Шри Ланка улсад ням гаригт террорист халдлага болж, зочид буудал, Христийн сүмүүдэд амиа золиослогчид бөмбөг дэлбэлсний улмаас 321 хүний амь үрэгдэж, 500 гаруй хүн гэмтэж бэртсэн билээ. Тэгвэл Христийн шашинтнуудыг онилсон энэхүү харгис халдлагыг Исламын улс террорист бүлэглэл үйлдсэнээ хүлээн зөвшөөрчээ.
Тус улсын цагдаагийн байгууллагаас Исламын шашны хэт үзэлтэн хоёр бүлэглэл үйлдсэн байж магадгүй гээд өнгөрсөн сард Шинэ Зеландад болсон 50 хүний аминд хүрсэн халдлагын өшөө авалт гэж үзэж байгаагаа илэрхийлжээ. Хэргийг мөрдөн шалгах ажиллагаа үргэлжилж байгаа аж. Шинэ Зеланд улсад болсон зэвсэгт халдлагыг Австрали гаралтай арьс өнгөний үзэлтэн этгээд үйлдсэн бөгөөд Исламын хоёр сүмд мөргөл үйлдэж байсан хүмүүс рүү гал нээн 50 хүнийг хөнөөж, мөн тооны хүнийг шархдуулсан юм.