УИХ-ын гишүүн Г.Амартүвшин гадаадын иргэншилтэй гэх асуудал дахин дэгдлээ. Олон нийтийн сүлжээнд тавигдсан мэдээллүүдэд ноцтой баримтууд хавсаргасан байгаа нь анхаарал татаж байгаа юм.
Тодруулбал, УИХ-ын гишүүн Г.Амартүвшинг 2013 онд “Монгол Улсын харьяатаас гарахыг хүсэгчийн анкет”-ыг гар бичмэлээр бөглөсөн. Ингэхдээ “Аль улсын харьяат вэ” гэсэн асуултад “Нидерланд улс” гэж бичсэн баримт байгаа юм.
Түүнээс гадна УИХ-ын гишүүн Г.Амартүвшинг Нидерланд улсын иргэншилтэй болохыг баталсан гадаад паспортын зураг ч олон нийтэд ил болоод байгаа юм.
Түүгээр зогсохгүй “Голландын иргэний харьяалал олгосон тухай нийтлэл” хэмээх албан бичигт “2007 оны нэгдүгээр сарын 15-ны хааны зарлиг, дугаар AR: 07000026, дугаар NAR: 20060254 Голланд улсын цог жавхлант Хатан хаан голландын иргэний харьяаллыг Амстердам хотод оршин суугаа, ….-нд Монгол Улсын Улаанбаатар хотод төрсөн Ганибал овогтой Амартүвшинд олгов” гэсэн баримтууд олон нийтэд хүрээд байна.
Монгол Улсын хууль тогтоох дээд байгууллагад сонгогдсон хүн гадны иргэншилтэй гэх асуудал дэгдэхэд олон нийтийн анхаарлыг татах нь зүй ёсных. Магадгүй ийм асуудал бодитой бол ноцтой бөгөөд улс орны үндэсний аюулгүй байдлын хэмжээнд яригдах ёстой юм. УИХ-ын гишүүн гэдэг өөрөө бүх ард түмний төлөөлөл. Иргэн бус ард түмний төлөөлөл болсон хүн ийм асуудалд холбогдоход сонгогчид, ард түмэн бодит мэдээллийг хүсч буй.
Бид энэ талаар УИХ-ын гишүүн Г.Амартүвшингээс албан ёсны байр суурийг тодруулсан юм. Тэрээр “Намайг Нидерланд улсын иргэн гэж гүтгэсэн худал мэдээлэл дахин саяхнаас явж эхэлж байна. Би Нидерланд улсын Элчин сайдын яамнаас албан ёсоор энэ талаар тодорхойлолт гаргуулж авсан. Тус тодорхойлолтод намайг Нидерланд улсын иргэншилгүй гэсэн байгаа. Баримтыг би танд давхар өгье. Түүнээс гадна хэвлэл мэдээллийн хэрэгслээр 2014 оны нэгдүгээр сарын 8-ны өдөр
Монгол Улсын харьяатаас гаргасан Ерөнхийлөгчийн зарлиг гэх фотошоп хийсэн баримт 2020 оны УИХ-ын сонгуулийн үеэр нэлээд явсан. Энэ бол фотошоп хийсэн худал мэдээлэл болохыг та бүхэн бас нягталж үзэхийг хүсье. Тагнуулын байгууллага, Улсын бүртгэлийн ерөнхий газар зэрэг холбогдох байгууллагууд намайг Монгол Улсын иргэн хэвээр байна, гадны харьяалалгүй гэдгийг баталсан албан бичгүүдийг ирүүлж байсан. Одоо ч байна. Тиймээс энэ бол худлаа гүтгэлэг. Хариуцлагатайгаар хэлэхэд миний бие Монгол Улсын иргэн, харьяаллаа солиогүй” гэсэн юм.
Иргэншилтэй холбоотойгоор олон нийтэд хүрээд буй баримтууд 2007-2013 оны үеийн баримтууд байгаа юм. УИХ-ын гишүүн Г.Амартүвшингийн албан ёсоор байр сууриа илэрхийлэхдээ “Монгол Улсын харьяатаас гарах хүсэлт илгээсэн эсэх, түүндээ Нидерланд улсын иргэншилтэй гэж тэмдэглэсэн талаарх асуудал, мөн “Голландын иргэний харьяалал олгосон тухай нийтлэл” хэмээх албан бичигт “2007 оны нэгдүгээр сарын 15-ны хааны зарлиг, дугаар AR: 07000026, дугаар NAR: 20060254 Голланд улсын цог жавхлант Хатан хаан голландын иргэний харьяаллыг Амстердам хотод оршин суугаа, ….-нд Монгол Улсын Улаанбаатар хотод төрсөн Ганибал овогтой Амартүвшинд олгов” гэсэн баримтуудын талаар дурдаагүй.
Монгол Улсын Их хурлын сонгуулийн тухай хуулийн 3.1.3-т “нэр дэвшигч” гэж 25 нас хүрсэн, энэ хуульд заасны дагуу Монгол Улсын Их Хурлын гишүүнд нэр дэвшин бүртгүүлж, нэр дэвшигчийн үнэмлэх авсан Монгол Улсын иргэнийг хэлнэ гэсэн байна.
Бид энэ талаар мэдээллийг тодруулахаар Улсын бүртгэлийн ерөнхий газарт хандсан боловч “Хувь хүний талаар мэдээлэл өгөх боломжгүй” гэсэн юм. Иргэн Г.Амартүвшингийн хувьд нууцын асуудал яригдах боловч УИХ-ын гишүүн Г.Амартүвшингийн асуудлыг иргэд, олон нийт, сонгогчдод төрийн эрх бүхий байгууллага албан ёсны мэдээлэл өгөх үүрэгтэй юм.