөн шалгах хэлтэс есдүгээр сарын 12-16-нд гэмт хэргийн шинжтэй 19 гомдол, мэдээлэл хүлээн авч, нийт 100 гомдол, мэдээллийг шалгав. Үүнээс 16 гомдол, мэдээлэлд хэрэг бүртгэлтийн хэрэг нээж, 14 гомдол, мэдээлэлд хэрэг бүртгэлтийн хэрэг нээхээс татгалзах, нэг гомдол, мэдээллийг харьяаллын дагуу шилжүүлэх саналтайгаар прокурорт шилжүүлсэн бөгөөд одоогоор 69 гомдол, мэдээллийг хянан шалгаж байна.
Түүнчлэн эрүүгийн 745 хэрэгт мөрдөн байцаалтын ажиллагаа явуулснаас өнгөрсөн долоо хоногт 11 хэргийг хаах, найман хэргийг шүүхэд шилжүүлэх, гурван хэргийг харьяаллын дагуу шилжүүлэх саналтай прокурорт хүргүүлж, хоёр хэргийг нэгтгэн шалгаж байна.
Мөрдөн шалгах ажиллагаанд одоогоор 721 хэрэг шалгагдаж байна. Өнгөрсөн долоо хоногт нийт гурван объектод нэгжлэгийн ажиллагаа явуулж, мөрдөгчийн гурван мэдэгдэл бичиж холбогдох байгууллагуудад хүргүүлэв. Шүүхэд шилжүүлэх саналтайгаар прокурорын байгууллагад хүргүүлсэн хэргүүдийг дурдвал:
- Өвөрхангай аймгийн Өмчийн харилцааны газрын худалдан авах ажиллагааны газрын дарга “Д” нь албан тушаалын байдлаа урвуулан ашиглаж тендерт орж байгаа компаниудаас тендерт ялалт байгуулахад дэмжлэг үзүүлнэ гэж төрсөн эгчийнхээ дансаар мөнгө авдаг.
- “Т” нь Мал эмнэлгийн ерөнхий газрын даргаар ажиллаж байхдаа албан үүрэг, бүрэн эрхийн байдлаа урвуулан ашиглаж гэмт хэргийн улмаас олсон мөнгө гэдгийг мэдсээр байж ашигласан, 2018 оны аравдугаар сарын 12-ноос 2020 оны наймдугаар сарын 31-ний өдөр хүртэлх хугацаанд гэмт хэргийг байнга тогтвортой үйлдэж мөнгө угаасан.
- Нийслэлийн түргэн тусламжийн төвийн удирдлага, эмч нар болон Шуурхай удирдлагын төвийн нийт 14 албан тушаалтан гэртээ нас барсан, өвчний онош тодорхой буюу цагдаагийн байгууллагад шалгуулах шаардлагагүй гэж үзсэн үйлчлүүлэгчийн гэрийн хаягийг буяны компанид өгч, шарилыг хувийн компаниудаар зөөлгөхөд хууль бус давуу байдал олгож энэхүү үйлдэлдээ 100 сая төгрөгийн хахууль авсан.
- “Г” нь Нийслэлийн Байгаль орчны газрын Захиргааны хэлтэст байгаль хамгаалагчаар ажиллаж байхдаа бусдаас хахууль авсан.
- Сэлэнгэ аймгийн Баруунбүрэн сумын Засаг даргын Тамгын газар, Орхон бүсийн ойн ангийн эрх бүхий албан тушаалтнууд албан тушаалын байдлаа урвуулан ашиглаж 2021 оны гуравдугаар сарын 6-ны өдрийн орчимд ойгоос огтлолт хийх тусгай зөвшөөрөлгүй мэргэжлийн бус байгууллагад мод бэлтгэх зөвшөөрөл олгож, давуу байдал үүсгэсэн.
- Архангай аймгийн Эрдэнэбулган сумын Засаг даргын Тамгын газрын албан тушаалтнууд нь эрх мэдэл албан тушаалын байдлаа урвуулан ашиглаж бусдад давуу байдал бий болгосон гэх тус тус хэрэг байна.
Эх сурвалж: Авлигатай Тэмцэх Газар