Өчигдөр 11.00 цагийн үед Яармагийн гүүрний цаана буюу Вива сити хорооллын урд зам дээр Өлзийт хорооллын чиглэлийн УБЧ 2343 улсын дугаартай нийтийн тээврийн автобус шатсан осол гарлаа. Эх сурвалжийн мэдээлснээр уг автобусыг чирэгч машинаар засварын газар руу чирч явсан бөгөөд дугуйнаас гэнэт гал авалцан шатжээ. Автобус компанийн ажилчдын хэлж байгаагаар өчигдөр өглөөний шуурхай хурал дээр уг автобусыг мотороо цохисон учраас шугаманд гаргах боломжгүй хэмээгээд яаралтай засуулах талаар ярилцсан байжээ. Ингээд чирэгч машинаар засварын газар руу чирч яваад ийнхүү шатсан байна. Ослын үеэр азаар хүн бэртэж гэмтээгүй бөгөөд галыг унтраахаар НОБГ-ынхан ажилласан юм.
