Нийслэлд улаанбурхан өвчний тархалт нэмэгдэх хандлагатай байгааг мэргэжлийн байгууллагаас эцэг эхчүүдэд сэрэмжлүүлж байна. Улсын хэмжээнд улаанбурхан өвчний 9200 гаруй сэжигтэй тохиолдол бүртгэгджээ. Нийт тохиолдлын 90 хувь нь есөн сараас доош насны хүүхэд байсан бол одоо 15-24 насны оюутан, сурагчид өвчилж эхэлсэн байна. Тиймээс зөвхөн бага насны хүүхэдтэй эцэг эхээс гадна оюутан, сурагчид ч улаанбурхан өвчний мэдээлэлтэй байж өөрийгөө сэргийлэх хэрэгтэйг эрүүл мэндийн байгууллагынхан анхааруулж байна.
Түүнчлэн баяраар бага насны хүүхдээ нийтийг хамарсан арга хэмжээнд дагуулж явахгүй байхыг сэрэмжлүүллээ. Учир нь, улаанбурхан өвчний дархлаажуулалтын нэмэлт вакцин таригдаад удаагүй байгаа. Эцэг эхчүүд хүүхдэдээ вакцин тариулсан өдрөөс л дархлаа суудаг гэх ойлголттой байдаг. Тэгвэл хүүхэд вакцин хийснээс 30 хоногийн дараа бүрэн дархлаа суудаг бөгөөд энэ хугацаанд халдвар авах эрсдэлтэй байдаг гэнэ. Ингээд мэргэжлийн байгууллагынхны гаргасан улаанбурхан өвчнөөс сэргийлэх зөвлөмжийг хүргэе.
Улаанбурхан өвчнөөс сэргийлэх хооллолтын зөвлөгөө:
- Бага насны хүүхдийг эхийн сүүгээр хооллох
- Илчлэг, тэжээллэг хоол өгөх
- Өдөрт 4-5 удаа заавал хооллох
- Хүүхдэд А, С аминдэмээр баялаг хүнс,хоол түлхүү өгөх
- А,Д,С аминдэм болон бусад аминдэмийг нэмэлтээр өгөх
- Хүүхдийг олон нийтийн газар авч явахгүй байх
- Асаргааг сайжруулж, усан чийрэгжүүлэлт хийх
- Гэр орондоо чийгтэй цэвэрлэгээ хийж, 2 цаг тутамд агааржуулалт хийх
Ямар ч насны хүн улаанбурхан өвчнөөс сэргийлэхийн тулд дархлааг дэмжих, биеийн эсэргүүцлийг сайжруулах хоол хүнс хэрэглэх шаардлагатай.
Үүнд:
- Амьтны гаралтай уургаар баялаг хүнс хэрэглэх. Үүнд: Малын мах, өндөг, сүү сүүн бүтээгдэхүүнийг өдөр бүр хангалттай хэрэглэх
- Аминдэм, эрдэс бодисоор баялаг жимс, хүнсний ногоог түлхүү хэрэглэх. Олон төрлийн хүнсний ногоог хоолондоо хэрэглэхээс гадна жимсний цэвэр шүүсийг өдөрт доод тал нь 1 аягийг ууж хэвших.
- Хүнсний ногооноос хулуу, лууван, амтат төмс гэх мэт А аминдэмээр баялаг. улбар, улбар шар ногоонуудыг хэрэглэх ба эдгээрийг нухаш, зутан, шүүс байдлаар хэрэглэх хэрэгтэй. Мөн цэвэр жимс, ногоо С амин дэм болон антиоксидантаар баялаг байдаг.
- Цай, сүү, ундааг аль болох халуун бүлээн хэрэглэх. Илчлэг сайтай шөлтэй, халуун хоол идэж, аминдэмээр баялаг шингэн зүйлийг халуун бүлээнээр нь түлхүү уух. Тухайлбал буцалсан аарц, чацарганы шүүс, аньсны шүүс, үхрийн нүдний шүүс зэргийг халуунаар нь уух.
- Сармис, сонгино, цагаан гаань дархлааг сайжруулах үйлчилгээтэй тул хоолондоо тогтмол хэрэглэж хэвших. Зарим хүүхдэд үнэр амт нь таалагддаггүй учраас үл мэдэгдэх болтол нь жижиглэн хэрчиж, үрж хийх. Сармисыг угааж цэвэрлээд чанахгүйгээр шууд хэрэглэх нь илүү үр дүнтэй. 500 грамм халуун усанд нунтагласан 4-5 хумс сармис хийж хандлаад хоолойгоо ойр ойрхон зайлж болно. Мөн нимбэгний уусмал, царван, сод, давсны уусмал байж болно.
- Ус болон шингэнийг хангалттай хэрэглэх. Хүүхдийн биеийн жингийн ихэнх хувийг ус эзэлдэг. Хүүхдэд шингэн их дутагддаг ба бүрэн хэмжээгээр нөхөж чаддаггүй. Өдөр тутамдаа усыг хангалттай хэрэглэх нь биеийн ерөнхий үйл ажиллагааны үндэс болох ус чийгээр хангах нөхцөл болдог.
- Сайн унтаж амрах хэрэгтэй. Тогтмол цагт унтах нь дархлааны хамгийн том зэвсэг болдог. Шинэ төрсөн хүүхэд 18 цаг, цэцэрлэгийн насны хүүхэд 12-13 цаг, сургуулийн насны хүүхэд 10 цаг унтах шаардлагатай юм байна.