Өмнөговь аймгийн Даланзадгад сумын төвийн хэсгээр өчигдөр үдээс хойш дуу цахилгаантай, хүчтэй аадар бороо орсны улмаас аймгийн төвд дахин үер буужээ. Энэ удаагийн үерийн улмаас хашаа, гэр, байшин барилгын суурийн давхар, граш, автомашинд ус орсон, автомашин шаварт суусан гэх 57 дуудлага, мэдээлэл Онцгой байдлын газарт ирсэн аж. Дуудлагын дагуу Онцгой байдлын газрынхан ажиллаж 21 автомашин, 36 том хүн, 9 хүүхэд, 36 гэр орон хашаа байшинг үерийн усанд автахаас аварчээ. Одоогоор хүний амь нас, эрүүл мэндэд эрсдэл гараагүй, харин эд хөрөнгийн хохиролын хэмжээ тогтоогдоогүй байна.
Мөн өнгөрсөн долоо хоногт буюу энэ сарын 16-ны өдөр 15 минут орчим үргэлжлэн орсон ширүүн борооны улмаас Далангийн гол дүүрч хальсан, зарим хорооллуудын гудамж, айл өрхүүд, аймгийн төвийн зарим хэсэг үерт автсан мэдээ ирж байсан билээ.
М.Ууган