Энэ сарын 15-16-нд орсон цасны улмаас манай орны нийт нутгийн 60 орчим хувьд нь цасан бүрхүүл тогтож, Багахайрхан, Хөх дэл отрын бүс нутгаар 10-16 см, Хэрлэнбаян-Улаан, Чилэн, Аргалант отрын бүс нутгаар 6-11 см зузаан цастай болжээ.
Цас орж хүйтэрсний улмаас Завхан, Хөвсгөл, Баянхонгор, Төв, Хэнтий аймгийн голуудын сав, хонхор хотгор газруудаар агаарын температур шөнөдөө -25-32 градус хүрч хүйтэн хонож байна.
Долоо хоногийн цаг агаарын урьдчилсан төлвөөр цаашид цас нэмэгдэж, хүйтрэх тул зам, даваа цасанд хаагдах, зам талбайд халтиргаа гулгаа үүсэх, малын хэвтэр бууц хөлдөх, төвлөрсөн халаалттай газруудад таагүй нөлөө үзүүлж болзошгүй байгааг Цаг Уур, Орчны Шинжилгээний Газраас онцгойлон анхааруулж байна.