Оюутолгойн ордын 80 хувийг далд уурхайгаас олборлох тооцоо байгаа юм. Бүтээн байгуулалтын ажилд нь нийтдээ 16 тэрбум ам.доллар шаардлагатай байгаагаас эхний ээлжинд 4.2 тэрбум долларыг олон улсын арилжааны 15 банкнаас авахаар болсон билээ. Тэгвэл албаны хүмүүсийн мэдээлж байгаагаар далд уурхайн бүтээн байгуулалтад шаардагдах санхүүжилт авах асуудал шийдэгдсэн байна.
Оюутолгой төслийг хэрэгжүүлэгч Рио Тинто группийн зүгээс далд уурхайн санхүүжилтийн гэрээг ирэх долоо хоногийн дараа Улаанбаатар хотноо байгуулахаар төлөвлөж байна. Хувь нийлүүлэгчдийн баталсан төлөвлөгөөний дагуу энэ онд бүтээн байгуулалтын бэлтгэл ажилд 300 сая ам.доллар зарцуулах ажээ.