Нийслэлийн хөгжил дэвшилд бодитой хувь нэмэр оруулж, олон улсын стандарт, шаардлагад нийцсэн бүтээн байгуулалтыг цогцлоосон шилдэг аж ахуйн нэгж, байгууллагыг өнгөрсөн жилээс хотын удирдлагууд шалгаруулж эхэлсэн билээ.
Энэ удаагийн “Нийслэлийн бүтээн байгуулалтын дээд шагнал”-д дөрвөн төрөлд 57 бүтээн байгуулалтаар 60 гаруй аж ахуй нэгж, компани нэр дэвшин өрсөлдсөн байна. Үүнээс барилга байгууламжийн бүтээн байгуулалтын төрөлд иргэдийг тохилог чанартай орон сууцаар хангаж, орчны тохижилтыг бүрэн шийдсэн “Буянт Ухаа-1” хороолол шалгарчээ. Мөн авто зам бүтээн байгуулалтын төрөлд Баянзүрхийн товчооноос Богд уулын араар дамжин Яармагийн гүүр хүртэлх 17.1 км авто замын ажил шалгарсан байна. Түүнчлэн дэд бүтэц, инженерийн бүтээн байгуулалтын төрөлд Нийслэлийн цэвэр усны нөөцийг нэмэгдүүлэх, иргэдийг ундны усаар хангах чиглэлээр ажиллаж байгаа “Жайка” олон улсын байгууллага, Улаанбаатар хотын ундны усыг нэмэгдүүлэх “Гачуурт эх үүсвэрийн ажил” тус тус шалгарч нийслэлийн дээд шагналын эздээр тодорсон байна.
Өнгөрсөн жил бүтээн байгуулалтын дээд шагналын төлөө 21 бүтээн байгуулалт нэр дэвшиж байсан юм.