Нэг ой ч хүрээгүй хүүхдийг хэрцгийгээр зодож, гэмтээсэн хэрэг Дундговь аймгийн “Оюуны хөгжил” гэх хувийн цэцэрлэгт гарсан билээ. Тодруулбал, тус цэцэрлэгийн эрхлэгчийн төрсөн дүү тогоочоор ажиллаж байсан эмэгтэй 10 сартай хүүг хооллох үедээ зодож, хүчирхийлсэн нь бичлэгт үлдсэн юм.
Эл хэргийг баталгаажуулах үүднээс зодуулж буй хүүгийн ангийн багш Э.Янжинлхам бичлэг хийж, олон нийтэд дэлгэсэн. Ингээд асуудлын мөрөөр цагдаагийн байгууллага цэцэрлэгийн тогооч Ж.Отгонцэцэгт эрүүгийн хэрэг үүсгэн шалгаж эхлээд буй.
Мөн “Оюуны хөгжил” цэцэрлэгийн үйл ажиллагааг тус аймгийн Мэргэжлийн хяналтын газраас түр хаагаад байсан юм. Тэгвэл нийгмийг цочирдуулсан эл асуудлыг Дундговь аймгийн удирдлагууд анхааралдаа авч, зохих шийдвэрийг гаргажээ.
Тус Аймгийн засаг дарга С.Од-Эрдэнэ өчигдөр төрийн бус өмчийн “Оюуны хөгжил” цэцэрлэгийн үйл ажиллагааг хааж, аж ахуй нэгжийн тусгай зөвшөөрлийг хүчингүй болгосон байна.