Монгол бахархлын өдөрт зориулсан чансаа өндөр 128 бөхийн барилдаан өвлийн тэргүүн сарын шинийн 1-нд болдог. Тус барилдааныг энэ жил Улс тунхагласны ойн барилдаантай нэгтгэн арваннэгдүгээр сарын 26-ны өдөр зохион байгуулах шийдвэрийг Монголын үндэсний бөхийн холбооноос гаргажээ. Энэ барилдаанд 256 бөх зодоглоно. Чансаа өндөр энэ барилдаанд зориулж зарим бөхчүүд цөөхөн хоногийн бэлтгэлийн цугларалтад гараад өнөөдөр бууж байна. Улс тунхагласны ойн барилдаан ингэж л ач холбогдол өгдөг. Өнөө жил тус барилдаан ирц сайтай явагдах талаар бөхчүүд хэлж байна. Тодруулбал, зүүн барууны магнайг Увс нуур дэвжээний идэрхэн аваргууд болох Н.Батсуурь, П.Бүрэнтөгс нар авч гарах гэнэ. Шинэ аварга Оргихын Хангай арслан Р.Пүрэвдагва нар дагавар магнайд гарч цолоо дуудуулах аж. Харин улсын арслан Б.Орхонбаяр сая Сэлэнгэ аймагтаа хүлээн авалтад оролцож явсан тул энэ удаагийн барилдааныг өнжих бололтой. Олны анхаарлын төвд байгаа бөх бол О.Хангай аварга. Алтан цомын төлөөх барилдааны нэгдүгээр шатанд Дорнодын бөхчүүдийг арал бяраар илтэд илүүрхэж кран шиг л өргөж чулуудсан О.Хангай аварга Сонгинохайрхан дүүргийн ойн барилдаанд ч хол тасархай түрүүлсэн.
Тэрбээр өнгөрсөн зун аварга цолны залаа тэмдэг зүүснээс хойш нэг ч удаа өвдөг шороодоогүй явна. Энэ ноёрхлыг хэн зогсоох вэ гэдэг анхаарал татаж байна. Эртнээс л О.Хангайтай эн тэнцүү өрсөлддөг байсан улсын заан Б.Бат-Өлзийгийн найр наадмын ажил өндөрлөж блтгэлдээ орсон талаар хэлж байсан. Заалны барилдаанд хэнийг ч мөргөөд л унагадаг Бат-Өлзийгийн бэлтгэл жигдэрсэн талаар дасгалжуулагч нь онцолж байна лээ.
Тиймээс О.Хангайгийн дараалсан түрүүнд завсар оруулах өндөр магадлалтай хүчтэн нь Баярхүүгийн Бат-Өлзий заан байж болох талаар бөхийн хүрээнийхэн хэлж байна. Мөн даян аварга Н.Батсуурь ч Улс тунхагласны ойн барилдаанд хараахан түрүүлж амжаагүй яваа. Намрын улирлын нээлтийн барилдаанд үзүүрлэж байгаагаас нь харахад тогтмол бэлтгэлтэй, заалнаас салахгүй яваа нь анзаарагдсан. Энэ удаа чансаа өндөр барилдаанд түрүүлэх өндөр магадлалтай цөөн хүний нэгээр Н.Батсуурь аваргыг нэрлэх байна. Харин П.Бүрэнтөгс аварга өнгөрсөн хугацаанд “Бүрэн Монгол” төслийн хүрээнд залуу гэр бүлүүдэд өрх гэр бэлэглээд завгүй явна лээ. Бэлтгэл нь хараахан жигдрээгүй байгаа болов уу.
Завханы М.Лхагвагэрэл заан энэ удаа зодогловол тод өнгө байх болно. Барилдах эсэх нь одоогоор тодорхойгүй байна. Чөлөөт бөхийн ДАШТ-ээс мөнгө, хүрэл медаль хүртсэн түүний амжилтыг төр засаг үнэлж гавьяат тамирчин цолоор мялаасан байна лээ. Барилдвал О.Хангай аваргын гол өрсөлдөгчийн нэг нь М.Лхагвагэрэл байх болно.
Дээгүүр даваанд гарч аварга арслангуудтай тулах аймгийн цолтон нь өнгөрсөн цагаан сарын түрүү аймгийн арслан Э.Мөнхжаргал. Том цолтнуудыг нураагаад сурчихсан Э.Мөнхжаргал О.Хангайтай дөрвийн даваанд оноолтоор таарвал гал ноцохоор ширүүн өрсөлдөөнийг үзүүлнэ. Их спортын мэдрэмжээ гайхуулж Э.Мөнхжаргал О.Хангай аваргын дээр нь ч тусч мэднэ. Мөн нээлтийн барилдааны түрүү улсын харцага Б.Зоригтбаатар, Б.Цэдэнсодном, Ц.Бямба-Отгон гээд залуус аварга, арслангуудтай ямар өрсөлдөөн үзүүлж цааш цолоо ахиулах боломжтойгоо харуулах нь сонин байна. Энэ мэт сонирхолтой олон асуултын хариулт бямба гаригийн үдэш тодорхой болно.