Риогийн олимпод Казакстан улсын нэрийн өмнөөс барилдаж жүдо бөхийн эмэгтэйчүүдийн 48 кг-ийн жинд хүрэл медалийн болзол хангасан Г.Отгонцэцэгт Казакстаны Соёл, спортын яамнаас 75 мянган долларын шагнал хүртээхээр болжээ. Түүний авчирсан хүрэл медаль нь Казакстаны олимпийн анхны медаль байсан юм.
Казакстан улс олимпийн алт авсан тамирчиндаа 250 мянга, мөнгө авбал 150 мянга, хүрэл медаль авбал 75 мянган долларын мөнгөн шагнал олгохоор заасан байдаг юм байна. Энэ нь төр засгаас өгч буй шагнал бөгөөд үүнээс гадна хувийн ивээн тэтгэгчдийн тусгай шагналууд ч дагалддаг аж.
О.ӨНӨР