Архангай аймгийн Тариат сумаас “Мал амьтны эрүүл мэндийн тухай хууль”-ийн хэрэгжилтийг хангах, эрүүл малтай сум болох зорилтын хүрээнд багуудын мал угаалгын ванныг засварлах, шинээр барих ажлыг үе шаттай зохион байгуулж байгаа. Энэ онд орон нутгийн хөгжлийн сангийн хөрөнгөөр Тэрх, Цагааннуур, Мөрөн, Алтаад багт шинээр мал угаалгын ванн барьж байна.
Мөн НҮБ-ын ХХАА-н газраас 1000 бог малын багтаамж бүхий мал угаалга, тарилга туулгалтын хашааг бусад төхөөрөмжийн хамт Тариат суманд хүлээлгэн өгсөн байна.
Ирэх жил Хорго, Суман багт мал угаалгын ванн барина. Ингэснээр Тариат сумын бүх бог мал угаалгын ваннтай болж байна. Сумын Засаг даргын 2018 оны долдугаар сарын 10-ны А/93 тоот захирамжийн хүрээнд МЭҮТ, “Тэрх-Ар” Мал эмнэлэг үржлийн нэгж, багийн Засаг дарга, малын эмч нар малчидтай хамтран сумын хэмжээнд мал угаалга болон хашаа хорооны ариутгал халдваргүйжүүлэлтийн ажлыг хийж, нийт 113535 толгой малыг угаалгад хамруулжээ.