Олон улсын боксын холбоо (AIBA)-ны конгрессын хурал ОХУ-ын Москва хотод боллоо. Энэ хурлын үеэр тус холбооны Техникийн комиссын ахлагч Пет Фиако “Токио-2020” олимпийн наадмын сонирхогчдын боксын шинэ жингийн ангиллыг зарлажээ.
Тодруулбал, 52кг, 57кг, 63кг, 69кг, 75кг, 81кг, 91кг, +91кг гэсэн нийт найман жингийн ангиллаар нийт 214 эрэгтэй боксчин 2020 онд Японы нийслэл Токиод тулалдана. Харин эмэгтэй тамирчид 51кг, 57кг, 60кг, 69кг, 75кг гэсэн таван жингээр олимпийн наадамд өрсөлдөхөөр болж байна.
Сонирхуулахад, өнгөрсөн 2016 оны олимпийн наадамд эрэгтэй тамирчид 49, 52, 56, 60, 64, 69, 75, 81, 91 кг, + 91 кг, эмэгтэй боксчид 51, 60, 75 кг-д өрсөлдөж байв. Олон улсын олимпийн хороо (ОУОХ)-ноос Жендерийн тэгш байдлыг хангах зорилготой “Токио 2020” олимпийн наадмын хөтөлбөрт өөрчлөлт оруулсан билээ. Тус өөрчлөлтөөр боксын төрөлд эрэгтэйчүүдийн хоёр жинг хасан, эмэгтэйчүүдэд хоёр жин нэмсэн юм.