Өмнөд болон Хойд Америкийн орнуудад энэ оны нэгдүгээр сараас эхлэн зика вирусын халдвар тархаж, өдгөө дэлхийн арав гаруй улсад тархаад байна. Энэхүү вирус нь жирэмсэн эхэд халдварласан тохиолдолд ургийн гавлын яс жижгэрч, оюун ухааны хомсдол, хараа, сонсгол муутай хүүхэд төрөхөд хүргэдэг. Хамгийн сүүлд л гэхэд манай хойд хөрш болох ОХУ, урд хөрш болох БНХАУ-д энэхүү вирусын халдвар тархаад буй. Тэгвэл хамгийн сүүлийн мэдээгээр БНСУ-д зика вирусын анхны тохиолдол бүртгэгджээ. Тодруулбал, Өмнөд Солонгос улсын 43 настай иргэн Ким “Зика” вирусийн халдвар авсан тус улсын анхны иргэн болж бүртгэгджээ.
Өмнөд Солонгос улсын 43 настай иргэн Ким “Зика” вирусийн халдвар авсан тус улсын анхны иргэн болж бүртгэгджээ.
Тэрбээр ажлын томилолтоор Бразил улсад 22 хоног ажиллаад энэ сарын 11-ний өдөр эх орондоо ирсэн гэнэ. Ингээд гэртээ ирсэнээс хойш тав хоногийн дараа Ким гэнэт халууран эмнэлэгт үзүүлсэн боловч түүнээс ямар нэгэн халдварт вирусын шинж тэмдэг илрээгүй аж. Гэвч түүний үе мөч өвдөж байсан учраас дахин тав хоногийн дараа эмнэлэгт үзүүлэхэд зика вирусын халдвар авсан болох нь тогтоогджээ. Зика вирусын халдвар нь хүн ялаа, шумууланд хазуулсанаас 2-14 хоногийн дараа илэрдэг ба түүнийг эмчлах ямар нэгэн эм тариа байхгүй ч эмнэлгийн хяналтанд байж өвчнийг эдгээх ёстой ажээ. Иргэн Ким хэлэхдээ “Бразил улсад байхдаа ялаа, шумууланд хазуулахгүй байхыг хичээж байсан боловч хэд хэдэн удаа ялаанд хазуулсан” хэмээн хэлсэн байна. Эдүгээ түүнийг тусгаарлан эмчилж байгаа талаар тус улсын хэвлэл онцолжээ.