Өнгөрсөн ням гаригт дэлхийн уур амьсгалын өөрчлөлтийн эсрэг чимээгүй жагсаал Францын Парис хотноо боллоо. Тус эсэргүүцлийн жагсаалын гол бэлгэ тэмдэг нь гудамжинд тайлан тавьсан мянга, мянган хос гутал бөгөөд өнөөдөр буюу арваннэгдүгээр сарын 30-ны өдөр эхэлж буй Дэлхийн уур амьсгалын эсрэг олон улсын чуулганыг угтан зохион байгуулж буй гэдгээрээ онцлог юм. Эдгээр гуталнууд энд Парис хотноо жагсаалд ирж амжаагүй эсвэл дэлхийн дулааралтыг зогсоохын төлөө чин эрмэлзлэлтэй хүмүүсийг төлөөлж байгаа гэдгийг жагсагчид хэлсэн юм. Түүнчлэн энэ сарын 13-нд Парис хотноо болсон террорист халдлагын үеэр нас барсан 130 гаруй хүний гэгээн дурсгалыг давхар хүндэтгэсэн юм.
Дашрамд дуулгахад Монгол Улсын Ерөнхийлөгч Ц.Элбэгдорж Францын нийслэл Парис хотноо өнөөдөр эхэлж буй Дэлхийн уур амьсгалын өөрчлөлтийн эсрэг чуулганд оролцож байна. Дээрх арга хэмжээнд дэлхийн 160 орны удирдагч оролцож, дэлхийн дулаарал, хүлэмжийн хийн ялгаралтад нөлөөлж байгаа гол хүчин зүйл болох нүүрстөрөгчийн давхар исэл, метан зэргийг ялгаруулагч нүүрс, газрын тос, байгалийн хийн хэрэглээг бууруулах талаар хэлэлцэх юм.
Энэ удаагийн чуулган “Сүүлчийн боломж” уриан дор болж өнгөрнө.
