Хятадын Сычуань мужийн их сургуулийн харьяа эмнэлэгт хиймэл зүрх шилжүүлэн суулгах хагалгаанд орсон өвчтөн бүрэн эдгэрч, эмнэлгээс гарчээ. “China Daily” сонины мэдээлснээр Хятадын эрдэмтэд цус шахах үйлчилгээтэй шахуургыг сансрын технологи ашиглан бүтээсэн гэнэ. Хиймэл зүрх нь 180 грамм жинтэй, зүрх судасны дутагдлын үед илрэх шинж тэмдгүүдийг бага ч болов бууруулах үйлдэлтэй гэж эрдэмтэд үзэж байна. Хагалгаа нь амжилттай болсон Ли нь өдгөө 30 настай. Тэрээр нэгдүгээр сарын 13-нд хиймэл зүрх шилжүүлэн суулгах хагалгаанд орсон агаад бие нь бүрэн тэнхэртэл хоёр сарын турш нөхөн сэргээх эмчилгээнд хамрагдсан байна. Тэрээр 2019 оноос хойш зүрх дэлсэх, цээжээр өвдөх гэсэн зовиуртай байж. Зүрх шилжүүлэн суулгах хагалгаанд эртнээс орох хүсэлтэй байсан ч донор олдохгүйгээс өдийг хүргэсэн гэнэ. Илүүдэл жингээсээ болоод бие нь эрс муудсан аж. Харин Хятадын эрдэмтдийн бүтээсэн хиймэл зүрх нь түүнд дахин амьдрал бэлэглэсэн гэж хуучилжээ. Лигийн ярьснаар “Бие маань маш сайжирсан. Урьд нь орноосоо босоход маш хүндрэлтэй байлаа. Одоо бол төхөөрөмжийнхөө ачаар зовиур маань бүрэн арилж, хөдөлгөөн хийхэд саадгүй болсон” гэв.
HeartCon төхөөрөмж нь пуужин зөөвөрлөгч Хятадын академи гэх нэр дор үйл ажиллагаагаа явуулдаг технологийн компанийн бүтээл юм. Тус байгууллага нь улсдаа сансрын тоног төхөөрөмж үйлдвэрлэгч тэргүүлэгч компанид тооцогддог байна. Эрдэмтдийн бүтээсэн хиймэл зүрх нь хоёр зайгаар ажилладаг. Зай тус бүр нь 10 цаг ажиллах хүчин чадалтай. Түүнээс гадна эрдэмтэд хиймэл зүрхтэй хүнийг усанд ороход зориулсан тусгай төхөөрөмж бүтээжээ. Энэ нь хүний биед суурилуулсан төхөөрөмж норохоос сэргийлэх юм байна.
Хятадад зүрхний өвчний дутагдалд орсон 35аас дээш насны 16 сая орчим хүн байдаг гэсэн тооцоо бий. Ийм төрлийн өвчтөнүүдийн дийлэнх нь хожуу үедээ эмийн эмчилгээ үр дүнгүй болсон байдаг. Мөн донор ховор байдаг тул зүрх судасны дутагдалд орсон ихэнх өвчтөн зүрх шилжүүлэн суулгах хагалгаагаа хүлээсээр хорвоог орхидог байна.
Д.ЦЭРЭНДОЛГОР