УИХ-ын гишүүн О.Баасанхүү УИХ дахь Ардчилсан намын зөвлөлд элсэх хүсэлтээ өнгөрсөн долоо хоногт албан ёсоор ирүүлсэн. Тэгвэл түүний уг хүсэлттэй УИХ дахь Ардчилсан намын зөвлөлийн гишүүд танилцаж, өчигдөр хариу бичгийг намын удирдлагууд түүнд гардуулжээ.
Тус бичигт:
“Улсын Их Хурал дахь Ардчилсан намын зөвлөлтэй хамтран ажиллах Таны 2019 оны 6 дугаар сарын 9-ний өдрийн 6407 тоот албан бичигтэй танилцлаа.
Үндсэн хуульд нэмэлт, өөрчлөлт оруулах тухай төсөлтэй холбогдуулан Улсын Их Хурал дахь Ардчилсан намын зөвлөл тодорхой зарчмын байр суурийг илэрхийлсээр ирсэн билээ.
Иймд Үндсэн хуульд нэмэлт, өөрчлөлт оруулах тухай төслийн болон бусад Улсын Их Хурлаар хэлэлцэгдэж буй хууль, эрх зүйн асуудлын хүрээнд Улсын Их Хурал дахь Ардчилсан намын зөвлөлтэй хамтран ажиллах таны хүсэлтийг хүлээн авч байгааг үүгээр мэдэгдэж байна” гэжээ.