“Таванбогд трейд” групп хэвлэх үйлдвэрийг өмчлөх эрхээ албан ёсоор авлаа. Тус групп худалдан авсан барилгын үнэ болох 23 тэрбум 580 сая төгрөгийг бүрэн төлжээ. Иймд Нийслэлийн Өмч хувьчлах комиссын хурлаар “Улаанбаатар” сонины хуучин хэвлэх үйлдвэрийн барилгыг газрынх нь хамт өмчлөх эрх олгохоор болжээ. Энэ барилга нь Сүхбаатар дүүргийн наймдугаар дугаар хорооны нутаг дэвсгэрт байрладаг юм.
Мөн Нийслэлийн Өмч хувьчлах комиссын хурлаар хоёр барилгын үнийг бүрэн төлсөн этгээдэд “Өмчлөгчийн эрхийн гэрчилгээ” олгохоор шийдвэрлэжээ. Тухайлбал, дөрвөн тэрбум гурван зуун хорин сая төгрөг төлсөн Монгол Улсын иргэн З.Пүрэв-Очирт Чингэлтэй дүүргийн нэгдүгээр хороонд байрлах Шүд эрүү нүүрний эмгэг судлалын төвийн барилгын өмчлөлийн эрхийг шилжүүлэхээр болжээ. Мөн 135 сая 500 мянган төгрөг төлсөн “Эко тунамал” ХХК Баянгол дүүргийн 17 дугаар хорооны Өрхийн эрүүл мэндийн төвийн хуучин барилгын өмчлөх эрхтэй болов.
“Өмчлөгчийн эрхийн гэрчилгээ” олгох асуудлыг Төрийн болон орон нутгийн өмчийн тухай хуулийн 43 дугаар зүйлийн тав дахь заалт, Худалдах худалдан авах гэрээний дагуу хэлэлцэж шийдвэрлэжээ.