Дэлхийн хамгийн нэр хүндтэй шагнал болох Нобелийн шагнал гардуулах ёслол өчигдөр Шведийн Стокгольм хотноо боллоо.
Шведын хаан Карл XVI Густав Стокгольмын филармонийн байранд анагаах ухаан, физик, хими, уран зохиол, эдийн засгийн салбаруудад тэргүүлсэн эздэд шагналыг гардууллаа. Дэлхийн хамгийн нэр хүндтэй шагналын эзэд болсон 10 хүн хааны гараас диплом, алтан медаль гардан авсан байна.
Бие судлал, эмнэлгийн салбарын шагналыг “шимэгч өтнүүдийн өдөөсөн халдварт өвчний эсрэг эмчилгээний шинэ арга барилыг боловсруулсны төлөө” Уильям Кэмпбелл (АНУ), Сатоши Омура (Япон) болон “шинэ халуун хижгийн эсрэг эмчилгээг” бүтээсэн Хятадын эмч Ту Юю нар авсан байна.
Физикийн салбарын шагналаар нейтрино гэх бичил хэсгийн осцилляцийг нээн тэднийг жинтэй гэж харуулсан Такааки Казита (Япон), Артур Макдональд (Канад) нар шагнагджээ.
Химийн салбарын шагналтнуудаар “ДНК-ийн репарацийн механизмыг судалсан” Томас Линдал (Их Британи), Пол Модрич, Азиз Санкара (хоюулаа АНУ) нар тодорсон юм.
Белорусийн зохиолч эмэгтэй Светлана Алексиевич “манай үе дэх эр зориг, зовлон зүдгүүрийн дурсгалын полифонийн бүтээл” туурвисныхаа төлөө Нобелийн уран зохиолын шагнал хүртлээ.
Ангус Дитон (Их Британи, АНУ) “хэрэглээ, ядуурал, хангалуун байдлын судалгааг” явуулсан учир Альфред Нобелийн дурсгалд зориулагдсан Шведын Төв банкны шагналыг авлаа.