УИХ дахь МАН-ын бүлэг өнөөдөр хуралдаж, ирэх оны төсвийн төсөлтэй холбоотой асуудлуудыг хэлэлцсэн байна. Мөн үеэр хүүхдийн мөнгө болон гэр хорооллын айл өрхүүдийн цахилгааны шөнийн тарифийн хөнгөлөлтийн талаар мэдээллээ. МАН-ын бүлгийн дарга Д.Тогтохсүрэн “Бүлгийн хурал дээр хүүхдийн мөнгөний талаар хэлэлцсэн. Улмаар Засгийн газраас орж ирсэн төслөөр нь байлгана гэдэг дээр тогтсон. Мөн нийслэлийн гэр хорооллын шөнийн тарифтай холбоотой асуудал төсөвт орж ирээгүй. Энэ чиглэлээр маш олон гишүүд санал тавьсан. Тиймээс ирэх оны төсөвт нийслэлийн гэр хорооллын шөнийн тарифын асуудлыг шийдэх нь зүйтэй гэж үзэж, тодорхой хөрөнгийг суулгахаар тогтсон. Улсын хэмжээнд гэвэл 30 гаруй тэрбум төгрөг шаардлагатай. Харин нийслэлийн хэмжээнд 18 орчим тэрбум төгрөгийн асуудал яригдаж байгаа” гэсэн юм.