“Нүүрс” хөтөлбөрийг хэрэгжүүлэх явцдаа албан тушаалаа урвуулан ашиглан 3.6 тэрбум төгрөгийн хохирол улсад учруулсан хэргээр Ерөнхий сайд асан Н.Алтанхуягийн ахлах зөвлөх асан Л.Гансүх нарын хүмүүсийг шүүх хурал Баянзүрх, Сүхбаатар, Чингэлтэй дүүргийн шүүхэд тав дахь өдрөө үргэлжилж байна. Шүүх хурал 10.00 цагт эхэлсэн бөгөөд улсын яллагч яллах дүгнэлтээ танилцуулж, Л.Гансүхэд таван жил, Б.Мөнгөнтуяад 7.5 жил, Н.Даваахүүг 7 жилийн ял оноох санал гаргасан байна. Тодруулбал, Л.Гансүхийг жирийн дэглэмтэй хориход таван жил хорих, Төрийн албанд ажиллах эрхийг нь дөрвөн жилээр хасах, Б.Мөнгөнтуяаг жирийн дэглэмтэй хориход 7.5 жил хорих, Н.Даваахүүг чанга дэглэмтэй хориход 7 жил хорих, Б.Мөнгөнтуяа, Н.Даваахүү хоёрын мэргэжлийн ажил хийх эрхийг дөрвөнжилээр хасах, хоригдсон хугацааг эдлэх ялаас хасаж тооцох саналыг Улсын яллагч н.Баярбилэг, н.Батжаргал нар танилцуулсаны дараа шүүгдэгчдийн өмгөөлөгч хүсэлтээ хэллээ.
Өмгөөлөгч н.Цэрэнжээ “Л.Гансүх гэдэг хүн гэмт хэрэг үйлдээгүй. Засгийн газраас хэрэгжүүлсэн “Нүүрс” хөтөлбөр ямар нэгэн гэмт хэргийн шинжтэй зүйл биш шүү. Тиймээс цагаатгаж өгнө үү” хэмээн шүүгчдэд хандаж хүсэлт гаргасан бол Ц.Баасандорж “Амгалангаас 7 буудал хүртэл 1 тонн нүүрсийг 10 мянган төгрөгөөр хүргэсэн. Ингэж хүргээгүй бол 20-30 мянган төгрөгөөр хүргэх байсан. Улсын яллагч бол энэ бүхнийг ерөөсөө ярьсангүй. Энэ хэрэг хохирогчгүй хэрэг, цагаатгаж өгнө үү” гэсэн юм.
Өмгөөлөгчид үг хэлсний дараа шүүх хурал түр хугацаагаар завсарлав.