Төв аймгийн Заамар сумын нутаг, “Эко-Алтан заамар” ХХК-ийн уурхайн нурангид дарагдсан дөрвөн иргэнийг аврах ажиллагаа хүч нэмэгдүүлэн үргэлжилж байгаа талаар ОБЕГ-аас мэдээллээ. Ил уурхайн 100 метрийн өргөн, 80 метрийн гүнд зургаан хүн дарагдсан тухай дуудлага өчигдөр 16.50 цагт Онцгой байдлын байгууллагад ирсэн бөгөөд хоёр хүнийг нурангиас эсэн мэнд аварсан байна. Онцгой байдлын газрын дэд дарга, хурандаа Б.Ууганбаяр, ОБЕГ-ын Гамшгийн шуурхай удирдлагын газрын дарга, хурандаа Б.Мандахгэрэл нараар ахлуулсан Үндэсний аврах бригад, Уул уурхайн аврах ангийн 24 алба хаагчаас гадна Орхон аймгийн онцгой байдлын зургаан алба хаагч өнөөдөр өглөө хүч нэмэн аврах ажиллагаанд оролцож байна.