Амралтын өдрүүдэд Түнхэл тосгоныхон ахмадын баярыг тэмдэглэв. Ахмад, дунд, залуу үеийн уулзалтыг Түнхэл тосгоны тамгын газар, “Нийгмийн ардчилал Монголын залуучууд”-ын холбоо хамтран зохион байгуулсан юм. Уулзалтын зорилго нь Түнхэл нутгийн хөгжил цэцэглэлтийг өргөжүүлэн, орон нутагт бүтээн байгуулалтыг өрнүүлж, ард иргэдийн ирээдүйн амьдралын төлөөх санаа бодлоо солилцох, настан буурлуудаа хүндэтгэж, дунд үе, залуу үеийнхэн тэдний ажлын туршлагаас суралцах, заавар зөвлөгөөг нь сонсох явдал аж. Мөн гурван үеийнхний дунд буухиа, гар бөмбөг, шатар, даам зэрэг тэмцээн уралдаан зохиож, нэгэн өдрийг эрүүл агаарт өнгөрүүлэв.
Түнхэл тосгон нь уул уурхай, мод бэлтгэх үйлдвэр зэрэг томоохон эдийн засгийн бодитой хөшүүрэг болж чадахаар нөөц баялаг хийгээд төмөр зам дагуух дэд бүтэц сайтай тосгон юм.
Э.Мөнхтүвшин