Төв шуудангийн уулзварын баруун талаас Цэцэг төвийн уулзварын зүүн тал
хүртэлх замыг өчигдөр оройны 20.00 цагаас эхлэн хаажээ. Уг зам энэ сарын
25-ны өдөр хүртэл хаалттай байх юм. Энэ хугацаанд замын хөдөлгөөнийг
тухайн 2 уулзварт хааж Цэцэг төвийн уулзвараас 1-р сургуулийн уулзвар
хүртэл нэг чигийн хөдөлгөөнд оруулан Сөүлийн гудамж, Сүхбаатарын гудамж
бага тойруугаар хөдөлгөөнийг задлан Чингисийн өргөн чөлөөнд нэмэлт түр
гэрлэн дохио байрлуулан замын хөдөлгөөнийг зохицуулна. Баруунаас ирэх
нийтийн тээврийн автобусыг Сөүлийн гудамжаар оруулан Энхтайвны өргөн
чөлөө уруу зүүнээс ирэх нийтийн тээврийн автобусыг Сүхбаатарын гудамжаар
оруулан Чингисийн талбайн баруун талд 2 автобусны зогсоол түр байгуулан
иргэдэд үйлчлэх аж. Энэ жил нийслэлд Улс, нийслэлийн төсвийн хөрөнгөөр
47,62 км автозам, 453 урт метр гүүрийг шинээр ашиглалтад оруулж, 37,65
км автозам, 134 урт метр гүүрийг өргөтгөн шинэчлэх бөгөөд олон жилийн
насжилттай зуслангийн замууд, дулааны шугам сүлжээг өргөтгөн шинэчлэх
гэж байна. Инженерийн дэд бүтцийн нийт 1153 төсөл, арга хэмжээг
хэрэгжүүлэхээс хамгийн өргөн хүрээнд хийгдэх ажил нь Улаанбаатар хотын
дулаан хангамжийн 3А,Б,В гол шугамыг ф600500 болгон өргөтгөх ажил аж.
Зам засвар, шугам хоолой солих ажлыг 2015 оны 06 дугаар сарын 06 ны
өдрөөс эхлэн 2015 оны 08 дугаар сарын 16 өдөр хүртэл Энхтайвны өргөн
чөлөөний Төв шуудангийн уулзвараас баруун 4 замын уулзвар хүртэлх
замыг 3 үе шаттайгаар хааж гүйцэтгэхээр болсон байна. Эхний үе шат буюу
Төв шуудангийн уулзварын баруун талаас Цэцэг төвийн уулзварын зүүн тал
хүртэл замын зорчих хэсэг учир ийнхүү хаагаад байна. Харин 2 дугаар үе
шат буюу Цэцэг төвийн уулзвараас УИД-ийн уулзварыг 06 дугаар сарын
25-ны өдрөөс хаахаар төлөвлөжээ.