-Цахимжуулах ажлын хүрээнд нийт 3,7 сая орчим хуудас баримтыг сканерджээ-
БНСУ-ын КОЙКА байгууллагын буцалтгүй тусламжаар “Монгол орны уур амьсгалын түүхэн мэдээ баримтыг цахимжуулах, архивын орчин үеийн систем бий болгох нь” төсөл Цаг уур, орчны шинжилгээний газар /ЦУОШГ/-ын Байгаль орчин, ус цаг уурын мэдээллийн архивт хэрэгжжээ.
Архивын үйл ажиллагаанд орчин үеийн мэдээллийн технологийн ололтыг нэвтрүүлэх, олон жилийн түүхэн баримт мэдээг үрэгдэж устах эрсдлээс хамгаалах, эрэлт ихтэй баримтын цахим хувийг бий болгох, өндөр хурдны сүлжээнд суурилсан, их хэмжээний мэдээлэл хадгалах боломж бүхий мэдээллийн сан үүсгэх, улмаар интернетийн орчинд төр, засгийн байгууллага, иргэдэд шаардлагатай мэдээллээр шуурхай, хүртээмжтэй үйлчлэх, боловсон хүчний чадавхийг сайжруулах зорилгоор хэрэгжүүлсэн уг төслийг БНСУ-ын KOЙКА байгууллагын санхүүжилтээр SoluTek компани, Пүгёны Их сургууль, CitiNet компани зэрэг байгууллагууд хамтран гүйцэтгэсэн байна.
Төслийн хүрээнд аппликэйшн сервер, цахимжуулалтын сервер, мэдээллийн сангийн сервер, хадгалуурын тоног төхөөрөмжийг SoluTek компаний мэргэжилтнүүд суурилуулөн өгсөн ба цаасан суурьтай баримтыг цахимжуулах ажлын хүрээнд нийт 3,7 сая орчим хуудас баримтыг сканердаж мөн цахим баримтыг хөрвүүлэн, автомат болон чанарын шалгалт гүйцэтгэж, мэдээллийн сангийн серверт оруулаад байна.