Шинэ оны анхны өдрийг хэрхэн угтсанаас тухайн жилдээ ямар байх нь шалтгаалдаг гэдэг. Түүнчлэн оны эхний өдрийн өглөөний нарыг харахаар ажил үйлс бүтэж, тэр жилдээ хийморьтой явдаг хэмээн монголчууд бэлгэшээдэг. Тиймээс шинэ оны өглөө нар харах ёслол, аяллыг МЗХ-оос жил бүр зохион байгуулдаг болоод байгаа юм.
Өнгөрсөн жил Төмөр замын аялал жуулчлалын товчоотой хамтран зохион байгуулж байсан бол энэ жилийн хувьд Багахангай дүүрэг, Багахангай дүүргийн залуучуудын холбоо, Залуучуудын Аялал Жуулчлалын Хөгжлийн төв хамтран Хангай зөрлөгт оны анхны нар харах ёслолыг өнөөдөр зохион байгууллаа.
Аяллын явцад галын наадам, чөлөөт үзүүлбэр, төрөл бүрийн хөгжөөнт тоглоом зэрэг олон сонирхолтой арга хэмжээнүүд болов. Мөн оны анхны нар харсны дараа нийт аялагчдын дунд “Гоёмсог цасны баяр”-ыг зохион байгуулахаар төлөвлөөд байгаа ажээ.