УИХ-ын чуулганы өнөөдрийн хуралдаанаар Ерөнхийлөгчийн санаачилсан Улс төрийн намуудын тухай хуулийн шинэчилсэн найруулгын төслийг хэлэлцэж байгаад түр завсарлалаа.
Үдээс өмнөх чуулганы хуралдааны үеэр МАН-ын бүлгийн дарга С.Бямбацогт УИХ-ын дарга З.Энхболдод зориулж шүлэг зохиосноо уншив. Тэрбээр оны өмнөхөн Засгийн газарт шинэ жилийн бэлэг болгож “Хямралын гацуур” засч өгсөн. Тэгэхдээ “Хямралын гацуур”-ыг Засгийн газрын хуралдааны танхимын өрөөний үүдэнд байрлуулж, гацуураа Засгийн газрын гишүүдэд хаягласан элэглэл маягийн ил захидлаар чимэглэсэн байсан. Харин энэ удаад тэрээр ардын уран зохиолч Ш.Сүрэнжавын “Багш” найраглалаас санаа авч, спикерт зориулан ийн шүлэг бичжээ.
Байшин зардаг барилгачин
Барьцгүй залдаг илтгэгч
Түшээдийг загнадаг дарга
Түмнийг гонсойлгодог горьдоогч
Цэцийн дээр гарсан хөх тэнгэр
Телевизийг удирддаг удирдлага
Засгийг мэддэг Ерөнхий сайд
Зээл мэддэг банкир болсон
Хурлын дэг сахиулагч биш
Хуулийг зоргоороо өөрчлөгч болсон
Бүхнийг чадагч, бүхнийг мэдэгч
Бие жижиг ч бэлчээр томтой
Бүгдийг захирагч хаан болсон.
Түүний шүлгийн хариуд УИХ-ын дарга З.Энхболд “Манай гишүүдийн шинэ авьяас илэрч, шүлэг зохиодог боллоо. Болор цомын бүртгэл эхэлснийг Батбаяр гишүүн сануулж байна” гэж хариулав.