Цас мөсөө арилгахгүй бол мөнгөө бэлдээрэй

Өглөө нь бороо ороод шөнө нь мөстөөд хонодог байгалийн үзэгдэл гадныханд маш сонирхолтой байдаг гэдэг.

Ялангуяа халуун орноос ирж сурч байгаа оюутнууд нутгийнхандаа энэ үзэгдлийг ярьж гайхшруулна. Харамсалтай нь байгалийн энэ сонин үзэгдэл монголчуудад төвөг уддаг болоод удаж байна.

Өнгөрсөн шөнө машин бүү хэл хүн явахад төвөгтэй болсон. Өглөө мөн тэр хэвээрээ. Олон жил үргэлжилсэн энэ үзэгдэл олон хүнийг хохироосоор ирлээ. Гэмтлийн эмнэлгийн мэдээллээс харвал жилийн жилд зуу зуугаараа халтиргаа гулгаанаас болж гар хөлөө гэмтээдэг. Мэдээж эмчлэх зардал олон саяар тоологдоно. Хохирогсдын 95 хувь нь ямар нэгэн байгууллага, аж ахуйн нэгжийн эзэмшлийн талбайд халтирч гэмтэл авдаг гэнэ.

Энэ тохиолдолд тухайн байгууллага иргэнд учруулсан хохирлыг нөхөн олгох журам байдаг аж. Гэхдээ энэ журам хэрэгжиж хохирлоо төлүүлсэн иргэн одоогоор байхгүй гэнэ. Мөн байгууллагууд үүдний шатаа Хятадын дулаан бүсэд хэрэглэдэг хавтангаар хийдэг.

Энэ нь цас орсон тохиолдолд ямар ч мөсөн гулгуураас дутуугүй халтиргаа үүсгэдэг. Цөөнгүй хүмүүс ийм шаттай байгууллагын буруугаас болж гэмтэж байна.

Тиймээс гэмтэж бэртсэн иргэд хохирлоо нэхэмжилдэг болцгоовол амьдралд ойрхон. Цас мөсөө арилгадаггүй байгууллагуудаас мөнгөө олж авдаг болцгооё. Энэ нь хүний эрүүл мэндээр зогсохгүй, нийслэлийн үзэмжид ч хэрэгтэй. Иймээс цас мөсөндөө дарагдсан залхуу байгууллагууд мөнгөө бэлдээрэй.

Х.БАТТӨГС